Oompumbwe muNehale lyaMpingana masiku dha tidhwapo

0
232

 

OMBOTO – Oshikandjohogololwa shaNehale lyaMpingana ota shi ka mona ombelewa ompe, ndjoka ta yi ka kwatha aakalimo pa ku pwaakena komaudhigu gawo. Aakalimo yomoshikandjohogololo shika okwa konekiwa taya mono iihuna noonkondo. Ombelewa yoshikandjohogololwa ompe otayi ka tungwa pOmboto.

“Oshikandjohogololo shika oshina ompumbwe onene yoosikola, iipangelo aantu ohaya ende unene oondjila oonde okukakonga omayakulo guunamiti, omakwatathano oga pumbako noonkondo, olusheno, omeya, otatu ka longa ngaashi tatu vulu opo tu etele aakalimo yomoshikandjohogololo omeya gayela oshowo gamwe gomomauwanawa ngoka taya pumbwa pethimbo ndika,” Ngoloneya gwoshitopolwa shaShikoto Henock Kankoshi osho a ti.

Nehale lyaMpingana oshikandjohogololo shili muuzilo wOndonga, nomwaalu gwaakalimo yasho inaya tseyika natango molwaasho oshipe omayalulo opo ta ga yi miilonga. Aakalimo oya pumbwa oopate opo oondjila dhawo dhi ninge oofupi. Okwa pumbwa woo osasiona yopolisi yi kale tayi yakula aakwashigwana.

Ngoloneya Kankoshi ndhino okwe dhi yelitha konima sho ali a talelepo oshikandjohogololo shika oshipe.  Oshikandjohogololo shika oshali sha tokolwa patendululo etine momumvo 2013.

“Ombelewa yoshikandjohogololo ndjino tayi ka tungwa mbala otayi ka gandja omayakulo gaakwashigwana ayehe na otwa tega mu yi longithe noku eta omakemo geni unene ngoka muna, otwa hala woo na ne mulye woo koshikuki shemanguluko lyoshigwana ne mu kale mu wete kutya oshilongo osha manguluka shili, otatu ka kandulapo oompumbwe dheni mbala, otatu ka longa opate ndjoka ye ya pombelewa yoshikandjohogololo,” Kankoshi ta gwedhapo.

Kankoshi okwa gwedhapo kutya oshikandjohogololo shika oshali sha totwapo nelalakano opo aakwashigwana yokomikunda ngaashi Omboto oshowo Ohahati na dhilwe ya mone omayakulo ngoka ga pumbiwako unene. Aanona oya konekiwa haya ende oondjila oonde okuya komanongelo na yamwe ihaya ka mana we omanongelo gawo oshoka oondjila oonde noosikola okuna owala mbali dha hulila pondondo ontiyali (Grade2).

Okwa tsikileko ta ti aakwashigwana otaya ka etelwa omayakulo gokapangelo popepi opo kaaya ende we oondjila niinano iile, ota ya etelwa woo omeya oshoka ngaashingeyi ohaya longitha omeya gomoomboola  ngono ga konekiwa thimbolimwe ihaaga longo nawa nolundji ohaya kala yaana omeya. Opate ndjono ya za poKing Kauluma yu uka kOmboto oya tulwa miilonga no tayi ka kala ya longwa mbala.

LEAVE A REPLY

Please enter your comment!
Please enter your name here