Peter ondume yomomufitu: Oshinakugwanithwa shaahogololwa aashona

0
318
Peter Jungle Fighter

 

Oshinakugwanithwa shika oshipe ndapewa osha li sha nika oshiponga  kokutya otashi vulika ndi kwatwe kaatondi yandje  nenge mbaka ya dhipage ndje.Mo ku longa shika ka kwali nda tegelelwa ndi kondjithe omutondi mokulongitha ondjembo, nenge ndi kale nda homata okwiigamena ngele onda ponokelwa.Omolwashika  eshongo moshilonga shika olya li enene  no lya nika oshiponga ku ngame  okuyeleka nethimbo ndali handi kondjo naakwiita yomutondi pomahala nomahala muumbangalantu woshilongo.Ihe nando ongaaka ngame ongo omukwiita gwoPLAN ngoka a pita momalugodhi ogendji  onda taamba oshinakugwanithwa shika ndina omukumo oshowo ndaa na etengatengo.Iilonga yandje oya li ya nika oshiponga molwashoka onda li ndina okupopya naantu opo ndi lundulule omadhiladhilo gawo osho euveko lyawo moshigwana.Shika osha li eshongo enene molwashoka oshigwana oshali shuudha aantu mboka haya longele kumwe nomatanga gomutondi gwetu , naambaka oya li taya vulu okulopota ndje  kaakwiita nenge kiilyo yetanga lyegameno ethimbo kehe.Shika osha li oshinakugwanithwa  shomwiigandji omuwanawa naangoka a tokola, sha hala okutya omuntu owa hogolola oku shi taamba noku itula moshiponga tashi vulika shoku kwatwa nenge okudhipagwa, nenge omuntu owa li to vulu oku tinda . Ngame onda hogolola oku taamba oshilonga shika.Oshilonga shika osha li sha tegelela opo ndi dhikepo omikalo dha yooloka dha nkene tandi longele meni lyoshilongo no pwaana aaniilonga yomutondi ta ya dhimbulula ndje kutya ngame omukwiita goSWAPO. Omukalo gumwe gwaandhika oongoka goku konga egumbo mehala lina egameno  ndyoka tali pitike ndje opo ndi longe iilonga yandje nda fa ashike gumwe gwaantu yopomukunda ngoka. Onda li wo tandi vulu okuhokana ngele onkalo oya li ta yi shi pitika.Omakwatathano getu naawiliki yandje koAngola oga li ge na okupitila maayendi yopokati mboka yena okukala kombelewa yopashitopolwa, nongele osha ka pumbiwa ngame onda li ndina oku ya ko Lubango.   Oku ya ko Lubango omukalo gumwe ngoka nda mono kutya itagu piti oshoka otagu ka monikitha ndje mbala komutondi.Onda li ndina oku kala mekwatathano lyomeholamo, oku pitila momuntu ngoka  a pewa oshinakugwanitha shika, okweenda pokati ketu newiliko lyopombanda moAngola. Omukalo nguka gwombapila ya tulwa mokapakette ogwa li omwaanawa molwashoka  kapwa li pena etsakaneno pokati ketu  nomuntu ngoka , naashika  osha shonopeke onkalo yoshiponga.Ihe shoka sha simana ooshoka kutya ngame ondina okulonga mehala lyomalugodhi  onkene onda li ndina okudhikapo omakwatathano naantu aa inekelwa mehala moka nda li tandi longele.Aantu mbaka tuna ekwatathano na yo oyo ya li ye na oshinakugwanithwa sho ku kwatha ndje nkene tandi inyenge okuza pehala limwe okuya kehala ekwawo. Oya li woo oyo haya edhilile ndje, haya palutha ndje, haya pendje uuyelele kombinga yonkalo yegameno oshowo taya kwatha ndje opo ndi vule okumona oodokumende dhopashigwana ndhoka nda pumbwa  opo ndi kale tandi inyenge nawa nuupu moshilongo nondaa na uupyakadhi nomatanga  gaakwiita yomutondi.Oshilonga shotango shoka nda li nda hala okumanitha ooshoka shoku mona oodokumende dhopashigwana opo konima otandi vulu ihe oku tameka iilonga yandje mbyoka ndali nda endela. Opo ndi  vule oku adha shika omukalo gwandje gwokulonga  oshowo oondunge dhandje okupititha shika oya li yimwe yomashongo ngoka nda tsakaneke.Otandi zimine kutya nando onda li  nda dheulwa okulonga iilonga mbika ya shewa, kandina uunongo nontseyo kombinga yoshinakugwanithwa shika oshipe.Ihe uunongo nontseyo ndjoka nda likola manga  nda li miita oya kutha ndje uumbanda weso, molwashoka eso olya kala noku henuka ndje momalugodhi gamwe ngoka ga li omalulu twa kondja meni lyoshilongo pethimbo lyuukoloni.Onkene  ngame onda li wo ndi ilongekidha okutaamba oshilonga kehe shoka tandi pewa oku ka gwanithapo mondjila yoku mangulula evi lyoomeme Namibia.Ngame onda li nontseyo kombinga yoonkondo dhaakwiita yomutondi oshowo shoka mbaka haya vulu okulonga, molwashoka ngame onda longela meni lyoshilongo uule wethimbo ele.Onda tseya nkene mbaka haya ikongele aantu mboka ta ye ya gongelele uuyelele kombinga yomainyengo gaakwiita yoPLAN  oshowo aayambidhidhi yemanguluko. Pethimbo tandi lombwelwa ku hailwa Shikongo onda kala ndi shishi kutya  shika oshinakugwanithwa oshinene tandi tsikwa komapepe gandje kongundu yetu oku shi gwanithapo pehala lyaaNamibia mboka oyo ya li ta ya ka mona uuwanawa wemanguluko.Onkene onda koneke kutya shika osha li oshilonga tashi fala meso nenge okukaleka omuntu ena omwenyo.Kokutya ngame onda li nda fa tandi tumwa miilonga moka tashi vulika itaandi ka galuka nomwenyo.Ngame kandina esiku nda yaguma ndili mevi Namibia lya manguluka onkene onda li ndi ilongekidha oku gandja omwenyo gwandje okumangulula evi lyOomeme.Omalongekidho agehe sho ga pu onda li nda ithanwa  kombelewa ndi ka ganithilwe oshilonga shika .Onda gana memanguluko komeho ga hailwa Shikongo ngoka a li peha lyongundu kutya  otandi ka gwanithapo oshilonga shika nesimaneko oshowo pankondo ndhoka ndina no showo kutya otandi kala aluhe omwiinekelwa gwongundu.Onda gana wo kutya kandina nando esiku tandi ka hokolola iiholekwa kombinga yetumo ndika komuntu , kutya nee ngele pamwe onda  kwatwa kaatondi pethimbo lyoshilonga shika moNamibia.Okuuka pehulilo lya Kotoba 1984 onda li nda lombwelwa ndikale ndi ilongekidha oku ya moNamibia oku ka tameka oshinakugwanithwa shika.

LEAVE A REPLY

Please enter your comment!
Please enter your name here