Sigo uunake tatu lili aana yetu aakadhona?

0
301

Osigo uunake tatu kala noku lesha kombinga yaalumentu mboka ya dhipaga aaholike yawo yo taya idhipaga wo yoyene? Shika nashi pulwe wo aakalekipo yompango , mboka olundji oyo ha ya thiki tango piiningwanima mbika kutya oha ya ningi po shike tuu?Oha ya konakona tuu  oku mona kutya osheetithi shedhipago oshike, nenge shika oha ye shi talako ashike ongo limwe lyomomadhipago gaaholathani?Miiningwanima yimwe ngaashi mwaashoka shopOshatotwa oshiwike shika, omuntu ngoka okwa thigipo omushangwa gweidhipago moka a nyolamo kutya shika okwe shi ningithwa koshike. Onkene olyo ethimbo opo opolisi  yi holole puuyelele oshikalimo shomishangwa ngaashi ngoka, ngele itashi vulika opolisi nayi vule okulongitha uuyelele mboka momushangwa ngoka  noku konakona opo yi etepo iikonga yokulonga mboka yeli momakwatathano gohole.

Otwa pumbwa oku uvako omatompelo ngoka ga thiminike noshowo guundula mboka nenge aantu mboka ya dhipaga aaholike kadhona yawo oshowo konima oha yi idhipaga, otatu vulu ashike oku tseya noku ilonga sha ku shika uuna pwa ningwa omakonakono gomuule noguukeka konkalo ndjoka ya fa la sigo omedhipago nomeidhipago.Uuna ndoka twa tseya shika nena opo  ihe tatu vulu okuninga iikonga moka aanambelewa yonkalonawa naamboka yokukalekapo oveta nelandulathano taya vulu oku ya moshigwana noku hokolola kutya shika osho twi ilongo okuza miiningwanima ya piti, tu kwatheni  opo twi ilonge okuza  komapuko ngaka opo ngaka twaa ga endulule we.

Mokupulakena kElenga enene lyelelo lyOmuthigululwakalo gwAambalantu, Tatekulu Oswin Mukulu, sho a popi pOlufuko oshiwike shayi oto mono nkene oshigwana shuuvite shaana oonkondo okuningapo sha.Ngiika okushuna komidhi dhetu nokonziililo yetu osho ompito yimwe okupalamena oshinima shomadhipagathano gaantu yeholathane.

“Monakuziwa aalumentu oya li haya endele aakiintu nenge aakadhona ndele oya li ha ya uvuko uuna omukadhona a ti: ‘Onda dhiladhila muule noneitulemo kombinga yoohapu dhoye, ihe onda mono kutya ngoye ha ngoye omulumentu woopalela ndje.’ Tse ngele twa lombwelwa ngaaka ka twa li twa dhipaga aakadhona, ndele shoka twa li hatu ningi oku uuka komeho noku konga ishewe omukadhona gulwe.Omolwashike ano aalumentu yonena ta ya dhipaga? Oshikwawo momagumbo oomeme ota ya mono oyana yaakadhona ye na iinima oyindji ngaashi oongodhi dhopeke oombali oshowo yilwe yondilo , mbyoka omugundjuka itaa vulu okufatulula kutya okwe yi adha peni, ihe aakuluntu ihaya pula kutya mbyoka oya zi peni. Aanona oya pumbwa okulongwa ya kale ya gwana naashoka  yena momagumbo gawo,” osho Mukulu a ti.

Eeno otwa pumbwa shili okuuvako kutya omolwashike iiningwanima mbika hayi holoka nokuningwa, oshikwawo omolwashike tayi tsikile okulongwa.Okudhipaga kuume koye nangoye mwene osha fa sha ninga oshaanawa nenge tu tye shili ‘momode” okulongitha oshitya sha hehelwa, omukithi gogwene tuu gwaadha oshigwana.Osho, kutya omaupyakadhi nando na ga kale momakwatathano geni gopahole ngoka ka ge na oku kandulwapo mokuyuga mukweni omwenyo ngoye to kanithako goye.Otwa ninga oshigwana sha kanitha esimaneko lyondilo yomwenyo nuuyapuki womwenyo.

 

LEAVE A REPLY

Please enter your comment!
Please enter your name here