Taya indile aagundjuka ya ulike iipewa yawo

0
260

 

ONDANGWA  –  Ongundu yoonekandangal lyombandje ndjoka yi imanga kumwe mokundanisa oshowo oku imba otayi tsu omukumo kehe omugundjuka a kale noku ulike oshipewa she, ye a ninge shoka ehole monkalamwenyo.

Aamati mbaka yeli konyala yahetatu (8) oya tameke okwiimba mo2010, nonande okuhika oongalo hasho naanaa oshipewa shawo, oyi ikwatelela unene mokundanisa. Ongundu ndjino oya yambukile mOndangwa yaShinime Shiivula na omo haya idheulile olundji.

Asheela Eliazer a tseyika nawa Licks okwali a tseyitha kutya oyali ya tameke owala yeli ya 4 mono ongundu yawo ya ende tayi koko. Aamati mbaka ohaya ithanwa LBHT Crew shono sha thikamapo mo Local Boys Hangs Together. Oyeli mewiliko lya Sandro Ithana omutotipo goKashipu clothing brand.

“Otwa tamekele owala shafa omashendjo sho twa kala hatu idheula owala mepandaanda lyaShinime, oyendji mboka yepipi lyetu oya kala taye tu sitha uunye nokutu sheka kutya itatu vulusha ashike shino inashi tu sitha uunye otwa kala noku ulika iipewa yetu, otwali woo twa tsuwa omukumo koDHP Crew, Alaska Fresh,Terrorn Squad, fresh family opo tu tsikile tse tu ulike uunongo wetu mboka tuna,” Licks ta ti ngaaka.

Ronald Mutota ngoka hi ithanwa Heavy okwa gwedhapo kutya oyali ya nyanyudha aatali lwotango posikola poHeroes mOndangwa muJanuary gwo2011. Tati aanaskola oyali ya nyanyukwa moku tala ongundu ndjika tayi ndanisa noku ulika oshitalenti shawo. Ongundu ndjika oya koko nawa. No haya nyanyudha unene piituthi yomaludhi ga yoolokathana oshowo peeshowo momudhingoloko gomOndangwa nopoondoolopa dhopuushiinda.

Ongundu ndjika oyali woo ya recording okangalo kawo kotango hono taka ithanwa Stronger hono ta ka kumike aagundjuka ya kale yena oonkondo nomukumo ethimbo tayi iyadha yeli muudhigu yo ya kale yena einekelo. Oyali woo ya ulike oshipewa shawo kuyele nuumvo koTsumeb hono yali inaya thiga emanya lya londa kekwawo. Taya gwedhapo kutya nonande taya nyengwa kompumbwe yoshimaliwa otaya longo ngaashi taya vulu nokuhumithakomeho oongalo moshilongo.

LBHT okwa tegelelwa a kanyanyudhe aapulakeni  mehuliloshiwike ndika pepititho lyo albuma yo Young Kasi pEkamuti mOndangwa. Taya indile aatali yeye ya tale yo ya ondodhe omeho. Oya indile aahikingalo aaNamibia ya longele kumwe yo ya kale noku paathana omayele nuunongo mwaayihe ya pumbwa mokuhika oongalo.

 

LEAVE A REPLY

Please enter your comment!
Please enter your name here