Egumbo lya kuku Shikoko lya hanagulwapo komulilo

0
405

 

EENHANA – Egumbo lya kuku Kaunawoye Shikoko momukunda Onambutu yaKanana kaNghishoono moshikandjohogololo Eenhana olya thigwa pomutenya pamwe noyana naatekulu, konima sho ndika lyapipo komulilo komatango gOlyomakaya gaziko.

Omwana gomukulupe nguka, Ester Simon okwa hokolola kutya omulilo ngoka ka gu shiwike kutya ogwa zi peni. Ta hokolola kutya okwa li eya a talelepo yina mEtitano lyaziko, nomOlyomakaya komatango sho ali ti iyogo ando a shune komukunda gwawo kOshilago,okwa mono omulilo gwa yaka kombanda yokahaka.

“Omulilo ngoka ogwa tameke kokahaka koshigandhi shimwe shoka shali shaanasha, tagu ihanene gu uka kiigandhi iikwawo, tagu tameke ihe tagu nukile koondunda adhihe megumbo sigo gwa kwatathana niiti, no ya li tayi pi ya fa ya tulwa omahooli,ogwa yi egumbo alihe oshoka okwa ombepo,” Simon ta ti ngaaka.

Kuku Shikoko ngono a adhika eli konima yondunda yimwe ta tete onyama nuutekulu we, mokumona omulilo okwa li ayi mondunda yokupungula andola a kuthemo iikwatelwa yimwe mbyoka ali inaa hala yi pye, no kali ena sho a pondolapo okwa ka pilamo owala. Okwa pya ombinga yoshipala nokomaako, nongashingeyi ota mono epango moshipangelo shEenhana mono a langekwa moombete. Omwana ngono Simon na ye ali woo apya okwa yakulilwe koshipangelo kEenhana nopethimbo ndika oha ka mangululwa kokapangelo kOnambutu.

“Megumbo muno omwa pila omaliko ogendji,iigandhi ine mono itatu ayihe yali yina iilya ,oondoloma dhomakunde niilyaalyaka,oombete ,omatalashe niinima ayihe konyala yomegumbo oya pilamo no katuna we shoka tuna,otwa kwathelwa kombelewa yaKansela gwetu etu pe uushako wuusila noondooha dhoohi ndhoka hatu li omasiku ngaka,” Simon ta gwedhapo ngaaka.

Simon ta indile koshigwana oshiholike shi ya yambidhidhe mompumbwe yawo ndjika yena. Ta ti ota pandula Kalunga sho inaamu sila omuntu nonande yali yapya ota ti okuna omukumo kutya yina ngoka eli moshipangelo ota aluka,ta ti otaya galikana opo Kalunga aaludhe yina.

Kansela gwoshikandjohogololo Eenhana Nehemia Udeiko Haufiku ota ti okwa gumwa unene kiiponga yomililo tayi lopotwa moshikandjo hogololo she, onkee ota pula aakwashigwana opo ya kale noku kwathelathana uuna ya adhika komaudhigu ga yooloka.

“Iiponga yomililo ohayi eta unene oluhepo nonkayi momagumbo, mo miikandjohogololo yetu ka muna nande omakwatho yambidhidho ngele tashiya kiiponga yoludhi nga nduka,otatu indile aasamalia ya kwathele aakwashigwana mbaka mompumbwe ndjoka yi iyadha yena noya pumbwa oku kwathelwa meendelelo ya vule oku thikamithapo egumbo lyawo,” Udeiko ta ti ngaaka.

Ku kehe ngoka ta vulu oku yambidhidha omukulupew nguka pamwe naanegumbo lye, otaya vulu ku monika koongodhi ndhika Ester Simon omwana 0818405524 nenge meme Paulina ko 0814081777. Taya pandula unene.

Destroyed Destroyed1

 

 

LEAVE A REPLY

Please enter your comment!
Please enter your name here