Peter Ondume yomomufitu: Miilonga yomeholamo moNamibia

1
402
Peter Jungle Fighter

 

Onda longela meni lya Namibia okuza omumvo 1978 sigo 1983 ongo omukwiita gwoPLAN ndi ilongekidha okukondjitha aakwiita yomutondi. Ihe mu Kotoba 1984 ngame onde ya moNamibia inaandi homata , nde ya netumo lyiilonga ya shewa iilonga yomeholamo nomonanguwi. Onda thigilepo oombelewa oonene dhuukwiita dhoPLAN dhoshitopolwa ndhoka dha li moLubango. Onda zi poombelewa ndhoka molweendo luli miihauto, twa ende nondjila pokati komikunda gwa Zamba nOndongo . Onda li ndeende pamwe naakwiita  yoPLAN yeli lwopaantu omilongo mbali, ya li mewiliko lya Kayambu Amupolo ngoka pethimbo ndyoka a li  omukuluntu gwopashitopolwa miilonga yoku gamena omahala naakiiwta kiiponokela yomombepo, moshitopolwa shokUumbangalantu. Omahauto ngoka twa li twa londa mugo oge tu fala sigo opoombelewa oonene dhopashitopolwa ndhoka dha li konyala ookilometa 25 kuumbugantu wa Cuvelayi moprovinsa ya Cunene. Sho oshilando shika Cuvelayi  oshili konyala ookilometa dhili omilongo 40 kuumbugantu woTjamutete , ondoolopa yoomina, omanga ndjika oyili konyala ookilo 25 kuumbugantu womukunda gwa Cassinga.

Molweendo lwetu nomahauto gopakwiita ngoka gaali okuza koombelewa oonene dhoshitopolwa sho kuumbangalantu. Olweendo lwetu olwetu kutha omasiku gatatu. Otwa thiki poombelewa dhili konyala oshinano shaashi oshile unene okuthika mpoka.Otwa thiki pehala mpoka pethimbo aakwiita yomutondi ya South Afrika ya li ya hanyeka iiponokela yawo muumbugantu wAngola . Utya otwa thiki poombelewa ndhoka pethimbo aakwiita yomukolonyeki ya li ya kwatako noku kala nokuli miitopolwa yimwe yomoshitopolwa sha Cunene. Olweendo lwetu  okuza komukunda Ondongo otwa li twa tsakanekwa komvula oshowo twa ende momakuti ga thita niihwa ya lundalala. Mo mumbika omwa li muudha  aakwiita ya Unita oshowo iifekela kwiita yetanga lya South Afrika mbyoka ya li hayi  longithwa ya fa aakondjelimanguluko ndele yo mbaka oya li aakwiita yomutondi haya longo ye li konima yoontanda dhaakwiita yoPLAN.

Molweendo lwetu otwa li wa twa humbata omitenge omidhigu dhoondembjo  oshowo iipumbiwa yilwe yopakwiita mbyoka twali tatu faalele iitopolwa nenge oshitopolwa shoka.Sho twa thiki poombelewa dhoshitopolwa, ngame onda falwa kehala lya shewa pondje yoombelewa dhaakwiita dhoshitopolwa, mpoka nda kala uule wiiwike iyali omanga inaandi ka ya mela lyondjila onde oku ya moNamibia.

Pauyelele mboka ndapewa kukommanda gwopehala mpoka  ngoka inaandi dhimbulukwa edhina lye , onda li ndina oku thindikilwa kaakwiita yatatu yiilonga yuundaadhi. Mbaka oya li yena okuulukila ndje ondjila mpoka ndina okweenda. Oya li ishewe yena okufala ndje paantu yamwe moNamibia nokuulukila ndje mpoka ndina okweenda, molwashoka ehala alihe moka hamu kondjelwa iita olyuudha  aalongithwa yomutondi oshowo mboka haya longele kumwe naye.Oombelewa dhuukwiita  dhopashitopolwa muumbugantu wAngola otwe dhi thigipo mu Desemba 1984 twa taagulukile moNamibia okupitila pOdibo yooNgulu.

Otwa ende uule woshiwike okuthika komikunda Ehafo nOshipumbushomugongo kuumbugantu wOshakati. Pehafo onda tseiyithilwa nokutsakaneka omusamane Kaspir Amutse na meme Enghono Justine, mbaka yaali oya li aalongisikola poprima sikola Ehafo.Poshipumbu shOmugongo  onda tseya omusamane Simon Daniel nomukulukadhi gwe meme Ailly. Aantu mbaka oya li ya kwathele ndje noonkondo miilonga yandje okulonga  moshitopolwa shoka nopondje yasho.Aantu yalwe ya simana mboka nda tseya oyo nakusa hailwa Jacob Shifula nomukulukadhi gwe  nakusa Meme Maria nelenga enene  lyomukunda Elyambala , Tate Kayupa Mwatotele . Nguka okwa li a longo oshilonga sha simana noshinene sho a kwathele ndje opo ndi imonene okamutse koshilongo okuza kOombelewa dhuumutse  pOndangwa. Okwa li wo a kwathele ndje opo ndi ye koWindhoek inaandi konenenwa nando okulye.

Petameko onda li handi longitha edhina Philipus Matheus  miitopolwa yokuumbangalantu  wopate pokati kOshakati  nOshivelo.Omanga edhina lyandje kwaamboka ye li kuumbugantu wondjila oyo tuu ndjika olya Frans Amutenya.Ngaka oga li omadhina goku igamena , oku holeka uukwatya wandje woshili, mokati koshigwana, mwa kwatelwa naatondi  yandje oshowo mboka haya longele aakwiita yomukolonyeki. Konima sho nda ka mona okamutse ngame onda kala handi  longitha edhina Philipus Matheus.

Konima yokukala oshiwike shimwe moNamibia onda ka shuna koAngola nonando inandi thikako koombelewa oonene, molwashoka onda li ndina okushuna  mbala  moNamibia oku ka tsikila iilonga .

Ngaashi sha li shuuvathanwa kuyele na Hailwa John Mupupa otwa tsakanene pOihole, mpoka twa kundathana nkene tatu kala  mekwatathano ewanawa ndyoka itaali tu tula moshiponga. Out uvathana kutya otatu longitha omakwatathano gomeholamo uuna sha pumbiwa. Oshitiyali otwa uvathana opo tu ka tsakanene ishewe konima yoomwedhi  ndatu heke , opo tu paathane uuyelele kombinga yaashoka sha longwapo.Eshongo enene ndyoka ndali nda taalela miilonga yandje  oondyoka lya nkene tandi imonene okamutse koshilongo pethimbo ndiyaka no inaandi itula moshiponga sho ku kwatwa.

Otwa li tushishi nawa kutya aaniilonga ayehe mboka haya  longele moombelewa dhuumutse oya li iilongitho yaSouth Africa. Onkene osha li tashi vulu okuningwa kutya ngame otandi vulu okukwatwa pethimbo ndyoka tandi ka konga okamutse kandje. Ihe oshiponga shoka ndali tandi vulu okugwila musho osha li tashi ikwatelele ku nkene ngame tandi longitha uunongo mboka nda longwa mosikola yiilonga yomeholamo.Oodokumende ndhika odha li dhina oshilonga oshoka odho dha li tadhi vulu okupititha ndje ndi ye kiilando muumbugantu woshilongo.Konima yetsakaneno lyetu na Hailwa Mupupa ngame inandi vula oku kutha ondjembo yoAK-47 ihe onda kutha ashike ombistoli yo Makarov molwashoka ka kwali ndina uuthemba wo ku humbata ondjembo, onda li ashike nda pitikwa oku humbata ombistoli  moompito dhimwe opo ndi vule okwiipopila.

1 COMMENT

LEAVE A REPLY

Please enter your comment!
Please enter your name here