SuperSport’s ta kongo elongelokumwe nomaudhano mo Namibia

0
292

 

Bel Ombre- Mauritius – Omuwiliki gweetepo lyopolograma yomaudhano yoSuperSport., Alvin Naicker okwa indile aawiliki yomaudhano moNamibia  opo yeetepo omathaneko ngoka taga fala melongelokumwe monakuyiwa. Okwa ti elongelo kumwe ndika ota shi vulika li fale sigo oompoka kutya omaudhano goliha yoPombanda ya Namibia otaga kala taga ulikwa koSuper Sport tiivii.

Naicker, ndhika okwe dhi tomona pethimbo lyomatseyitho go SuperSport’s Media Roundtable kohi ya MultiChoice Content Showcase pohotela The Outrigger Hotel & Resort, koshilongo ntuntu mefuta lyaIndia, Mauritius. Okwa ti yo oya kambadhala oku kwatathana newiliko lyoliha ya Namibia NPL kombinga yethaneko ndyoka  ndele ewiliko lyoliha ya Namibia anuwa olya ndopa okuya moonkundathana.

Ihe okwa ti okuna omukumo kutya ota ya ka adha etsokumwe no NPL monakuyiwa , ngaashi pethimbo ndika yo ohaya ulike omaudhano gooliha mo Zambia na Zimbabwe.

Ehangano ndika enene mokutuma omaudhano mombepo kotiivii menenevi Africa, nomuwiliki gwakwalukehe gwalyo mUumbugantu wAfrika, Graeme Murray okwa ti ndika olya mona iizemo yi shi okwi itangelwa  omimvo dha piti. “Omumvo 2006 otwa li twa tumu aatoolinkundana 26 ko Abudja Nigeria oku ka tuma uudhano wetanga lyokoompadhi mOmbepo. Nena ndjika tse otuuvite etumba oshoka aaniilonga yotiivii yetu mboka haya thaneke omaudhano moNigeria ayehe oomvalele dha Nigeria oshowo dha Ghana,’ osho a ti.

Murray okwa ti okukala ye na omakwatathano nooliha dhuudhano wetanga  otashi ulike nkene omaudhano ga koko  menenevi ndika. “Otwa tamekele okulonga noliha ya Nigeria Premier League omumvo 2006 nelongelokumwe ndika olya koko nawa nokunkondopala. Otwa yi sigo okutuma omaudhano mombepo goliha ya Nigeria Super Eagles’ League oshowo oliha yobasketball ya Nigeria, ndhika adhihe mbali otadhi ende nawa okuza mpoka sigo onena. Otwa kala hatu longele kumwe noliha ya Kenya Premier League okuza omumvo 2008 naandjoka yaGhana League okuza omumvo 2012. Omanga inaatu longela kumwe noliha ya Kenyan kapwali uudhano woshilongo shoka hawu tumwa mombepo kotiivii uule womimvo omulongo, nongashingeyi oliha ndjika otayi humu nawa komeho.”

Omathimbo ngaka SuperSport okwa koleke euvathano noliha ya Zambia ndyoka tali kala noonkondo uule womimvo ntano noku kala tatu ulike omaudhano  goliha ndjika oshowo omathigathano gomakopi  kotiivii yo SuperSport .

Super Sport ota  ka dhikapo ochannela ndjoka tayi kala noku ulikwa okuza moZambia ta yi popi kombika yooliha menenevi.

Naicker okwa ti osha simana omawiliko guudhano ga longele kumwe na SuperSport. “Tse ihatu futu ashike iimaliwa opo tu mone uuthemba woku tuma omaudhano ngaka mombepo, tse otatu yi ngele shoka sha pu aawe tse otu na omakwatathano ngaka twa hala ga kalele. Otwa hala pu kale elongo okuza koombinga adhihe . Otwa hala okuuvako oohedhi dhoshilongo moka tatu longele, ethimbo uudhano hau tameke, uupale wuni ihawu longithwa  nomolwashike. Otatu tulapo embo lyokuulika omaudhano tatu lipe aawiliki yooliha  oku ya kwatha noku ya longa nkene etumo mombepo hali longo noku nwethamo elongekidho lyomaudhano, oshowo ethimbo lyago. Otwa hala okutunga po euvathano nelongelokumwe lyesindano muule wethimbo,” osho a ti.

Okwa tseyitha wo kutya oya pewa uuthemba wokutuma mombepo uudhano wOlympic ku Afrika omumvo tuuka okuza koRio De Janeiro, Brazil. “Otatu ka kala noochanela dhili hamano ko SuperSport ,” osho a uvaneke.

“Otatu ka kundaneka uudhano kehe moka muna omudhani omuAfrika ta vulu okusindana ombandi yasha,otatu kala naaniilonga mboka ya landula  oospana dha Afrika puudhano mbuka. Na otwa tameka nale nookuli  okutsakaneka  oospana dha Afrika okupula kutya aadhani yenipo yewete taya ka sindana oombandi opo tu tameke nale oku ya shangela omahokololo pethimbo lyuuka manga uudhano wOlympic inau tameka.”

“Otuuvite uuntsa okukala otse yamwe dhingi moku tuma omaudhano mombepo menenevi, na otandi dhiladhila kutya tse otse woo yamwe ookapopyoko mokutuma uudhano mombepo motiivii muuyuni auhe.,” osho Naicker a ti. Mokulongitha aanamadhina yAfrika ngaashi Sammy Kuffour oku topola ontseyo yawo  nuunongo  shika otashi kwatha okuhumitha komeho omaudhano noku ga fala pondondo yopombanda moshilongo kehe moka, SuperSport ta longele oku hwameka ombepo yepapudhuko muudhano moAfrika, sho tatu falal omahokololo guudhano menenevi muuyuni auhe.”.

Omutse gomalanditho mo SuperSport, Motheo Matsau okwa gwedhako a ti ekoko muudhano moAfirka olya pumbwa oku tseyithwa, oshowo oshikalimo shuudhano shoshene. “Ngele kapena ngoka ta mono nenge ta uvu kombinga yiiyetwapo  mbika nena shika otashi kakala osima yowala,” osho a ti.

 

LEAVE A REPLY

Please enter your comment!
Please enter your name here