Ya dhana nokwiilonga omithigululwakalo poHD

0
424

 

ONGWEDIVA-Oseko yopevi ya Hans Daniel Namuhuja oya li ya longekidha esiku lyomuthigululwakalo penongelo ndyoka oshiwike sha ziko.

Omukuluntusikola po HD Namuhuya ,Eliud Shipena okwa ti elalakano lyoshituthi shika okulonga aanasikola oohedhi dhoshilongo shika noshowo okusimaneka omithigululwakalo dha yooloka .

Okwa ti shika oshi li oshikando sho tango oku unganeka esiku ndika na limwe  lyomomalalakano olyo okulonga aanasikola esimano lyomuthigululwakalo noshowo ongushu yagwo.

“ Otwa hala okulonga aanasikola ayehe ngele tashiya komuthigululwakalo ya mone kutya keshe oshitunda nohedhi oshilongo nomukalo gwasho nonando aaNamibia oyeli ashike yamwe,” omukuluntusikola a tangumuna ngaaka.

Shipena okwa ti nonando omwaalu ogundji gwaanasikola ogwaanona mboka ya nika oluhepo noothigwa okwa hala osikola yi kale yi na ashike ombepo yimwe naa shika otashi ningwa ngele aanona ya longwa oohedhi dhoshilongo okupitila momuthigululwakalo.

Okwa ti ngashingeyi oshilongo shetu osha pikwa kombepo yomahepeko gaakiintu naanona noshowo omadhipagathano moohole naa shika osha etithwa ko kwaa simaneka omithigululwakalo hoka taku koko maanona oshowo maagundjuka.

Shipena okwa itaala kutya omuthiguluwakalo osho okutseya ongushu yokukalamwenyo yomuntu kehe nokusimaneka oku kalapo kwomunamwenyo kehe kutya oku kale ethike peni.

Naashika otashi pondoka ashike ngele aanona ya putudhilwa omikalo omiwanawa nelandulathano oku isimaneka oshowo okusimaneka yalwe, nelongo ndika ohali tameke megumbo , yo osikola tayi tsikileko.

Okwa ti esiku ndika olya nuninwa woo aavali opo yo nayo ya ngushupaleke omuthigululwa kalo yo ya ndungike aanona momukalo ngoka.

Omukuluntusikola okwa ti shika otashi kwathele wo aanona ya vule okukuthako eilongo lyawo lya simana ngele yatseya oohedhi nomuthigululwakalo gwoopala.

Ota ti aanona oyendji oya kanitha woo omikalo oshoka kaye na ontseyo yesimano lyomuntu kehe.

Osikola ndjika oya  totelwe momumvo 1972, oyina aalongisikola yeli 34, aakuluntu yiilongwa posikola yeli yane noshowo aanasikola yeli 845 .

Osikola ndjika kayi na omuhandjo na Shipena okwa ti shika oshili eshongo enene lya taalela osikola.

Aanasikola posikola mpoka oyali ya zala iikutu yomuthigululwakalo mwa katelwa woo aalongi. Oseko ndjika oya lukilwa omutaleliskola osho wo gumwe gwomaakokoli moshimpungu shelongo muumbangalantu woshilongo nakusa Hans Daniel Namuhuya.

LEAVE A REPLY

Please enter your comment!
Please enter your name here