Aanaskola lundululeni

0
352

 

ONTINDA  – Omukuluntuskola poskola yopevi pOkaku, Hofeni Lukas okwa indile aanaskola ya lundulule omaihumbato oshowo omikalo dhawo. Lukas ndhino okwe dhi popi Etitano lyaziko pegandjo lyomapapa poskola pOntinda moshitopolwa shaShana.

Lukas okwa popitha aanakola mesiku lyawo mono a holola kutya aanaskola oyendji oya kanitha omikalo no ina ya hala oku vulika kaakuluntu komagumbo oshowo kaalongi koosikola. “Otwa koneke uunona wopethimbo ndika inaawu hala oku pulakena komalombwelo gaakuluntu na aluhe ota wu yamukula aakuluntu yawo ngaashi wa hala, ashike shino kashina nande elago lyasha,” Lukas ta londodha ngaaka.

Omukuluntuskola nguka okwa kumike woo aanaskola yi itulemo miilongwa yawo, yo ya kale aluhe haya pula ekwatho ku Kalunga eya kwathe meilongo lyawo. Okwe ya kumagidha ya yande elongitho lyomalovu niingangamithi manga yeli moosikola , yo ya kale aanaskola aatiliKalunga, yo ye na esimaneko.

“Yandeni ookuume mboka yena omanwethemo omawinayi, ngoka ta ge mu fala momamakelo nomiinima mbyoka iiwinayi, kaleni kokule niinima yiihulo ne mu kale mwi isimaneka ne ye ne, vulikeni kaakuluntu yeni,otandi mu halele oonkondo nomukumo meilongo lyeni ne mu ka kale muna oonkalamwenyo dheni dha yela,” Ta tsikileko ngaaka.

Esiku ndyoka aanaskola mboka ya longa nawa poskola pOntinda oyali ya pewa omapapa noonzapo shi ikwatelela kiilonga yawo. Omulongiskola nokuli gumwe gomaa unganeki yesiku lyegandjo lyomapapa Loini Ashipala okwa li eshi yelitha kutya shino oshikando oshitiyali ta ya gandja oonzapo kaanaskola mboka ya longa nawa poskola mpoka.

“Shino ohatu shi ningi nelalakano  opo tu kumike aanaskola yetu yi itulemo meilongo lyawo, tse ta tu pe mboka ya longa nawa olupandu ngaashi yeshi ilongela, ohatu gandja woo olupandu kaavali mboka oyo ookadhenga nohaya longo iilonga ya simana melongo lyaanona yawo oshowo sho yena oshimpwiyu oku tuma aana yawo komanongelo,” Ashipala ta ti ngaaka.

Frodina Uukongo eli mondondo onti-2 okwali a thigipo ayehe mboka yeli mondondo yotango sigo ontine , omanga Martha Simon gomondondo onti-5 okwali a thigipo ayehe mboka yeli mondondo onti-5-7. Joel Kamwangha ngoka eli mondondo onti-10 okwali a ulikwa oye omulongwadhingi posikola ayihe yaNtinda. Joel okwa kangele ayehe nokwa ulike eitulemo lye miilongwa ye ayihe yoskola.

Aanaskola aanamikalo na yo oya li ya pewa omapole naamboka woo ha ya dhana omaudhano ga yooloka oya li ya pewa oonzapo noku kumikwa ya longe nuudhiginini yo ya tule elongo komeho ga ayihe. Aavali oyendji oyali ya holoka ya ninge oombangi noku tala omaluvalo gawo nkene taga pewa oonzapo oshowo shoka yi ilongela.

LEAVE A REPLY

Please enter your comment!
Please enter your name here