Elongo i hali kokelwa

0
326

 

OSHIYA  –  Omumati omugundjuka gwomimvo24 okwa holola enyanyu lye omolwa elongo lyaakuluntu ndyono ta ti olyemu longela uuwanawa owundji monkalamwenyo ye, mbono a li  inee wu mona poomvula dhopetameko.

Lucas Profiliu okwa li a gandja ehokololo lye oshiwike sha ziko sho kwa li taku dhimbulukiwa esiku lyelongo lyaakuluntu muuyuni auhe. Profiliu okwa holola enyanyu lye oshowo a tumbaleke elongo lyaakuluntu moshilongo ndyono a ti olya egulula ompito ye opo a kale a tameka enongelo ndyono a li inaa monena ompito manga ali omushona.

Profiliu okwe shi yelitha kutya okwa kala owala eli megumbo ta takamitha iimuna na inaya kosikola ngaashi aanona oyaakwawo. “Onda kala ndina ohokwe yokuya kosikola ashike molwaasho oomvula dhandje odhindji unene onda kala ndina uumbanda kutya pamwe otandi ka yolwa kaanona ooyakwetu ngele nda tameke oskola,” Profiliu ta ti.

Mo-2006  manga ena oomvula 15 okwa li a tokola opo a tameke osikola yelongo lyaakuluntu ye a longwe okushanga oshowo okulesha hono a li  ta nyengwa. “Onda longwa uule womvula ayihe mono nde ki iyadha nda pyokoka okushanga nokulesha ndi vule aalongwa aakwetu,onda piti iilongwa yandje ayihe nomulongi gwandje okwa li kumike ndje opo ndi tameke ootundi dhongulonene mo 2007, onda tameke mondondo ontitatu mono nda kala handi piti nawa omakonakono gandje agehe,” Ta gwedhapo ngaaka.

Nonande ali a tameke osikola ena oomvula 16 shino inashi mu shololitha okwa li itulamo melongo lye sigo a piti, nomumvo gwaziko okwali a shanga ondondo onti-10 poskola pOshiya mono a yambukamo niitsa 33, nokuli ngaashingeyi mondondo onti-11 pOntananga.

Profiliu ta ti elongo lyaakuluntu olyemu kwathela a humithe komeho onkalamwenyo ye, noku uvite etumba, ta ti omolwa elongo lyaakuluntu sho e na eitulemo melongo lye. Ta pandula Uuministeli wElongo nomithigululwakalo sho wa totapo opolohalama yelongo lyaakuluntu opo kehe ngoka ta nyengwa a longwe okulesha oshowo okushanga.

“Otandi indile aalongwa ayehe yelongo lyaakuluntu ya longe neitulemo nonuudhiginini nonande na ya kale yena omashongo ina ya sholola oshoka uuwanawa auhe owu li komeho,onda hala ndi ka ninge omulongiskola ngele nda mana eilongo lyandje ngame ndi ka taandeleke etumwalaka kaanaskola, nokuya ulukila ondjila ndyoka nde enda,onkalamwenyo yandje ngaashingeyi oya ninga ompu naashino otandi shi gandjele olupandu elongo lyaakuluntu ndyoka lyeeta ndje ponkatu mpaka ndili nena,” Profiliu ta tsikileko ngaaka.

Omukuluntu gwelongo moshitopolwa shaShikoto Lameck Kafidi okwali a tseyitha kutya moshitopolwa shika omuna aanaskola oyendji mboka yaza melongo lyaakuluntu nongashingeyi yamwe oya mana ootundi no ta ya ilongo kiiputudhilo yopombanda. Kafidi ta indile ayehe mboka yena ehalo yi ishangithe melongo lyaakuluntu yo ya longwe okulesha nokushanga manga puna ethimbo, ta gwedhapo woo kutya elongo iha li kokelwa.

LEAVE A REPLY

Please enter your comment!
Please enter your name here