Iimaliwa yomahumithokomeho ota yi ti shike kiitopolwa?

0
354

 

WINDHOEK-Oshipambu shimwe shiimaliwa ya nuninwa ehumithokomeho mbyoka ya pewa Oshikondo Shuukalinawa Nonkalonawa omumvo gwembo lyiimiliwa nuumvo, yimwe ota yi ka tunga oshipangelo shopadistirka moondoolopa yOndangwa moshitopolwa Oshana. Omwaalu gwoomilliona ooN$20 odhi ikalekelwa nuumvo oku tameka netungo lyonaasalesa ndjika, omanga omutengeneko gomumvo ta gu ya ogwa thenekelwa poomilliona dhooN$30 million, nuuna oshipangelo shika tashi ka pwa okutungwa oholomende noshigwana ota ya ka kala ya longitha konyala oomilliona dhooN$100,400 kumwe adhihe.

Omakonakono gokutya etungo ndika otali vulika oga manithwa nale nopethimbo ndika Oshikondo shika oshiipyakidhila ashike noku opaleka ehala oshowo okuli tula molugumbo mpoka tapa tungwa oshipangelo shika.Omanga omathaneko omanene goshipangelo otaga longekidhwa noku tendwapo.

Uuyelele mbuka owu li membo enene moka mwa shangwa iimaliwa mbyoka ya yoololelwa ehumokomeho moshilongo pethimbo lyembo lyiimaliwa okuza omumvo gwiimaliwa 2015/16 sigo 2017/18.

Uundjolowele owa ti oshipangelo shopOndangwa “osha tegelelwa shi hwepopeke  egandjo lyomayakulo taga endelele oshowo oku eta omayakulo ga shewa guundjolowele ngoka ethimbo ndika ga pumba.”

Oshipangelo shopamuthika gwodistrika mOndangwa otashi kala oshitiyali sha gwedhwa kwaashoka shomOshakati moshitopolwa Oshana.

Omwaalu omunene gwoomilliona ooN$698,815 gwomutengenekothaneko gwelongitho lyiimaliwa moshikondo Shuukalinawa nOnkalonawa membo lyomumvo 2015/2016 otagu longithwa oku opaleka  uupangelo uushona oshowo iipangelo miitopolwa sha Kunene, Hardap, Omusati, Omaheke, //Kharas, Kavango Uninginino oshowo Oshana.

Iimaliwa mbyoka oyo mumvo ashike gwiimaliwa 2015/16 naambika otayi ka ya pombanda sigo opoomilliona dhoo N$714,909 membo lyiimaliwa yomumvo 2016/17 oku futila iilonga yomaopaleko mbyoka ta yi tsikile okuyambulapo oshowo oku opalekulula iipangelo.

Andara, omukunda ngoka gu shiwike ashike kwaamboka yomoshitopolwa sha Kavango Uzilo ogo omudhingoloko gumwe moka muna oshipangelo sha pumbwa eopaleko. Shika otashi ka opalekwa membo lyiimaliwa yomumvo 2015/16 kohi yomutengeneko gwembo lyiimaliwa ye yo komeho lyopashigwana lyongashingeyi.

Omwaalu gwoomilliona dhooN$10,85 odhi itulilwa omolwa iilonga yoku opaleka oshipangelo shAndara,omukunda guli moshikandjohogololo shaMukwe shoka shi li konyala ookilometa omathele 200 muuzilo wa Rundu.

Oshipangelo Okahao mOmusati otashi koopalekwa mokulongitha oomilliona dhooN$15. Omanga eopalekululo lyoshipangelo shaKaiti moshitopolwa sha //Kharas olya tulilwapo oomilliona dhooN$30. Omwaalu gwa fa nguka ogwa longekidhilwa wo eopalekululo oshowo enawapaleko lyoshipangelo shopadistrika shopo Nkurenkuru. Oshipangelo shaRundu nasho otashi ka opalekululwa  mokulongitha oomilliona dhooN$30.

Oku nawapaleka oshipangelo shopadistrika sha Gobabis otaku kuthapo oomilliona dhoo N$5,8 nuumvo. Omanga eopaleko lyaashoka shopOpuwo tali kuthapo oomilliona dhooN$15,4 sho sha  Tsandi otashi ka nawapalekwa mokulongitha ashike oomilliona dhoo N$4,39 membo lyiimaliwa yomutengeneko gweyokomeho gwo 2015/16.

Oshitopolwa shaKhomas nasho otashi tungilwa oshipangelo shopadistrika shoka shiitulilwa oomilliona dhooN$10,5 dhiilonga yoku shi tunga omumvo gwiimaliwa nguka [2015/16].

Molwiilonga yokutunga oshowo okunawapaleka omandiki guukalinawa wopetameko oshilongo ashihe oholomende oyi itulila oomilliona dhooN$50 membo lyiimaliwa omumvo 2015/16 nomwaalu gwa fa nguka membo lyiimaliwa 2016/17 oshowo embo lyiimaliwa omumvo 2017/18. Epangelo olya thaneka wo okutunga uukilinika waanuuvu yopamadhiladhilo oshilongo ashihe koshimaliwa shoomilliona dhoo N$19,5.

Oshikondo shika osha ti etompelo oku opaleka oshowo okunawapaleka  iipangelo taku longithwa omiyalu dhiimaliwa mbyoka , “omolwashoka opena ompumbwe yomahala miiyakulilo, unene tuu yoompumbwe dhomayakulo omape. Oshowo iimaliwa mbika ota yi longithwa okutungila aayakuli omahala goku kala“ popepi niipangelo oshowo pooklinika adhihe.”

LEAVE A REPLY

Please enter your comment!
Please enter your name here