Waa pandula noyaka  

0
257

 

ONGWEDIA – Omulumentu gwepipi lyopokati ena oshitalenti shokwiimba oomaimbilo gopambepo okwa pandula aalanduli ye sho ya ulike ohole nohokwe yoongalo dhe.

Negumbo Theofelus okwa ti oku uuvite uugumbo nohole sho Aanamibia ya ulike ohole moongalo dhe unene sho ta ya dhengele kooradio ndhoka hadhi dhana nokutulako oongalo dhe ta ya indile opo ya tulilweko nenge ya dhanenwe oongalo dhe.

Okwa ti shika oshi li etumba enene noku uvite ena ongunga onene ngele okwa kala inaa pandula oshigwana shoka ngashingeyi she mu kumike sho shuulike kutya oongalo dhe odhongushu no tadhi hokitha.

Theofelus oha imbi oongalo tadhi nyanyudha noku longa aapulakeni kombinga ya Kalunga noshowo ongushu yoku kala po komuntu kehe kombanda yevi, okuza kuunona sigo okuukuluntu.

Okwa ti ngashingeyi ota ilongekidha okupititha pambelewa oalbum ye ontitatu mbala, oshoka ehwata lyoongalo dhe ndika olya longekidhwa nale lyapwa.

Okwa pititha nale ooalbum dhe mbali ndjoka yotango yali yina omaimbilo ga heyali , kohi yoshipalanyolo tashi ti ‘Andi pandula Kalunga.’

Oalbum ontiyali otayi ti “Zeni mo momilema’, yi na omaimbilo omugoyi omanga ya hugunina yi na omaimbilo omulongo noshipalanyolo tashi ti “Onda hala ndi kale nda fa Jesus.”

Okwa ti omaimbilo ge ogendji ota ga longo nokundungika aantu okusimaneka ongushu yomuntu omukweni.

Ngashingeyi Theofelus ota ka kuthombinga methigathano lyoondjimbo dhopambepo ndyoka tali unganekwa kOradio yOshiwambo yedhina Omulunga Radio.

Ethigathano ndika otali ka kala ko momasiku omilongo 30 ga Kotoba nuumvo  moVenduka, moka aaimbi yoondjimbo dhopambepo ta ya  ka thigathanapo.

LEAVE A REPLY

Please enter your comment!
Please enter your name here