Ewiliko lyOngwediva lyoopaleke  Bay Watch dam ehala lyokwinyanyudhila

0
317

 

ONGWEDIVA-Odama yedhina Bay watch oya ningwa ehala lyoku inyanyudhila noku vululukilwapo kohi yewiliko lyamuni gwaNgwediva.Ehala ndika olya li lya egululilwa oshigwana Omaandaha oshiwike shika.

Ehala ndika lya ithanwa Ongwediva Recreational Centre otali kala eha mpoka aagundjuka, naakuluntu oshowo ookuume ka wo ta ya kala noku tsakanena okuthuwapo oshowo oku yotha onyama  nosho tuu.Ndika olya tulwa iilongitho ayihe ya pumbiwa koshimaliwa shoodola oomilliona mbali.

Ethaneko lyelelo lyOngwediva lyokuhumitha komeho pehala mpoka olya etwapo koshitayi sha UNAM shedhina Eduardo Dos Santos University of Namibia campus, ndika olina uutala woku yothela onyama wu li uhetatu oshowo itaafula yoku vululukilwa ihetatu oshowo iipundi yayo.Kakele kaambika pehala mpoka opena wo uundjugo woku iwatelela aalongithi yalyo.

Endiki ndika olina wo ontompa yaa endi yokolupadhi , ndjoka taya kala taya longitha pethimbo lyomvula, oshowo opena omahala gokuthikameka iihauto yaamboka ta ye li longitha .

Nonando shika hasho sha li methaneko lyotango otwi inekela nokutya ehala lyokwi inyanyudhila ndika otali kala lya hokiwa kwaayehe aagundjuka oshowo aakuluntu,”osho Omukuluntupitithi gwelelo lyaNgwediva, Damian Egumbo a ti.

Ehala otali tungwa kehangano lyedhina PESCA Trading Enterprises CC kohi yetonatelo lyehangano lyoo inginia hali ithanwa One Stop Engineering Services.

Omunambelewa guundjolowele womudhingoloko melelo lyaNgwediva ,Penda Kashihakumwa okwa londodha oshigwana opo shaa yoge modama ndjoka.

“Omeya oga yela  ndele ina ga opala okunuwa onkene oshigwana  ina shi pitikwa opo shi yoge modama moka,”osho Kashihakumwa a londodha.

Kashihakumwa okwa kwashilipaleke  aanafaalama momudhingoloko gwaNgwediva kutya  iimuna yawo otayi tsikile nokunwa modama  ndjoka ngaashi shito.

“Ndika ehala lyoshigwana onkene iimuna itayi indikwa okunwa modama ndjika konima sho ya lundululilwa mehala lyomainyanyudho,”  Kashihakumwa a kwashilipaleke.

Kashihakumwa okwa ti wo ishewe kutya oshigwana nashi taleko ehala ndika onga ehala lyasho shene noku li gamena opo lyaa yonagulwe nando okomukwashigwana gumwe.Shika okwe shi popi sha landula sho omweelo guundjugo gwa li gwa tewapo kaakwashigwana iikando yili iyali.Omuwiliki gwa  PESCA Trading Enterprises CC , Steven Nangolo okwa indile wo oshigwana opo shi tale ehala ndika ongo uuyamba wawo yene opo kaa ye li yonagulepo nando.

Iilonga yoku opaleka ehala ndika oya pewa ehangano lyoNorthern Cleaning Services oku li opaleka nawa.

LEAVE A REPLY

Please enter your comment!
Please enter your name here