Iigwana Hangano ya gwanitha omimvo 70 – ihe ombili oyi li peni?

0
278

Oshigongi shAayehe shIigwana Hangano oshitimilongo 70 shoka sha tamekele momasiku 15 Sepetemba moNew York, oshowo oshiwike shika, otashi kala noonkundathana dhoku adha elalakano enene. Ndika olyo okukalekapo eyokomeho talikalele, lyo ndika otali kuthapo okwaathike pamwe miiyemo, tali hulithapo oluhepo nuuthigona, tali tala kombinga yelunduluko monkalo yombepo oshowo okuetapo omukalo gwomalanditho geli nawa pokati kiilongo iiyamba naambyoka ya hepa kombanda yevi.

Ndele nee oonkundathana otadhi tsikile  nepulo ngele  UN oye shi pondola oku etapo ombili nenge pamwe oya ndopa okushi ninga. Iigwana Hangano oye shi pondola tuu okukalekapo esimano lyomuntu, moku soshimpwiyu kutya opena uuthike pamwe mokati kaantu muuyuni noku hulithapo oshowo okukuthapo iita kombanda yevi?

Omadhiladhilo otaga vulu oku kala ga yooloka, ihe shoka sha yela ooshika kutya onkalo muuyuni nena  oyo ombwinayi okuyeleka monakuziwa. Iita moSyria oya kutha ethimbo ele  naahangukununi mboka ya tumwa koUN oku etapo ombili ayehe oya ndopa oku yi etapo pokati kaamboka taya kondjithathana.

Aahangukununi yane – okuza ku Kofi Annan sigo oku Matti Ahtissari – ayehe oya kambadhalele ndele oya ndopa. Oshilanduli osho etembu ewinayi lyaantu inaali monika nale muuyuni okuza tuu kiita iitiyali yuuyuni.

“Omahokololo taga nikitha oluhodhi oshowo omafano taga inyengitha omitima ngoka taga ulikwa kiikundaneki ogo owala ondungu oshona yondundu yiikangwa yomeya nenge ondungu oshona yoshiponga oshinene shoka shili kohi yomaupyakadhi ngaka. Ngaka otaga vulu ashike oku monenwa eyamukulo nepotokono lyago okupitila melongelokumwe lyiigwana oyindji  oshowo melongelokumwe lyewiliko lyopauuyuni. Mbuka uupyakadhi wuuyuni.Naambuka owa pumbwa okupotokononwa kaawiliki yuuyuni,” osho omuperesidende gwoshigongi shAayehe shIigwana Hangano oshiti 70, Mogens Lykketoft a dhimbulutha aakwashigongi Omaandaha oshiwike shika.

Shoka tashi na yi pike  omashongo ngaa ndika omakuyunguto  ngaashi ngoka ge li moSouth Sudan nomoSudan yoyene, Mali, Ukraine, Afghanistan, Iraq, Eritrea, Libya, Yemeni, omusholondondo ota gu tsikile gwiilongo mbyoka yi na omaipumomumwe oshowo iikolokosha ta yi tsikile.Nguka omusholondondo gwiilongo mbyoka ya ninga konyala oombuga no ita yi vulu we oku ithanwa iikalwalongo kaakwashigwana ya mo  molwashoka mu mbika kamu na esimaneko lyuuntu womuntu, muka omuna ondjala, nuuthemba wokukala nomwenyo owa ninga oshinima shondilo noshapumba.

Eeno uuyuni inau mona nando onale uupyakadhi wopantu  wa guma oshilongo kehe pomuthika guthike mpaka  okuza tuu pehulilo lyiita iitiyali yUuyuni.

Okutembuka kwaantu okuza kiilongo yomakuyunguto niita okwa ninga uupyakadhi uunene, oshowo okwaanohenda nolukeno kwiilyongo ya Europa  nenge okwaahepo kwomathaneko goku yakula aafadhukipo mbaka miilongo mbyoka oko kwa thiminike Amushangandjayi gwoUN  Ban Ki-moon oku hiya oshigongi showina momasiku omilongo 30 Septemba moNew York oku kundathana uupyakadhi mbuka.

Omeho agehe oga taalela kolutu nduka luuyuni ndoka lu shiwikile  oshinakugwanithwa shoku kalekapo ondhilo yuuntu muuyuni, ngele nduka otalu vulu okuthikama omuthika noku nakulamo omuntu muudhudhu wa tya ngeyi noku fala mpoka kutya omumvo 2015 ogo ngoka olutu nduka lwa lundulula ondjilankalo yuuntu koplaneeta ndjika oku yi ukitha kuuwanawa nokombili.

 

LEAVE A REPLY

Please enter your comment!
Please enter your name here