Nekongo ota zi muukansela uudha ombili

0
383

 

ONGWEDIVA – Kansela gwoshikandjohogololo Onayena moshitopolwa Oshikoto ota thigipo iilonga mbyoka uudha ombili.

Marx Nekongo okwa ti ita tsikile we oku kwatela komeho Onayena konima yoku yi wilika uule womimvo 17 dha piti.

Nekongo ngoka uuvite ombili moku tala shoka a ningile Onayena pamwe naakalimo yamo okwa lele oshikandjohogololo shoka  okuza 1998 oshowo okwe shi wilike omanga wo eli Omunashipundi shElelo lyoshitopolwa Oshikoto okuza omumvo 2010.

“Otandi pandula aantu mboka ya hogololele ndje mewiliko, otandi pandula wo ewiliko lyoshitopolwa oshowo ookansela ooyakwetu mboka twa kala noku kundathana  moku yakula oshigwana miikandjo yetu oshowo okuhumitha komeho oshitopolwa shetu momumbwalangandjo,” Nekongo osho a popi.

Nekongo okwa tegelelwa a ka landulwe ku Iyambo Natangwe Indongo ngoka oye ta ka kala okandidate yoSwapo pethimbo lyomahogololo giikandjohogololo taga ka ningwa mu Novomba nuumvo.

Sigo oompaka moshitopolwa Oshikoto, Kansela Walde Sheyavali kEengodi, Petrus Kambala mOnyaanya, Sacky Nangula mOmuntele oyo taya kala momahala gawo guukansela ngele aahogololi oye ya hogolola momahogololo ta ge ya muNovomba ongo aa ulikwa yoSWAPO.

Mokankolo kansela  Josef Imbili okwa pingenwapo ku Hans Haimbodi, mOniipa, John Shiindi ota ka landulwa ku Jerry Ngwena, ye Armas Amukoto iitomo yomOmuthiya ote yi pe  Samuel ya Shivute.

Reinhold Shiningombwa oye ta kala omukokoli kansela gwoshikandjohogololo oshipe shaNehale lya Mpingana ngele omahogololo ga Novomba okwe ga sindanapo..

Ookandidate miikandjohogololo shaTsumeb, Guinas oshowo mOlukonda ka dha li natango dha kolekwa kutya oondhoka dha kalamo tadhi shunithwamo nenge pamwe otamu tulwa oompe, ihe shika okwa tegelelwa shi kale sha manithwa Etitano ndika ndyoka olyo esiku lya hugunina lyuuthwa koSwapo opo aaulikwa hogololwa yongundu ndjika ya kale ya gandjwa koombelewa oonene,shika osha kolekwa komukwatakanithi gwoSwapo mOshikoto, Armas Amukwiyu.

Nekongo sho ta shuna konima okutala olweendowiliko lwe oku uvite uuntsa  moku yambulapo Onayena oku za mokukala omukunda gowala oku yi tula pomuthika guna ewiliko lyopashinanena lina ookansela yoshilandomukunda, omanga Oniipa ota yi yelulwapo okuninga ondoolopa yi na ewiliko lyopandoolopa okuza momahogololo ga Novemba.

Iilongadhalwa yilwe mbyoka ta yi ka tsikilwa kukansela ngoka tayi moongaku dha Nekongo ongaashi etungo lyoshipangelo shopaumwene, oapoteka oshowo osasiona yokunwetha omahooli.

Pethimbo lyewiliko lye , Nekongo mekwathwelo neyambidhidho lyelelo lyOshikoto okwe shi pondola okutulitha omalusheno moosikola dhili hetatu moshikandjo Onayena oshowo ooprimasikola omulongo moshikandjo osho tuu shoka. Omanongelo agehe ngaka kehe limwe olina omeya ga yela no mawanawa okunwa.

Nekongo okwa ti okapangelo kOnayena clinic nako oka yambulwapo eta ka tulwa pomuthika gwendiki lyuundjolowele pethimbo lyewiliko lye omanga okapangelo Andimba  otaka tungululwa ka ninge endiki lyuundjolowele.

Oondjila dhongalama oshowo yoteya odha tungwa wo mOnayena oshowo mOshikoto pethimbo lyewiliko lye  ongo omunashipundi gwelelo  lyoshitopolwa shika.

Oondjila dhimwe ndhoka dha tulwa miilonga nuumvo  odha kwatelamo ndjoka yOnalulago-Epembe oshowo ndjoka yOnayena nOmakango.

Ondjila yOnathinge-Onayena-Okankolo oya tulwa oteya pethimbo lyewiliko lye.

Nonando iilonga mbika oya li ya fa ta yi nyengana ,Nekongo okwa ti ye ota tala kwaashoka sha longwapo okuyeleka noku tala komashongo ngoka ga taalelwa.

“Omashongo opo ga kala , naangaka oga holoka molwa iimaliwa yomutengenekwa mwaalu gomumvo. Onkene ota shi kala oshiwanawa ngele andola iimaliwa yomutengenekwa mwaalu oya topolwa kaawiliki mboka ye li mewiliko lyoshitopolwa no ye na owino yoompumbwe dhaantu yawo,” osho Nekongo a ulike.

Okwa ti sho ta yi moshipundi shoku vululukwapo ye okwi ilongekidha  oku kwatha omulanduli gwe nontseyo ndjoka ena kombinga yewiliko lyoshikandjohogololo uuna sha pumbiwa.

LEAVE A REPLY

Please enter your comment!
Please enter your name here