NFCPT a gongelele oosikola oN$400 000

0
305

 

OUTAPI – Oshiketha shina sha nekumiko lyoshigwana opo shi lye oohi  nenge [Namibia Fish Consumption Promotion Trust (NFCPT)] ehulilo shiwike lyayi osha gongele oshimaliwa shi vule ooN$400 000.

Oshimaliwa shika sha gongelwa pethimbo lyiitelekela ya ningilwa moshinyanga shiigongi shewiliko lyOmusati pOutapi otashi ka topolelwa omanongelo gomoshitopolwa shoka.

Pethimbo lyiiteleka mbika omahangano ogendji oshowo aakwashigwana oohandimwe oya uvaneke na yamwe oya gandja oshimaliwa koomuma kehangano nenge koshiketha shika sho NFCPT, opo mbika yi pewe oosikola ndhoka dhili mompumbwe.

Omwaalu gwooN$419 000 ogo omunene okuyeleka naangoka gooN$250 000 gwa gongelelwe omimvo mbali dha piti miitopolwa Omaheke oshowo Otjozondjupa. Oosikola ndhoka dha pelwe oshipambu shiimaliwa mbika omimvo dha piti ongaashi Naosanabis, Nossob Gobabis Otjivero adhihe dhili ooprima sikola moshitopolwa Omaheke. Omanongelo omakwawo ngoka ga pelwe iimaliwa mbika ongaashi ishewe oprimaskola yaOrwetoveni nOkakarara oshowo nee ooseko yaKahandja naandjoka yaKhorab .

Pahapu dhomunashipundi gwa NFCPT  Katrina Sikeni, ehangano lye okupitila mesiku lyokulya oohi, oshiketha shika osha kwatele komeho oonkambadhala dhoku opaleka omuthika gwelongo lyomunona omuNamibia.

“Shika oha tu shi longo moku kwathela omanongelo  miitopolwa moka esiku lyokulya oohi lyopashigwana lya dhimbulukiwa.Omanongelo ngoka oha tu ga yambidhidha moompumbwe ndhoka go gena, naashika otatu kwashilipaleke kutya otashi fala pombanda ongushu yelongo lyomwiilongi omuNambia.,” Sikeni a uvaneke.

Molwashoka iimaliwa mbyoka ya gongelwa moshitopolwa Omusati oyo oyindji oosikola dhooseko odhindji moshitopolwa shika otadhi ka mona iipambu moshimaliwa shika.

Sikeni okwa tseyitha wo kutya NFCPT ota ka longa iitulamo opo a dhike oositola dhokulanditha oohi kondando yili nawa pOmuthiya, Oliindili, oshowo mOndangwa.
“Enenepeko lyokukalapo kwetu miilando ya tumbulwa olyo egwanitho lyoshinakugwanithwa shetu twapewa kepangelo okufala oohi koshigwana. Tse mehangano  lyokuhwahwameka elyo lyoohi moNamibia ota tu tsikile oku fala oohi odhindji moshigwana kondando ta yi vulika ku kehe omukwashigwana. Oohi ndhika oshilongomwa sha Namibia, shanuninwa aaNamibia tashi ye etelwa wo kaaNamibia. Oshikwawo elongo lyoshigwana nkene shi na okuteleka nokulongekidha oohi  ota li kwatha opo ndhika dhi  kale aluhe dhina iitungi ya gwanena oonaku dhi  lya,” osho a ulike.

 

Omumvo gwa yi aguke NFCPT okwa landitha noku andjaganeka oohi dhoometrike tona omayovi 7 500. Sikeni okwa uvaneke kutya  NFCPT okwa hala okumbalipaleka omwaalu ngoka nenge okugu ndatupaleka nookuli.

Okwa ti omathaneko gopangeshefa ga NFCPT omawanawa no  ge shi oku popilwa unene tuu sho ongeshefa ndjika ha yi landitha oohi dha yo kondando  yi li pevi oku yeleka naandjoka hayi landithwa moongeshefa dhilwe.Shika oshi li oshitopolwa sho ndungethaneko tayi kwathele omuNamibia kehe opo a vule oku tyapula oonzo dhopashitwe dhoshilongo shawo.

“Namibia Fish Consumption Promotion Trust, olyo okwaako koholomende ya Namibia  monkambadhala oku kondjitha ondjala , oluhepo, oku kalekapo oondja dha gwana oshowo oku etapo oompito dhiilonga okutothamo ashike yimwe po,” osho a ulike.

LEAVE A REPLY

Please enter your comment!
Please enter your name here