Ospana Namibia ye etelele oombandi 14 kegumbo

0
354

 

KINTELE – Amushanga Ndjayi gwaNamibia Paralympics Committee (NPC), Michael Hamukwaya,  okwa pandula ospana ya Namibia oshowo uukwatya wa yo  noku longa kwa yo nawa muudhano  wiilongo yAfrica mboka wa hulile moBrazzaville mo Republika ya Congo Olyomakaya ga piti.

Sho uudhano wa thiki pehulilo Olyomakaya ga yi Namibia okwa adhika nale a sindana oombandi 14. Mokati kaandhika muna ntano dhoshingoli ne dhoshisilveli oshowo ntano dhoshikushu. Ndhika adhihe kumwe odha ningi 14.

Omasindano ngoka ga monika ku Namibia nuumvo muudhano mbuka oga pitilile ngoka ye a mwene momaudhano ga ziko ngaashi mwaamboka womumvo 2011 waAfrika alihe moka ye a li owala a mono  ombandi heyali kumwe adhihe, mokati kaandhoka mwali yimwe yoshingoli yimwe yoshisilveli oshowo ntano dhoshikushu.

“Elalakano lyetu olya li okumona konyala  andola oombandi dhoshingoli dhili ntano, na ngashingeyi onda nyanyukwa  okumona kutya  aatondoki yetu  oya adha elalakano lyetu ndyoka tse twa li twi itulilapo . Ngashingeyi otu na etegameno oku uka komeho kutya ota tu ka kala niimaliwa ya gwana  oku ilongekidha nawa kuyele opo tu vule okusindana omakopi ogendji monakuyiwa”.osho  Hamukwaya a ti.

Pethimbo lyuudhano Ananias Shikongo okwa sindana ishewe ombandi yoshingoli mokumatuka  oshinano shoometa T13 400 konima yoku sindana oshinano shoometa T11 400  tango. Oku sindana huka okwa landulwa kesindano lya Johannes Nambala ngoka wo a gwedhako ombandi yoshingoli mematuko lyoometa T13 400. Elias Ndimulunde okwa mono ombandi yoshisilveli mematuko  lyoshinano shoometa T45-47 400. Oombandi dhilwe ndhoka dha monika ku Namibia odha zi komaudhano  ngaashi ombokisa, okuyoga oshowo ndhoka dha etwa  kaadhani ye na uulema oshowo mboka  yaa na uulema.

 

LEAVE A REPLY

Please enter your comment!
Please enter your name here