Uudhiginini  neitulemo oyo iipatululo ye sindano

0
285

 

WINDHOEK – Ongundu yaaNamibia ya za moWindhoek oshowo moondoolopa dhopopepi oya tsakaneke omumatuki omusindani gwoombandi mbali dhOlympic omukwashigwana gwa Jamaica poHosea Kutako oshiwike shika.

Shelly-Ann Fraser-Pryce enyakwa lwiikando itatu moshinano shoometa 100 ota talelepo moNamibia uule woshiwike, nelalakano okuhwameka oshowo okunuethamo aatondoki mboka opo ta ya tameke omathigathano ngaka oshilongo ashihe. Okwa ti osha simana kutya aamatuki na yo ya simaneke eilongo lyawo.

Omumatuki nguka gumwe gwaamatuki dhingi aakiintu muuyuni eli pondondo ontine methimbo lyomimvo ndhika ota tameke etalelopo lye moGobabis moshitopolwa Omaheke, moka ta ka talelapo oosikola oshowo ooklaba dha yooloka dhaamatuki momudhingolok ngoka.Oku za mpoka ota yi koshitopolwa sha Kunene hoka ta ka endulula shoka a ningi moshitopolwa shaMaheke oku tsakaneka aanasikola naadhani yomoshitopolwa shoka.Etalelopo lye otali hulile  mokutalelapo Oshiwakopo nOmbaye moshitopolwa Erongo.

Moshipopiwa she oshihupi sho, oshangongwa nawa  okupopitha aantu omathele mboka ye mu tsakaneke pokapale ka Hosea Kutako Etiyali oshiwike shika, Fraser–Pryce okwa hokolola onakuziwa ye  kutya na ye okwa li a taalelwa ke kondjo edhigu ongo omumatuki, unene opo aadhe mpoka eli nena.

“Kutya owa za monkalo ya tya ngiini atuhe  otuna ekondjo lya faathana ongaantu, nonakuziwa yandje, ina yi yooloka no ye ni. Ngame onda koko noku putuka moluhepo na meme okwa li ena oku ninga eigandjo edhigu opo etu paluthe ye etu longithe, dhiladhila ashike tu li megumbo aanona yahamano.Ihe okulonga nuudhiginini oshowo neitulemo oko ashike nda  kutha opo ndi adhe nokukala pomuthika nguka ndili nena,” Fraser–Pryce a ti.

” Kashishi oshipu okukala enyakwa lyombandi yoshingoli muudhano wOlympic nenge okukala enyakwa lyuuyuni, ndele moku longa nuudhiginini, neitulemo oshowo moku itaala mwene , kehe gumwe gweni unene tuu aagundjuka mbaka otaya vulu okuninga omanyakwa guuyuni ga Namibia  limwe lyomomasiku.Ongaamatuki naadhani aape  inamu etha oondjodhi dheni, ndele shoka mwa pumbwa osho owala okwiitaala mu ne yene na kehe oshinima ota mu ka vula oku shi ninga.

Okwa lombwele wo mboka ye mu tsakaneke kutya okwa hala okutalelapo iitopolwa ya yooloka yoshilongo moka ta vulu okumona iinamwenyo ngaashi oonkoshi ndhoka dha pumba moshilongo shaandjawo.

“…Ooh nokune mboka tashi vulika mu shishi ohandi vulu okupopya  oshAfrikaansa. Ondi ilongo iitya yimwe yimwe  kaa ilongi yuudhano aaNamibia mboka ta ya ilongo moJamaica, mboka aanambili nolundji ohaya hokololele ndje omahokololo kombinga ya Namibia, nonkene oshilongo sheni oshiwanawa. Onkene onda tokola opo esikulimwe ndi ye oku mu talelapo  sho osho tamu taamba ndje nena ngeyi ”

Fraser-Pryce oye omukiintu omutine ena ondapo yoshidhudhu  mokati kaakiintu yomathimbo agehe mboka ya matukile muudhano woshinano shoka monakuziwa . Okwa tondoka oshinano shika oosekonde 10,70 ethimbo ndyoka a matukile  moshilandopangelo sha Jamaica, Kingston omumvo 2012.

LEAVE A REPLY

Please enter your comment!
Please enter your name here