Aaniilonga yaShilimela taya nyenyeta oondjambi

0
320

 

ONDANGWA – Yamwe yomaaniilonga  yaShilimela Security otaya nyenyeta noku longa neyeme molwaasho ye wete oondjambi dhawo ndhoka haya pewa anuwa inaadhi ondoka nawa no ya hala ya popilwe mbala.

Aaniilonga mbaka yali ya thikitha omanyenyeto gawo oya li ya yelitha kutya oya tumwa kehangano lyawo lyokugamena omaliko gaakwashigwana lyaShilimela, nohaya longele pomahala ngaashi poombelewa dhegamenenepo lyuunshitwe ne endjaganeko lyomeya momikunda, oshowo poombelewa dhElongo adhihe dhili pomudhingoloko gwaNankali.

Gumwe ngoka a tindi oku tumbula edhina lye okwa holola kutya okwa longela ehangano ndika lyaShilimela uule wethimbo ashike ina mona natango omagwedhelo. “Otuna uupyakadhi uunene mehangano lyetu ndika lyaShilimela, ohatu longo iilonga kaatushi kutya ohatu shangwa ingapi mowili, nonande natu pule ihatu yamukulwa,” tati ngaaka.

Taya tsikileko kutya ohaya longo oowili dha pitilila mesiku/muusiku, yamwe anuwa ohaya longo oowili 12 omanga yamwe haya longo15, yo ihaya shangwa omalutaima.  Ta ya gwedhapo kutya nonande ka yali ya uvathana petameko ka ya li ya lombwelwa ngele ota ya kala ta ya longo oowili dha pitilila ngaashi haya longo ngaashingeyi.

“Katuna omauwanawa gasha mehangano ndika ngaashi social security, nonande mokapayslip hamu ulike mwa nanwa kosocial security, otwa ninga oonkambadhala odhindji mono twa ka kutha onkatu tu ye koombelewa dho social security nolundji ohatu lombwelwa owala kutya omadhina getu ka gemo no ihatu futilwa, otwa hala eyamukulo otwa kala noku pula aahona yetu ashike ihatu yamukulwa onkee twa kambadha tu ye kiikundaneki pamwe ta tu kwathelwa,” Taya gwedhapo ngaaka.

Aaniilonga mbaka yamwe taya hokolola kutya oya longela Shilimela oomvula odhindji tadhi ihilile pu5/6, taya popi kutya oondjambi dhawo oonshona noonkondo yo yamwe mboka haya longele komahala gokokule ohaya futile omahala mpoka ha ya zi naashika ohashi manapo iimaliwa yawo. Oshikwawo uuna ya landa iikulya nena ohaya hupupo owala nomwaalu omushona lela. Taya pula opo ya gwedhelwe yo ya kale yena omauwanawa ngaashi aaniilonga ooyakwawo

Omukuluntu gwehangano ndika lya Shilimela, omusamane  Banda Shilimela pethimbo ali a kwatathanwa naye pangodhi, kali ta vulu oku popya oshoka anuwa okwali eli moshigongi, nonande ali a uvaneke a dhenge ongodhi konima yoshigongi ine ketu galukila we ngaashi a li ta ti. Onkee onkambadhala okumona Shilimela otadhi tsikile.

Pethimbo ndika ondjambi yopevi yomuniilonga muusekuliti oyo ooN$6,75 mowili pamautho gepangelo ngoka ga tseyithilwe moshifo shepangelo omumvo 2013.

Omautho ogo tuu ngaka otaga utha kutya omahangano gooSekuliti oge na oku pa omuniilonga kehe okapayslip kena uuyelele auhe wu na sha nondjambi yomuniilonga ngoka ngaashi sha uthwa koveta yaniilonga. Aaniilonga muusekuliti oye na okusoshimpiwyu kutya oya pewa uupayslip wawo omwedhi kehe nongele shika aahona yawo ina ye shi ninga nena aaniilonga mbaka otaya vulu oku fala oontamanana pokati kayo nomu gandji gwawo gwiilonga  koombelewa kehe dhOshikondo shaaniilonga.

Ngele shika ita ye shi vulu nena mbaka otaya vulu oku fala uupyakadhi wawo kehangano lyaaniilonga yuusekuliti lyedhina moontamanana ndhoka. SAN okwa li a londodha omumvo gwa yi kutya ota ka katukila onkatu aagandji yiilonga yuusekuliti mboka inaa yah ala okwi iyutha komautho goku futa ondjambi yopetameko yaaniilonga mbaka ngaashi shuuthwa oshowo oku landula omukalo gwokufuta aaniilonga okuya pa uupayslips mboka tu ulike kutya ohaya futwa ingapi mowili oshowo ohaya nanwa shike nashike koondjambi dhawo kehe omwedhi.

 

 

LEAVE A REPLY

Please enter your comment!
Please enter your name here