Iiyemo yoonakulwa aakulu ya kwathelandje unene

0
350

 

OKAPETO – Agustus Mateus, omukondjelimanguluko ngoka a kala moluhepo ethimbo ele, ta lala mokandunda moka hamuyiwa omuntu ta sisila a fa tayi monzimbogo, okwa pandula epangelo, unene tuu Kansela gwa Elim ngo emukwathele opo a mone iiyemo mbyoka ta yi pewa oonakulwa aakulu yekondjelomangeleko.

Mateus ka kwali ena ondunda nenge egumbo lyopauntu, a ka la owala talala mokandunda moka hamuyiwa omuntu ta sisila nuudhigu. Ka kwali wo ena iikutu yo kuya paantu no kwa kala ta dhengwa kondjala nai. Omukulukadhi gwe okwe muthiga po nale, shimwe shoka sha dhenga Mateus pomutima nayi sigo opaife.

Ashike oshiwike shika Mateus okwa ti ngashingeyi okwa paluka oshoka okuna iiyemo ye yo komwedhi mbyoka ha yi ziilile kombelewa yoonakulwa aakulu.

“Ngashingeyi ondili nawa nolutu lwandje olwa paluka, nale kwa li to ta landje oshili aaye. Olupandu olunene otandi lu gandja ku kansela gwetu [Gerald] Shiimi. Oshoka onda kala ethimbo ele te mono iihuna,” Mateus ta popi okuzililila megumbo lye momukunda gwedhina Okapeto moshikandjohogololo sha Elim moshitopolwa shaMusati.

Nonando Mateus okwa landa iitungitho yondunda ye yongushu yoondola N$ 8000, natango oku li ngaa ta lala mokandunda ke hoka tayi mo ta sisila nuudhigu, ta ti mwaandjoka ompe a tunga ota ka ya mo ngele ethimbo lya thikana oku shi ninga.

Kundana sho a yi mo megumbo lya Mateus okwa adha a tula po ombiga yolwishi nonyama, ta ti nale olwishi kali elu shi nande okwa kala ashike helu mono moositola moka ali ha ende.

Mateus, ngoka ali e shiwike nawa nedhina Lasia Mateus pethimbo lyiita yekondjelomanguluko, okwa li woo ali a imbileko Kundana omaimbilo ngoka ga li ha ga imbwa kaakwiita pethimbo lyiita okwa ti oku uvite uuntsa sho a tumbalekwa molwiilonga ye pethimbo lyekondjelo manguluko.

Kansela gwoshikandjohogololo gwaElim Gerald Shiimi okwa ti okwa adhele Mateus  kaa li eli monkalo ta yi etitha oonkondo ye ka kwali ena nando omizalo dhokolela.

Kansela okwa ti okwa  katuka onkatu opo emu landele omizalo dhopokati kaantu opo a vule oku mu fala koombelewa a ka mone uuwanawa ngaashi oonakulwa aakulu ooyakwawo ta ya mono.

Kombinga yomukulukadhi gwe, Mateus okwa hokololele woo Kundana kutya okwa li a uvithwa nayi kaakalimo yomomukunda gwawo mboka ya hongolola omukulukadhi gwe ete mu thigipo. Okwa ti shika osha li she mu piyaganeke noonkondo.

LEAVE A REPLY

Please enter your comment!
Please enter your name here