Peter Ondume yomomufitu: Olweendotumo koVenduka

0
304
Peter Jungle Fighter

 

OKU uka mokati kApilili 1985 onda tokola oku ya koVenduka. Tate Kaupa Mwatotele ngoka a kwathele ndje opo ndi mone okamutse ka South West Africa poombelewa dhUumutse pOndangwa oye a longekidha olweendo lwandje. Ethaneko lyandje olya li oku ya mbala noku ka dhikapo elyenge lyokuyambidhidha oshowo okutotha mo ookandidate ndhoka tadhi vulu okudheulilwa uukwiita woguerrilla miilando. Otwa londo mokambesa okuza kOndangwa oku ya koVenduka. Mondjila yetu otwa piti poobloka odhindji dhopakwiita, oku tameka pOnathinge, pokamba yakwiita pOkatope, Omuthiya, oshowo pOshivelo nobloka onkwawo popepi nOshomeya. Pomatsakaneno goondjila yOshomeya, Oshaanda nOtavi otwa adha po obloka ya kalelela, mpoka nda tsakaneke uupyakadhi. Sho twa thiki pobloka ndjika, aakwiita yoKoevoet yuudha uuhwapindi oya lombwele kehe gumwe a ze mo mokambesa. Omufaalelwa kehe okwa lombwelwa wo a kuthemo ompunda ye mokambesa. Aafaalelwa tse otwa hilagulwa nokuundulagulwa tu ukithwa mpaka naa mpeyaka otwa li wo twa dhengwa noondhimbo ndhoka hadhi kala dha humbatwa kaakwiita mboka no inaatu pulwa nando omapulo.

Aakwiita yoKoevoet mbaka oye tu fala motenda onene moka mwa li mwa minikilwa kolamba onene yuuyelele owindji. Moka otwa lombwelwa tu thikame momukwekeyo . Sho twa ende tu uka kotenda aantu oya kala taya hilagulwa ya fa iikombo. Omukwiita omukiintu gumwe gwoKoevoet okwa kwata mombaikitha yandje noku hilila ndje kotenda. “Inyenga meendelelo ngele hasho otandi ku gapula ngashingeyi,” osho iigidha.

Ohaluka ye okuumba ndje ongonyo uukitha komutse gwandje . Sho nda kambadhala oku yi kandeka ye ota tsu ndje nombele ye yokondjembo mepepe lyokolulyo, iipopile a ti anuwa itandi endelele ngaashi ye a hala. Konima sho a tsu ndje ngaaka omukwiita gumwe omugundjuka gwoKoevoet okwa popile ndje, sho a tameke te mu ombedhi, nguka okwe ke tu fala atuhe komukwiita omutiligane  ngoka a li a kuutumba meni lyotenda. Moka okwa pewa ishewe oombedhi nuusama noku pulwa a fatulule kutya okwa tsile ndje shike inaa pewa uuthemba oku shi ninga ku kommanda gwe. Omutiligane okwa pula gumwe gomongundu yawo opo a  pange ndje noku manga oshilalo shandje shoka, omanga inaandi ka joina omukweyo.

Konima aakwiita yeli ya tano aaluudhe oya li taya ende  ya landula omukweyo gwetu ngiika mbaka oya li aakwiita yonale yoPLAN mboka ya kwata, taya tala ngiika ngele ota ya vulu oku mona mo aakwiita yoPLAN momukweyo ngoka. Atuhe otwa li twa pulwa tu ulike uumutse wetu wopashigwana omanga inaatu londa ishewe mokambesa noku tsikila ondjila yetu okuya koVenduka.

Mondangwa otwa zilemo mesiku 27 Apilili 1985 notwa thikile moVenduka kongulohi yesiku olyo tuu ndyoka. Omuntu gumwe gwedhina itaandi li dhimbulukwa okwe tu ile posasiona yombesa ya li popepi nokomboni onkulu, nguka okwe tu fala kegumbo limwe moSoweto omanga inaatu ka falwa ishewe kegumbo limwe molukanda olwo tuu ndoka.

Omulumentu ngoka etu ile pokambesa omushiwikile gwaTate Mwatotele. Ndele molwashoka egumbo lye olya li eshona okwe tu fala kegumbo lilwe hoka oko twa lala. Ongula sho kwa shi otwa yi pamwe nomulumentu ngoka kaandja nakusa Joseph Kambangula ngoka a li amushangaa gwIiyenditho gwoSwapo meni lyoshilongo.

Molwashoka Tate Mwatotele na Hailwa Kambangula oya li ye shaathane outu uhala esiku alihe megumbo moka tatu kundathana  kombinga ya nkene iita yekondjelomanguluko ta yi geyekwa noku humithwa komeho meni nopondje yoshilando. No inaa pula epitikilo lyandje Tate Mwatotele okwa tseyithile Hailwa Kambangula kutya ngame oshilyo shetanga lyoPLAN ndali moVenduka netumo lyiilonga ya sheywa. Onkene Hailwa Kambangula okwa taamba ndje ko nawa. Tate Mwatotele okwali a pitililwa  kenyanyu enene, unene tuu sho a li adhengemo kashona momalovu naashika osho she mu pogolitha sho iniiyutha kelombwelo lyandje opo kaa popye kutya ngame ondi na ekwatathano  netanga lyokumangulula Namibia lyoPLAN.

Onda londodha amushanga nale  kutya ina popya nando ombinga ya ndje okukala moVenduka nomuntu nando ogumwe inaa pitikwa ku ngame  oshoka oye awike a li a tseya ekalepo lyandje moVenduka. Onde mu londodha ishewe kutya aawiliki yopombanda yoSWAPO moAngola oya tseya kutya otandi ya ndi tsakanene na ye moVenduka onkene okuna okulonga nekale po lyandje ongo oshiholekwa oshinene. Onde mu londodha ishewe kutya ngele okwa holola ekalepo lyandje mOvenduka otashi ke mu etela oshilanduli unene tuu ngele ngame onda ningilwa sha oshiwinayi nena ye oye ta ka pewa uusama mboka. Hailwa Kambangula okwa uvaneke kutya ita ka popya tuu nando oshinima shika komuntu gwontumba. Otwa ka galukila ishewe pegumbo lyaHailwa Kambangula koinima yomasiku gane omanga Tate Mwatotele inaa shuna kOwambo.

Esiku ndyoka otwa adhamo omupeviperesidende gwoSwapo meni lyoshilongo Hailwa Nathanael Maxwili. Etsakaneno lyandje na ye okwa li olyo lyotango tandi mu tsakaneke. Otwe mwaadha mehala lyaayenda taya kundathana na Hailwa Kambangula kombinga yoshilyo shimwe shoSWAPO mo Mbaye anuwa sha kwatwa komatanga gomutondi molwashoka osha li mekwatathano niipambele yekondjelomangul lyoshilongo.

Pethimbo mpoka hailwa Shityeni okwa li a tseyitha ndje kOmupevi president ati ngame oshilyo shetanga lyoPLAN nda tumwa niilonga yaashiwike moshilando shika. Hailwa Maxwilili okwa minike ndje a fa eshi ndje nale ta igidha tati ‘Aluta continua evitoria acerta.” Okwa pula ndje nenge okwa popi einekelo lye kutya ondili moVenduka nelalakano lyo ku humitha komeho iita yekondjelomanguluko.Molwashoka uuyelele mboka omupevi peresidente a pewa owe mu nyanyudha, okwa tameke ta pula ndje kutya omolwashike oPlan ihaa yi longitha oondjemb oonene noku lethekapo omakakunya lumwe aluke. Okwa li wo a pul kutya Omuperesidente gwo SWAPO oku li tuu nawa.

Esiku ndyoka otwa uhala tatu kundathana nkene ekondjelomanguluko tali ukithwa komeho okudhenga omutondi, oshowo oku hwameka opo ya ye kombanda yiilongo oku ka dheulilwa uukwiita yo ya galukile moshilongo oku shi mangulula.

Otwa popi wo kompumbwe opo iilonga yomiyonena tayi ningilwa oshigwana kaakwiita yomutondi yi kale ya tseyithilwa aaholi mbili ayehe muuyuni wopondje.

 

LEAVE A REPLY

Please enter your comment!
Please enter your name here