A mona oshihemba tashi dulu okuhakule okankera

1
1063

Komutoolinghundana

ONGWEDIVA – Michael Nenkavu okwa a mona oshihemba osho ta ti ota shi ka dula oku hakula omaludi okankera, omukifi oo wa nyengana oku monikila omuti mounyuni.

Nenkavu, odalele yomOshinyadhila moshikandjohoololo shaNgwediva, ota ti oshimeno shOdingila, hashi mene momitunda yomoumbangalanhu waNamibia, osha kal hashi hakulifwa ku xekulu Nongali Michael Nenkavu meedula donale manga oipangelo yahali po.

Omolwa ounongo wovakwa Nenkavu, Namibia otashi dulika a ninge oshilongo shotete mounyuni sha mona oshihemba tashi dulu oku hakula eekankera domaludi. Ekonaakono lo2013 la ningwa koshikondo shoundjolowele  pamwe noCancer Association ola holola kutya, ovanhu 476 ova monika eekankera domaludi moNamibia. Mokati kaavo, omwa kwatelwa ovalumenhu omuwoi va monika outumba/ okankera yokevele.

Omukulupe Nenkavu oo a kala omushiviwoihemba, okwa hakula ovanhu, oimuna noinamwenyo omikifi da yooloka  mokulongifa oshimeno eshi. Nongali oo a li ha longo noihemba yopaushitwe okwa tambikida ounongo ou movana ovamati Andreas naErasmus Nenkavu ovo navo va kala nokupa panga omikifi domaludi. Andreas naErasmus navo yoo ova yandja ounongoshiivo movana kovana, mwa kwatelwa omutekulu Nenkavu oo ta lalakanene opo a ete oshihemba eshi pamufika wopaunongononi.

Kakele komaumbangihokololo  a vahapu  va veluka komikifi didjuu, oshidjemo shekonaakono koshitukulwa shoMULTIDISCIPLINARY RESEARCH CENTRE moUniversity yaNamibia  2014, osha koleka kutya oshimeno otashi dulu oku hakula  eekankera domaludi. Moku shi longifa ka shi na  oilanduli, onghee  osha kolekwa kutya oshaameni keembakiteli, antioxidant,  hashi velula omukifi wosuuka, oallergy, nokuvelula omauyahame omeni lolutu.

Mokumona oshidjemo shavahapu ve dule po-300 va hakulifwa  oshihemba eshi kuxe Erasmus Nenkavu a longifa oshimeno inashi konaakonwa, momudo 1995, omunyasha ou okwa yandja oufila wa kwanghulwa okudja momudi woshimeno u konaakonwe koUniversity yaNamibia, ku yandjwe ekwashilipaleko  paunongononi koshidjemo shoufila ou. Oshidjemo sha nyanyangidwa monhokolwa noshikondo shoundjolowele osha koleka kutya, oufila hau tulwa momeva, moshikundu , mojuice, poipute yomalonda  yomaludi owa monika kutya , otau velula omikifi dihapu da nyengana mepango mounyuni, notau dulu ku longifwa mokutunhila.

Hanale unene eshi natango kwa kundanwa  Johanna Amunyela, omuNamibia e li koUnited Kingdom a kufa yoo ombinga momakonaakono opaunongononi okumona omuti wokuhakula okankera, okuxupifa eemwenyo davahapu mounyuni.

Etulo pamufika  lomuti ou, otali ka xupifa nokulepeka eemwenyo davahapu keembinga dounyuni tadi kana po molwa omukifi uhe wetikile omuti. Pamukalo wokushakeneka epangelo, oshimeno otashi pumbwa kwaamenwa, noku filwa oshisho shi tanekwe noshi andjakane  neembinga dihapu doshilongo okukwafela epangelo mokushakanekifa ondjodifaneko yokufika komudo 2030 nokweeta po eemhito doilonga moshilongo.

Nenkavu ota ti, etulo lomuti ou meengulu domiti mounyuni aushe, otalika tumbalekifa Namibia, tashi pitile meandjaneko lomuti ou moilongo ya yooloka mounyuni.

 

 

1 COMMENT

LEAVE A REPLY

Please enter your comment!
Please enter your name here