Omudheuli gwoRundu Chiefs a hala oosipana dhokoNooli dhi longe nuudhiginini

0
276

 

UUKWANGULA – Omudheuli gwosipana yoRundu Chiefs, John Shikerete, ota indile oosipana dhokoNooli opo dhi kutheko oongaku opo dhi ete uudhano owundji kiitopolwa yokoNooli mbyoka ya kala ha yi liwa oshipungo ngele tashiya ketanga lyokoompadhi unene lyoliha yopombada.

Ndhika Shikerete okwa li edhi popile puudhano wo MTC Premier League pUukwangula ehuliloshiwike lyaziko konima sho osipana ye yali ya dhengemo osipana yo Young Chiefs nookoola mbali muyimwe.

Omudheuli nguka okwali a holola uukwawo wa nankali pamwe nosipana yoYoung Chiefs, ta ti osipana ndjika oyi na oonkondo na ina yi teka omukumo sho yali ya dhengelwa megumbo ko Rundu Chiefs, onkene okwe yi indile opo yi kondje yamanamo  oshoka oyina aadhani aawanawa nongele oya dhana nawa otayi vulu okumona omasindano omawaanawa ngoka taga ka nkondopaleka omuthika gwayo noku yi kaleka moliha ndjika yopombanda ethimbo ele.

Okwa ti osha simana ngele iitopolwa yokoNooli oyili ya kalelwapo koosipana odhindji oshoka shika otashi ka hwepopaleka omalweendo goosipana, ta ti oosipana odhindji odha za ashike miitopolwa yondingandinga yoshilongo unene tuu mOvenduka.

Okwa tsu wo omukumo oosipana ndhoka dhili koliha ontiyali opo dhi longe nuudhiginini opo dhi ka wayimine oYoung Chiefs noRundu Chiefs dhimwe dhomoosipana dhakalelapo oNooli yoshilongo koliha yopombanda.

Omudheuli gwo KK Palace Father Elemu okwa li wo a kunkilile aadhani yokiitopolwa yokoNooli opo ya kutheko uudhano nomaako agehe opo ya yambulepo omaudhano ngoka ga li ga yi ontuku konima shoo oosipana oonkulu Oshakati City na KK Palace dhali dha kanitha omahala gadho moliha yopombanda.

Ashike Elemu ota londodha Young Chiefs opo a tule egumbo lye melandulathano oshoka ngele hasho nena shoka sha kuthilemo KK na City moliha inashi kuta.

Ondzo yili popepi na Young Chiefs oye shi holola kutya yamwe yomaadhani yo Young Chiefs oya fa yena omitse dha tangalala na iha ya hala okwiiyutha komalombwelo gaadheuli naashika osha guma osipana unene.

Father Elemu okwa ti KK Palce ota longo nuudhiginini opo a wayimine Young Chiefs momumvo gwokatanga taguya.

Coach (Pic: Coach.jpg): Aadhani yoYoung Chiefs mokambindja okambulawu pethimbo yali ta ya dhana na Rundu Chiefs ta yi monika mokambindja okashunga Olyomakaya gazako pUukwangula.

 

LEAVE A REPLY

Please enter your comment!
Please enter your name here