Osho gali ehete Olyomakaya ga piti

0
360

 

EENHANA –  Olyomakaya ga ziko oonekandangala lyombandje oshowo ootaliwashele mboka yeshi oku tanga omagulu oyali ya longekidhilwa uudhano wowina wokumatuka, mono yali taya thigathanapo mondapo.

 

Uudhano mbuno owa li wa longekidhwa molwesiku lyaalongi nomwali mwa kuthwa ombinga kaanona yoomvula 8 sigo 18 oshowo kaagundjuka. Omuunganeki guudhano mbuka wokumatuka nokuli omudhindi gwoshifo sho Elegance Magazine, May Hikumwah  okwa li eshi yelitha kutya oya li ya longekidha uudhano mbuka okutetekela esiku lyaalongi, yo aanona ya kuthe ombinga noku nyanyukilwa pamwe nayakwawo.

 

Aamatuki oya li ya matuka iinano yi vulathane ngaashi oshinano shookilometa ntano, 15, 21 oshowo 42.2. Gabriel Shokonawa oye ali a kwatele komeho ethigathano ndika lyokumatuka ndyono lya lukilwa ngoloneya gwaHangwena Usko Nghaamwa.

 

Shokonawa pethimbo ta popitha aatondoki mbaka okwe ya tsu omukumo opo aluhe ya kale haya kutha ombinga momaudhano, yo ya tunge omalutu gawo manga yeli mepipi eshona, yo ya ka kale woo taya kalelepo oshilongo noku ulikwa aatondokidhingi moshilongo.

 

Aatondoki ayehe yali yakutha ombika miinano ayihe oyali ya pewa oomedalia sho ya kutha ombinga. Mookilometa 5 Bonifatius Daniel na Linda Johannes oyo yali yeya yotango noya pewa kehe gumwe ekopi oshowo oshimaliwa shoo500. Nghipande Moses na Shapwa Ndahafa oyali yeya aatiyali noya pewa ooN$300.

 

Shaama Tobias na Victoeia Dumeni oyali ya kangele ayehe mookilometa 15 noya pewa kehe gumwe ekopi oshowo ooN$600. Dumeni Frans na Kaulandwa Victoria oyali yeya aatiyali noya mono 400.

 

Mbono yali ya kutha ombinga moshinano shookilometa 21 oyali ya thigwapo ku Jason Samuel ngono a pewa ekopi nooN$700 omanga Hafyenanye Sem eya omutiyali nokwa pewa 500. Aamatuki ayehe mbaka oyali ya tondoka mondjila onene yaShigambo Eenhana yali ya kwatelwakomeho kopolisi.

 

Ngoloneya gwaHangwena Usko Nghaamwa okwa li a kumike aanona yi itulemo momaudhano goludhi ngaashi nduka  tuka, yo ya tunge omalutu gawo opo ga  kale ga kola nawa. Okwa li a pandula ewiliko lyo Elegance sho tali gandja uuwanawa moshigwana te ya indile ya ningile woo yalwe shoka ya ningile aakwashigwana yomOhangwena. Uudhano mbuno wa Nghaamwa Race okwa dhiladhilwa wu kale tawu ningwa omumvo kehe mekwatelokomeho lyoShokonawa Academy.

 

Caption (Pic: Nghaamwa marathonjpg .jpg): Aakuthimbinga muudhano woku tondoka wa Nghaamwa , taya tameke okumatuka yeli pamwe nomulongekidhi nomukwatelikomeho guudhano mbuka  ngaashi a tseyika nawa Gabriel Shokonawa.

 

Caption (Pic: Nghaamwa Usko.jpg): Ngoloneya gwOhangwena Usko Nghaamwa ta popitha aakuthimbinga petameko lyuudhano wokumatuka mboka we mu lukilwa wa li wa matukwa mondjila onene yopokati kOshigambo nEenhana Olyomakaya ga yi oya thanekwa na Gabriel Shokonawa oshowo May Hikumwa.

LEAVE A REPLY

Please enter your comment!
Please enter your name here