Ya tungathana megongalo lyaShitayi

0
338

 

OSHITAYI –  Konyala aagundjuka yeli ethele (100) megongalo lyaShitayi oyali ya longekidha esiku lyowina mono yali taya paathana uuyelele miipambele  yonkalamwenyo. Oshigongi shika oshali sha ningiwla mongeleka yegongalo lyaShitayi Olyomakaya ga piti.

 

Omuunganeki gwoshigongi shika shegandjo lyomauyelele Tomas Niilonga okwe shi yelitha kutya yo onga aagundjuka mOshitayi pamwe nokangundu kewiliko lyOshitayi Development Trust Fund oya li ya longekidha esiku ndika lyowina opo aagundjuka ya hangane yo ya paathane uuyelele wa pamba onkalamwenyo.

 

“Shino oshikando shotango ta tu longekidha oshigongi sholudhi nduka, notuna edhiladhilo opo tu kale aluhe hatu ningi oshigongi shika tse tu kundathane, ndino halyo tali kala etsakaneno lyetu ashike ota tu kala hatu hangana omumvo kehe, aagundjuka ayehe ya kolekwa oyo unene twa tala ombinga notwa hala oku kala ta tu yi moonkundathana dhaagundjuka,” Niilonga ta ti ngaaka.

 

Omusita omuwiliki megongalo lyaShitayi Lamek Nambahu okwa li a ningile aagundjuka mboka ya holoka otundimbiimbeli pamwe nomafatululo. Nambahu okwali a indile aagundjuka ya simaneke iipango omulongo, yo ya dhigininine eitaalo nuukriste wawo moka ya sha shelwa.

 

“Kaleni aagundjuka muna ongushu moshigwana, gandjeni oshiholelwa oshiwanawa kepipi eshona ne mu longe ashihe shoka mu uthwa mu longe methimbo lyuugundjuka weni, kaleni hamu holoka komalongelokalunga oshowo piigongi nga mbika opo mu tungathane naagundjuka ooyakweni, ne tamu tseya woo kutya etiloKalunga olyo ekota lyuunongo awuhe,” Nambahu ta gwedhapo ngaaka.

 

Omutaleli gwelongo mOnyaanya Gerhard Ndafenongo naye okwali woo a mono ompito opo a popithe aagundjuka pomuuhalo gwawo esiku ndyoka. Ndafenongo okwa li a kumike aagundjuka yi itule aluhe miilonga yawo, yo ya yande ookuume aawinayi mboka taye ya tula mondjila kaa yi na uuyelele.

 

Okwa indile aagundjuka ya  konge oompito dhilwe okukokola oondjila oompe ndhoka tadhi yambulapo oonkalamwenyo dhawo. “ ngele owi iyadha muudhigu kala una eidhidhimiko ngoye to itsu omukumo mwene kutya uudhigu mboka wuli muwo ka wu shi waaluhe ashike otawu hulu, kala omugundjuka ho galikana, naaluhe ningila yakweni uuwanawa mboka wa hala ye ku ningile, nena ngawo opo ashike onkalamwenyo tayi vulu okuya komeho nawa,” Ndafenongo ta gwedhapo ngaaka.

 

Ta kumike aagundjuka ya kale haya pukululathana, yo ya kwathathane moonkalamwenyo dhawo. Yo naya kale yeshi omikalo ndhoka yena okwiihumbata nadho ano omikalo dhopantu, ta ti inaya kala aagundjuka aashuni monima ihe naya kale haya longele Kalunga moshili , yo taya kala yena omalalakano moonkalamwenyo dhawo.

 

Selma Mbango gumwe gomaagundjuka mboka yali ya kutha ombinga  moshigongi shika okwa ti okwi ilongamo oshindji nokwa pandula ewiliko lyOshitayi Development Trust Fund sho tali kambadhala oku eta uuwanawa kaakwanegongalo yomOshitayi. Mbango ta indile aagundjuka mboka ihaaya holoka kiigongi yomauyelele ya kale haya holoka oshoka otaya thigwapo koshindji. Aagundjuka mboka yali ya holoka oyali ya kundathana nawa noya pewa oonzapo konima sho oshigongi shapu.

 

Caption (Pic: ßYouth Conference One.jpg; Youth Conference Two.jpg & Youth Conference Three.jpg): Ongundu yaagundjuka yomegongalo lya ELCIN mOshitayi ya thanekwa taya ulike oonzapo dhawo konima yoshigongi shesiku limwe moka ya li yi indungike Olyomakaya ga piti pegongalo lyaandjawo.

 

LEAVE A REPLY

Please enter your comment!
Please enter your name here