Etanga lya Somaeb komuzimbukilo lya ninginitha Scorpions

0
336

 

Windhoek-Ospana yetanga lyokoompadhi yopashigwana Brave Warriors oya dhenge ndjoka ya Gambia nokoola 2-1 muudhano wawo wopetameko okukondjela ompito yoku ka dhana methigathano lyekopi lyuuyuni  lyomumvo 2018.

Namibia okwa zi konima muudhano mbuka wa li pokapale ka Sam Nujoma moKatutura komatango gEtiyali oshiwike shika nokudhenga aamati yokuuninginino wAfrica nookoola mbali mu yimwe.

Ospana yo Brave Warriors oya li ya pumbwa okusindana opo yi kale nompito okuya kedhingoloko lya landulako. Onkene ospana ndjika oya tameke nuupenda ongo ndjoka ya tulilwa omuti peziko, sho ya ponokele ombinga yaakondjithi yawo , ominyama dhokoGambia okuza tuu nkene ohiya yotango ya hikwa komuhikihiya gopuushiinda wetu kuuzilo.Muudhano mbuka oospana ndhika mbali kehe yimwe oya li ya hala oku imonena ompito okuya kedhingoloko lya landulako okupita opo ya ka dhane muudhano woFIFA mo Russia omumvo 2018.

Aadhani yaNamibia oya li momizalo omitiligane  oya li yi ilongekidha okudhana yaana ezimbuko komeho gongundu oshona yaa yambidhidhi  mboka ya holoka kohi yomutenya itaagu idhidhimikilwa pokapale ka Sam Nujoma moKatutura.Elalakano lyaaKondji Omapenda olya li oku sindana.

Iilongo mbika iyali oya li ya dhana shithike pamwe konima yomasiku gatano moBanjul sha Gambia oshilongo shoka shakondekwa ku Senegal muuninginino wenenevi Afrika.

Aanegumbo oya li ya mono oompito odhindji dhokukala ya tulamo ookola, ngaashi ndjoka ya li ya monika ku Petrus Shitembi ngoka a piti mokati kaadhani yokonima ya Gambian ihe omudhani nguka ha tulamo ookoola shito okwa thangele etanga ndyoka kombanda yoshitenda.

Aayenda oya ka mona ompito okutulamo okoola ndjoka ya pewa omagano kaanegumbo sha landula sho aadhani yokonima pamwe nomukwati mokoola inaa ya longa nawa oku gamena okoola yawo. Omukwati gwa Namibia Max Mbaeva ineli kwata nawa nolya ka gwila komeho gomudhani gwa Gambia ngoka eli shunitha mokoola, nonando Mbaeva a li iinana oku li keelela, okwa li owala a kwata ombepo.

Omudhani gokonima Dennis Ngueza-Tjetjinda naye okwa li a mono ompito ando okutulamo okoola ihe  naye ina longa nawa sho etanga eli thanga lyaana omungunda. Konima owala yokathimbo omuthangi gwomatanga komeho mospana  ndjika Benson Shilongo naye okwa thanga etanga lya pola  konima sho  a li  pewa ndyoka ku Awilo Stephanus konima sho mbaka yaali ya li ya kala noku paathana etanga.

Oospana ndhika mbali odha kala dha nyengathana uule wethimbo oshoka aadhani ayehe yadho yokonima oya li ya tokola lela okugamena opo yaa tulilwemo nando okoola yimwe, komeho gospana ya Namibia okwa li ashike omudhani gumwe Shilongo ngoka oye a kala ta kondjo naamati yomithika omile nomalutu omanene yokGambia.

Namibia okwa tsikile noku hepitha oompito dhokutulamo omatanga sho Junior Gebhardt naye a hepitha ompito ndjoka sho a gandja etanga ku Shitembi ngoka eli palutha omanga mokoola mwa adhika owala oshoka omukwati gwa Gambia Alagie Nyabally okwa li kee wete kutya oku li lwaapeni.

Brave Warriors oya tsikile okuponokela Gambia pwaana oluthuwo naasho kwali ashike kuna ominute ntano uudhano wu ye pokafudho Stephanus okwa undulilemo etanga mokoola ya Gambia sha landula kepiyagano mokana nokoola yaaGambia, onkene oospana ndhika sho dha ka fudhapo kehe yimwe oya li nokoola yimwe.
Konima yokulombwelwa nawa komudheuli gwawo  Bucksy Mannetti , aadhani ya Namibia oya galuka pokafudho taya dhana neitulemo noneendelelo ya ponokele olundji ombinga yaGambia nolwa hugunina oonkambadhala dhawo odha yamukulwa sho Ballack Somaeb a thangelemo etanga ndyoka a li a pewa ku Shitembi sho aagameni yaGambia ya li ya topagulwa kokudhana kwaambaka yaali.Nongeyi Namibia okwa yi komeho nokoola neyalulo olya li okoola 2-1.

Okuya kwa Pikes Shalulile pehala lya Stephanus okwa hwameke oBrave Warriors no ya tameke oku talelapo ehala lyokoola ya Gambia omathimbo nomathimbo , ando ka shali uuhethi moku thangelamo ookoola ando ngiika Namibia okwa tulamo ookoola dhivule mbali.

Shalulile okwa li okwega monyama yaadhani yokonima ya Gambia  sho mbaka ya li ya nyengwa okumu keelela muudhano we . Manga uudhano inaa wu pwa Shitembi okwa li ta vulu okukala a tulamo ookoola ontiyali ndele okwa thanga etanga epu nonando osha li sha fa oshipu okuthangela ndyoka mokoola.

Kokoola ya Namibia, Mbaeva okwa li ena okwiinana lela opo a keelelemo etanga ndyoka lya li lya thangwa okuza popepi opo kaa li ye mo mokoola.

Namibia okwa hepitha oompito odhindji oku manitha uudhano ando moku tulamo ookoola ndele omatokolo gaa li mondjila oge eta ehepeko lyoompito ndhoka, onkene pehulilo uudhano owa hulu 2-1.

Aadhani yo Brave Warriors oya li: Max “Slimkat” Mbaeva, Dennis “Law” Ngueza-Tjetjinda, Willem “Dudes” Mwedihanga, Chris Katjiukua, Ananias Junior Gebhardt, Ronald “Stigga”Ketjijere (capt), Awilo “Rakhale” Stephanus (Shalulile), Wangu Batista-Gome, Benson “Styles” Shilongo (Somaeb), Deon Hotto-Kavendjii, Petrus “Dancing Shoes” Shitembi (Iimbodi).

 

LEAVE A REPLY

Please enter your comment!
Please enter your name here