Peter Ekandjo ondume yomomufitu: Oku galukila koVenduka 

0
540
Peter Jungle Fighter

 OMBAYE onde yi thigipo noku shuna koVenduka muMai 1985, opo ndi ka tsikile niilonga yandje. Shika osha ningi oshikando oshitiyali tandi kala moVenduka oshilandopangelo shevi lya li muukoloni.Mokuthika kwandje moVenduka nokambesa onda yi kaandja hailwa Shityeni ngoka a taamba ndje nenyanyu  nomombepo yuuhailwa. Pehala lyoku mu hokololela kutya onda li kOmbaye onde mu lombwele kutya onda li koAngola oshowo onde mu pe omakundo ngoka ga zi kewiliko lyoSWAPO. Onde mu lombwele kutya  ewiliko lyoSWAPO moAngola olya nyanyukwa molwashoka okwa kwatha ndje. Onda tokola okulongitha ehokololo ndika opo ndi koleke einekelo pokati ketu na hailwa Shityeni. Kandali nda hala a dhiladhile kutya ngame onda li ashike tandi endagula  moshilongo ndaa na elalakano lyasha.

Sho nda popi na ye onda koneke nkene a li ta komona komutse moku zimina oohapu dhandje. Pehulilo onde mu lombwele kutya itandi kala po  ethimbo ele puye oshoka ondina okushuna koAngola. Onda li ndu uvite nondi wete ena omapulo ogendji kutya onda li naanaa tandi ningi shike moVenduka nonando ye ina pula nando olimwe lyomomapulo ngoka.

Methimbo efupi ndyoka nda kala moVenduka onda tsikile okupanga uukuume oshowo okukoleka mboka nda adhika nda tungapo nale unene tuu naantu mboka ndali nda tsakanene na yo metalelopo lyandje lyotango moshilando shoka. Oshikwawo onda nenepeke omakwatathano yambidhidho gandje.

Mokukala  olutiyali moVenduka onda li nda yi kelongeloKalunga tali ningwa kOmubisofi Zephani Kameeta mongeleka yEvangeli paLutheri moKatutura. Onda li nda kala momalongeloKalunga ge iikando iyali moka ndi ilongo  euvitho lyohapu yOmuwa opamwe  nopolitika yemanguluko. Omubisofi Kameeta okwa li omuuvithi e na omukumo sho uuvitha opolitika yemanguluko megongalo.

Kameeta okwa uvitha opolitika yemanguluko montaneho yaakwanegongalo yamwe yomuyo tashi vulika ya li ya tumwa komutondi. Okwa li wo gumwe gwomaa uvithi mboka ya hwahwameke aantu opo ya tsondumbo nokwaana uuyuki kwepangelo lyokakombo noludhi lya South Africa. Onkene omumati nguka gwoshilongo shomapendafule okwa ka pewa oshipundi oshitiyali muupopi momutumba gwopashigwana moNamibia ya manguluka molwuupenda we sho a kala nokulombwela oshigwana shi igameke kekondjelomanguluko.

Mokukala kwandje moVenduka oshikando shika onde shi pondola okumona omahala ngoka ta ga vulu okutegwa oomboma kaakwiita yoguerrilla yomiilando. Gamwe ngaka ge nasha negameno oga li ga we ya nomukwiita gwoguerrilla ota vulu okutegapo omboma no inaa monika. Mokati kaa ngaka omwali etungo lyaakwiita ndyoka pethimbo ndika olyo oombelewa oonene dhetanga lyegameno lya Namibia. Onda li nda mono kutya oshipu okutega omboma mehala lyokuthikameka iihauto ndyoka lili kohi yetungo ndyoka, nopwaana ngoka ta mono po sha oshoka aakwiita mboka ya li metonatelo lyokugamena etungo ndika oya li yaanakonasha. Egameno okuya metungo ndyoka kalya li lya kola nenge andola tu tye lya kwata miiti. Oshoka omuntu kehe oha ethiwa ashike a yemo no inaa hadhwa.

Onda li wo nda talelepo osasiona yopolisi moKatutura oshowo mocentral naampaka onda ndhindhilike kutya egameno kalya li lya kwata miiti. Iiyodhekwa yimwe yokuhomonwa kaakwiita yoguerrillla oya kwatelamo iiyenditho yaakwiita naapolisi. Manga inaandi shuna koAngola mu June 1985 onda li nda gwanithapo shoka ndali nda tumwa okulonga meni lyaNamibia.

Okuza koVenduka onda yi manga kombelewa yandje hoka nda holeka ondjembo yandje yoMakalov omanga inaandi ya ketsakaneno lyetu nahailwa Mupupa.Ombelewa ndjika ya li oshiholekwa shi shiwike ashike kungame oya li mOnakamwandi, muka omo handi pungula iinima ayihe yihe kombinga yiinakugwanithwa yandje.Omo wo ndali handi pungula ondjembo yandje yopeke, ndjoka nda li ashike handi longitha okwiigamena uuna sha pumbiwa unene tuu sho oshitopolwa shuumbangalantu sha li shuudha aalongithwa yaakwiita yomukolonyeki.

Otwa li tu uvathana nahailwa Mupupa opo tu tsakanene pOihole momasiku 5 Juli 1985. Ngaashi shito ongame nda thikipo tango pomukunda ngoka, ndeyapo mesiku 4 lya Juli 1985 noku fala omatumwalaka , mpoka twali tuuvathana ga tulwe.

Onda adha nale hailwa Mupupa na ye a thika pehala mpaka. Onda li ndu uvite nawa okukundana kutya okuli moshitopolwa ngiika a holama miihwa popepi. Ngame onda li nda hala okuuva kombinga yaashoka ewiliko lyuukwiita tali dhiladhila. Manga nda li nda tegelela Mupupa onda yi ndi ka talelepo oofumvikila dhiikuti noondjembo dhandje ndhoka ongame andike ndi dhi shi kutya odha holekwa peni.

Ondu uhala omutenya aguhe nda tegelela miihwa molwashoka onkalo yegameno kaya li yili, nawa pethimbo ndyoka unene tuu molwiiponekela mbyoka ya li tayi ningwa komutondi mbulu.

Omanga etango inaali ningina ye hailwa Mupupa  oteya uuka kungame ta ziilile muuninginino. Ngame inandi ya ndi ke mu tsakaneke mbala. Sho a thigipo egumbo moka a li ta ziilile, ngame onda zimo woo miihwa naatuhe kapwali ngoka iinekela mukwawo onkene ye okwa tula ondjembo ye komalwilo a fa a hala okuumba ndje. Ngame nonda gandja endhindhiliko lyombili ndyoka twa li tuuvathana okuulukilathana uuna twa tsakanene.

Okuza mpoka otwa yi miihwa yomuule moka twa kala noku kundathana.

Moonkundathana dhetu onda thaneke opo ewiliko li lande uumbesa uyali opo mbuka wu kale tau longithwa moku enditha ndje oshowo moku enditha aakwiita yoguerrilla yomiilando. Onda thaneke kutya uumbesa mbuka otau kala wo hau longithwa okufaalela aantu, yo aahingi yawo taya futwa niimaliwa mbyoka mbuka tau eta moku faalela aantu komahala ga yooloka moshilongo. Oshikwawo shasimana moonkundathana dhetu osha li kombinga yoku kwatwa kwa Peter Michael gumwe gwomutse yatatu mboka twali twa tumwa miilonga mbika moNamibia.

Nguka okwa li a kwatelwa muuninginino waShakati. Onkene hailwa Mupupa okwa londodha ndje opo ndi kale nda kotoka ndaa pite moobloka dhomoondjila oshoka otashi vulika nguka opo a kale a tulwa mpoka oku konenena noku tala ngele ota dhimbulula nando ogumwe gwaa kondjelimanguluko. Mboka twali twa tumwa miilonga mbika otwa li yatatu, ngame, Peter Michael oshowo Mathwes. Tse na Michael otwali twa longo omasiku gontumba omanga Mathews okwa li ashike a dhipagwa omasiku omashona pethimbo a thiki moshilongo oku tameka iilonga ye opo ihe Michael okwa ka kwata konima yoomwedhi ndatu okukala moNamibia.

Miilonga yandje ngame onda kala ndi ilongekidhila shaashoka, kutya eso nenge omwenyo unene tuu sho ngame nda li nda piti momalugodhi omalulu no inaandi sa sigo opethimbo ndyoka. Konima yoonkundathana dhetu naHailwa Mupupa ngame onda shuna moNamibia, nda yi nduukilila kOndangwa oku ka londa okambesa ndi ye kOshaanda. Ihe huka inandi ka thikako mbala omolwonkalo yiita pethimbo ndyoka.

LEAVE A REPLY

Please enter your comment!
Please enter your name here