Tsikeni omiti dha gwana

0
325

 

ONYAANYA – Etitano kehe lyoshiwike oshitiyali shaKotoba olya thanekwa olyo li kale esiku lyokutsika omiti moshilongo. Metitano lyaziko osekundeskola ya Uukule oyali ya longekidha esiku ndika mono yali ya taambako omiti ndhoka yali ya pewa kehangano lyo Environmental Investment Fund (EIF).

Ehangano ndika olyali lya gandja omagano gomiti oshowo yilwe koskola ndjika, ngono gena ongushu yoshimaliwa shooN$10 000. Pethimbo ta gandja omiti ndhika omukalelipo gwehangano ndika  Lazarus Nafidi okwali a hwahwameke aanaskola ya tsikile nokutsika omiti, yo ya tseye uuwanawa mboka taya adha momiti.

Nafidi ta ti omiti ohadhi eta uuwanawa owundji ngaashi ohadhi eta opo omvula yi loke nawa, iiyimati mbyoka tayi vulu okulandithwapo yo tayi eta omboloto poshitaafula, omunzile nosho tuu.  Ta ti momidhingoloko adhihe omwa pumbwa okutsikwa iimeno ko ku yandwe embugaleko moshilongo.

Dhimwe dhomomiti ndhoka dhali dha gandjwa kehangano ndika ongaashi omakwaava oshowo omamango. Nafidi okwa ti  oya gandja omiti dhili 25 koskola yaUukule, 25 kOnamulunga oshowo dhili 25 kOmusati. Ta ti shino oshikando shotango taya gandja omiti koosikola mo 2015.

Ongundu yaanaskola ndjoka yi lilepo egameno lyuunshitwe oshowo omidhingoloko pamwe nomulongi gwawo Laimi Elifas oyali ya taambako omiti ndhika ya pewa. Noya holola olupandu lwawo taya ti otaya kambadhala ngaashi taya vulu opo ya kalekepo omiti ndhika dho dhi yape iiyimati monakuyiwa.

Kansela gwoshikandjohogololo Onyaanya, Petrus Kambala oye ali a tsike omuti gwotango moshikunino shoka sha  tulilwapo owina opo shi tsikwe omiti ndhoka dha gandjwa kehangano ndyoka li lilepo okugandja omakwatho gomiti oshowo yilwe ya pamba omidhingoloko nuunshitwe.

Kansela Kambala pethimbo ta tsike omuti gotango okwali a kumike ayehe ya tsikile okutsika omiti, yo ya yande embugaleko ndyono tati otali eta omutenya moshilongo. Okwa indile woo aanona ya kale noku tsika omiti komagumbo yo ya lombwele noku tseyithila aavali uuwanawa mboka tau adhika momiti dhi ili nodhi ili.

Okwa pandula ehangano ndika sho tali andjakaneke nokukwashilipaleka kutya omidhingoloko nuushitwe owa kalekwapo ngaashi wuna okukala. Ta ti omiti nadhi tsikwe ngaashi tashi vulika, sho oshilongo shi kale shina ombepo tayi pepe oombinga adhihe omolwa omiti ndhoka dha tsikwa pomahala pomahala.

Arbor

LEAVE A REPLY

Please enter your comment!
Please enter your name here