Va pandula elelo, nova hala exumokomwesho la wedwa po

0
378

 

Lüderitz – Efimbo eli tuli paife olo pexulilo loshikako sheedula nhano sho valeli voikandjo hoololwa, oshoyo omalelo eedoolopa.  Omahoololo oo twa taalela taa ka ningwa mu Novemba 2015 otaa ka eta oshidjemo shaavo tava ka  lela eedoolopa oshoyo oikandjo hoololwa oule weedula nhano twa finda.

Kundana okwa mona omhito opo aye meenghundafana no vanyasha va tatu vomodoolopa yaLüderitz. Nakambale Shikale, Loide Sheehama oshoyo Johannes Kashimba, aveshe ava ota va ka etapo osho vewete sha longwapo kelelo lo doolopa ya Lüderitz, oshoyo osho sha longwapo kelelo loshikandjo hoololwa sha !Nami#nus.

Meenghundafana omo tuu omo aveshe ava otava ka yandja omayele aasho va hala, shika longwe kelelo olo tali kaya koshipundi.

Shikale okwa pandula elelo olo lili koshipudi paife, eshi le shipondola okumonena ovanyasha vahapu oilonga.

Okwa pandula eepate odo da tungwa modoolopa, no doolopa ota tumbula kutya odoolopa otai monika yayela nawa.

Kombinga yomaumbo, Shikale okwa tumbula kutya omaumbo mahapu okwa tungwa modoolopa , navahapu nande haaveshe ovamona omaumbo.

Omayele a Shikale kelelo olo tali kaya koshipundi,otai ndile ovaleli vakaye lela meenghundafana novapindiki opo vaete eefitola doikulya naado doidjalomwa kodoolopa yokomunghulofuta ko Lüderitz., te di tumbula komadina ngaashi oShoprite, Jet Legit Edgars nadikwao.

Loide Sheehama okuli omunangeshefa wopetameko modoolopa ya Lüderitz okwa tumbula kutya elelo olo lili koshipundi ole shi pondola oku tunga omaumbo,na vahapu ova mona omaumbo.

Kombinga yeengeshefa dinini kewete naana kwa longwa sha. Omayele ena oyoo kutya, ovo tava kaya koshipundi nava ka tameke tava ningi oyoongalele opo va ude oku dja kovanangeshefa voovene kutya oshike naana va hala va ningilwe.

Sheehama ta tumbula kutya okwa hala elelo olo tali kaya koshipundi lika kendabale noku yandja omavatelo opashimaliwa opo vadule oku yambulapo eengeshefa davo.

“Ko Lüderitz oku otuliko naana tuli konima, unene tuu ngee tashiya kovanangeshefa vanini, fyee otwa hala vetu tungile omatala okulandifila taa wapalele onghalo you kwatya  woomhepo shaashi mo doolopa yetu omhepo ohaipepe nai,” Sheehama osho ayelifa.

Johannes Kashimba okwa tumbula kutya elelo lodoolopa ya Lüderitz ole shipondola oku hanaunapo oshiingela, nomaumbo mahapu okwa tungwa modoolopa.

Okwa pandula kelelo eshi la kala noku yandja omavatelo kwaavo vapilwa eebashu davo. Ta tumbula kutya okwa tungwa eenhele dokudanaukila ounona momalukanda ayooloka mo Lüderitz.

Kashimba okwa tumbula kutya elelo loshikandjohoololwa sha !Nami#nus oleshipondola okutunga okila yomidimba no ombeka yeemboloto mo Aus ,konima eshi ovanhu vomomukunda o Aus vakala hava ende eekilometer 120 oku uya valande eemboloto ko Lüderitz, osho yo oku eta omufi wavo ko Lüderitz.

“Mo Aus omwa tungwa ondama yakula yohanya oyo tai ka kombamo filu omukalo wokulongifa oundjuo vomavela,” Kashimba ta yelifa.

Omayele kelelo olo tali ka ya koshipundi, Kashimba okwa tumbula kutya na va kale unene komukundu womaumbo, opo ovanhu ava hava mono oiyemo ili pedu navo yoo va dule okumonenwa omaumbo eva yeleka.

“Oshinima shinene twa hala modoolopa ya Lüderitz Omoola , ngee hatutale meedolopa dayooloka moshilongo, omwa tungwa eemoola, dina eefitola dayooloka,  ngeno exumo komesho eli  oleetwe  yoo kodoolopa yetu, ngeno ohatu dulu oku tumbula kutya odoolopa otai yambukapo,” Kashimba osho a tumbula.

Kashimba ota yandje omayele kelelo olo tali ka ya koshipundi opo li tale koshipangeleo shepangelo sha Lüderitz, omo a tumbula kutya oshipangelo oha shi kala shi yadi unene ovanaudu, nokuwete kutya eendokotola  odo dilimo, oda pumbwa oku wedelwa  .

Ta tumbula kutya olukanda lo Area 7 mo Lüderitz olukanda la kula nolina ovakalimo va hapu, onghene Kashimba oku wete osha pumbiwa mu kale eeKindergarten dili mbali.

 

 

LEAVE A REPLY

Please enter your comment!
Please enter your name here