Tuyeni kolupale la Tuyeni: Ovapangi vaNamibia –ovanahambo xwepo vali momikalo

0
574

 

Ame tete onda hala okupandula ovapangi aveshe vomoshilongo shetu okudja ngo kounona wavo ndele nafiyo osheshi hatupopi ngaha, vanhu vaKalunga, ovakulunhu veni okwa li vemu tuma keeshikola dopedu ndele nafiyo tamu ka dilongela keefikola dopombada nokumana omalongo eni ayeshe omolwa omaano eni aa kwali mwa pewa kutate Kalunga.

Ngeno okwali ngo ounyuni hau shuna konima, oshili ngeno ovapangi vomoshilongo shetu vomefimbo lopaife ngeno otava tale nghee ovapangi vakulu va kala nokuluumbatela ovanaudu moipangelo yo shilongo shetu shaNamibia omo.

Vatekulu vange nye ovapangi vomoipangelo ta mu panga oshiwana shaKalunga, otamu lundilwa nee koshiwana shaNamibia tashiti nye itamu li umbatele nande ovanaudu ava veli moipangelo nawa ngaashi shina okukala . Ovanaudu vamwe mefimbo lopaife otaku hokololwa hava kala va tila koipangelo ndele oshili vati omolwa ngo omikalo deni itadinuwa omeya moipangelo omo nonande nye mweya ngo vati okulongela oshiwana.

Ame oshili ngeno okwali ngo handi tumwa nande okomunhu ngeenge handi popi nanye pamishangwa ngaashi ngaha, ondishishi nale kutya nye ngeno ohamu ulange tamu ti ame oshiveli sheemote. Ilo nande okwali ngo handi futwa nande okuli natango ngeno ohamuti ashike okaana okehole omaliko oko. Oshomuwete hakakala takapopi oinima yetu ei hatukala hatuningi naai inaaka tumwa, omote ngo mbela yadalwa kuina naxe shili.

Vanamibia vakwetu opo tutungeni oshilongo ongeenge hatu tungifa eedopi inadi pilama, vatekulu vange, ame ondili oupafi okufudulamo eefudika edi mwa kala mwa fudika inamu hala dimonike. Natango ame ondeli longekinda okupoya eshi mwakala hamu ningi inamu hala shipopiwe, ashike ondimu hole amushe inamu shidimbwa nande.

Oupyakadi wakula ohau holoka pokati kovanaudu novapangi ovo hava kala moilonga efimbo olo tu olo. Oshili ohashi kala shafa ondjodi nefimbo limwe ototi mutu pamwe omahepu eehena oukwashili. Ove utye ngo napamwe ohava kala tavadana nande oinyandwa. Ovamwameme hano, naava hamuxukula omahodi diva kukala ngo inokufako kokutiwe otoxunhu tokwena poima inapafiwa.

Oshili vakwetu omahokolo aa haakala taatongwa koshiwana okuna ngo shili oukwashili, shapo oshiwa manga opeyi yeni istope nye mu kale tamuli nande omomakulo omo eemwedi nhatu. Oikulya yaamo nayo omweeika nayo ohamwi itwalele komaumbo mewiliko lovateleki ovo havateleke.

Meulu omo ngeenge omuna ngo shili oheli ei haitongwa, onda twa ondjodi omupangi eli moheli tapi eli moikutu itoka ta ingida omunaudu emu diminepo.

Omahokololo taa tilifa oo otaa kumwifa otaku popiwa ngaha, ovanaudu otava pula ovapangi shinasha nomauhaku avo, ashike ovapangi ngeenge tava nyamukula ongaashi naana ovakolonyeki pefimbo loukoloni. Vakwetu tu popile ni ovadjali voikutu itoka.

Oshili vakwetu ovapangi ava nge tava i koipangelo, ihava ka yakula shili ovanaudu ndele ohava kakala tava tuku ovanaudu nokuva ula oidilikwatya taidi momakanya avo, nonande ava ovo vapumbwa okuvapa ekwafo otaku popiwa kutya ovapangi ava ohavakala ashike vapwila meecellphona davo tava ningi eesms novaholike vavo ava vafiya komaumbo, omanga ovanaudu tava muka tava hale okufila moipudi poima pena ovapangi.
Ame mwene onga Omunamibia ohandi kala moipangelo handi tale nomesho ame handi pwilikinifa omatwi ndele oshili eendaka ngo handi kala tadidi momakanya ovapangi oshili shapo oto hale utye mbela pamwe oitopifa ya longwa mo China. Oshili ovapangi ava kavena omaxwili keemwenyo davo, nomitima edi dili momalutu avo otohale okutya mbela ngeno okwali eeloli ngeno omambakumbaku.

Vakwetu oomeekulu notatekulu ava mwali ovapangi vakulu ngeenge opo muli muna omwenyo indeni utale muka tale moipangelo omo, eshi oshiwana shaNamibia tashi umbwa eevenda ovanhu va fa tava umbu omauta anangongo. Oixuna shili tailongwa komaludalo oo mwafiya moilonga vati opo vadi keefikola. Oshili ounona ava kaveshi ovapangi shili ndele otavakongo ashike oimaliwa molwaashi ovalongwa vetudule aayee kohambo xwepo vakavende eengobe shapo.

Vamwameme vaholike, dimbukweni kutya ouhaku wotete ondaka yomokanya ngeenge oitalala nokonima ove toxwelamo ne nawa eepela, nongeenge eshi hasho wa tetekele nasho, oshili kashidjuu umone omunaudu eepela tedi kunguko ove to tameke ne to tukana nawa osho shaashi osho mwafa mwelilongela.

Otakulopotwa oiningwanima oufiku nomutenya tainingilwa moipangelo yoshilongo shetu, eshi ovanaudu vamwe havafile moipundi nomeelaina omanga ovapangi havakala tava taleko inaave vapa nande olo ekwafo lasha, oomeme tava mono ounona natango otakutiwa ohava kala tee ve limonifa voovene omanga ovapangi hava kala ta vali eenyadi neembe odo va etelwa kuvakwao naashi ohasheeta vamwe vomounona opo tava dalwa vapitililepo.

Vanhu vaKalunga ngeenge itamu shendje vaholike, dimbulukeni kutya Namibia oletweni atusheni, nakeshe umwe ouna oufemba okuninga eshi wa hala mofalama yoye, ndele hapeenele doshiwana tuna okukala hatu popile eshi twa hala nande molwaashi oshanyika oshiponga koshiwana shetu shokomongula. Tangi unene shiwana inamu ninga omwenyo mwii.

* Omadilaadilo aa oomunyoli yee mwene ndele kaeshi aKundana. John ya Tuyeni, 0812988549, mrtuyeni76@gmail.com

 

LEAVE A REPLY

Please enter your comment!
Please enter your name here