Ohatu kwata oondjembo dhetu nuuhasha

0
352

Ethimbo onena opo Namibia eetepo oveta ndjoka tayi thiminike ooyene yoondjembo ya ka dheulwe nkene taya  longo noondjembo dhawo . Okanona komimvo ne otatu ti okahanona oshoka omunamimvo ne ina gwana noku taambwa moGrade 1, oshoka omutse gwe neuveko lye ina li ya komeho natango. Onkene nguka ita vulu okupulwa okuguma ondjembo. Nenge oku lombwelwa opo ondjembo ndjoka eyi tule pehala  li na egameno.

Osho ohoni onene kutya omuntu okwa si. Omwenyo ogwa kanithwa kuyele lyo ezimo olili moosa.

Ihe shika itashi tu kutha oshinakugwanithwa shoku soshimpwiyu kutya otwa pumbwa okutalulula onkalelo yetu yokukwata oondjembo nuuhasha kutya omokati kaantu nenge paumwene momagumbo nomoombelewa dhetu.Shika osha simana unene uuna pehala mpoka pena aanona. Oshiningwanima shika osha faathana  niiningwanima iikwawo mbyoka ya ningilwe monakuziwa, sho iiponga yoondjembo hayi ningwa omathimbo nomathimbo moNamibia. Mpaka otapa landula iiholelwa moka aanona yomimvo kohi yomulongo ya ningi iihakanwa omoluuhasha waakuluntu yawo nenge ya si omoluuhasha woohe nooyina nenge ya dhipaga shaa shi owina omoluuhasha tuu mbo.

Mu Novemba 2013 omunona gwomimvo ndatu okwa li anuwa a ya ha okusa omuniilonga gwomofaalama omunamimvo omilongo 36, emu yaha pamupya nondjembo ya he yuukongo momudhingoloko gwaKahandja.Omuniilonga nguka pethimbo a yahwa okwa li a thikama konima yosheenditho shomuhona gwe pethimbo okanona hoka anuwa ka yi mohauto nokuhila monkandja yondjembo pashiponga oshikuti osha yaha omuniilonga ngoka a sile pehala ndyoka .

Mu Septemba 2013 moWalvis Bay omunona gwomimvo hetatu okwa li a dhipagwa anuwa ku he omanga ye  kotha.He yomunona nguka okwa li ena ondjembo meke  omanga ya li taya nu mondunda yi li popepi nondunda yanakusa ngoka. Oya li yena opaati pegumbo.

Omusholondondo gwiiningwanima yuuhasha mokukwata oondjembo itagu pu ogwa tsikila.Omukuluntu ota inekelele ngiini omunona gwomimvo dhili kohi yantano a longe nondjembo?Oshigwana ihashi inekelele nando omuntu moshigwana  a longe nondjembo shila ongele ngoka a dheulwa okulonga nondjembo.Onkene otuna oku ipula kutya aanona mbaka otaya ka putuka nokukoka ngiini monakuyiwa, sho tashi vulika ya ka kale mevundakano, oshoka otaya ka pumbwa okuhungwomwenyo omolwa edhipago  ndyoka ya ningile omanga ya li aashona.

Aantu oyendji ohaya yahwa pamupya molwashoka ondjembo kaya li ya pungulwa nawa, nenge omuntu ota ende nondjembo yi na iikuti momulungu, ngaashi poohango nenge pomafumviko yo inaa yi patwa oshikuti shaa nukeko pamupya.

Omahokololo oga ninga wo ogendji gaantu ya yonukile miihauto oshoka mboka ya li taya vulu oku ya kwatha oya kala ya thikama kokule, molwasho mosheenditho otamu zi iikuti yoondjembo yuuka koombinga adhihe.Nenge inda utale mpoka hapa londelwa uumbesa wuuka kOshakati okuza koWalvis Bay, moVenduka , noshowo oLindili, oto vulu okuyalula aafaalelwa oyendji taya londo muumbesa moka ya humbata oondjembo ndhoka omangandjina gadho giikuti haga kala guudha iikuti oshowo oshikuti shimwe shi momulungu.

Pomathimbo ngaka aantu oyena uumbanda okuhedha popepi niihauto ya hwama omulilo nenge ohauto ndjoka ya ninga oshiponga oshinene , ya tila kutya pamwe otashi vulika aakalimo ya li yena oondjembo ndhoka tadhi vulu oku iyumba pamupya noku ya ehameka nenge oku ya dhipaga omanga yo taya kambadhala oku kwatha.

Kashina mbudhi kutya ooyene yoondjembo oyena oombapila dhadho.Epulo oondika kutya osha pumbiwa ngaa opo aantu yeli yatano nenge yevulepo ya kale ya homata oombistoli mokambesa haka ende aantu 12. Aantu mbaka yiihomateka oyena tuu esiku limwe ya dhiladhilile kombinga yegameno lyaafaalelwa ooyakwawo, ngele osheenditho shoka oshimone oshipongaa?Oshoka ngele shoka osha ningwa aantu otashi vulika itaa ka vula okuhupithwa omolwiikuti mbyoka tashi vulika yi kale tayi zi koondjembo ndhoka.

 

LEAVE A REPLY

Please enter your comment!
Please enter your name here