Otjikaoko sha dhimbulukwa omimvo 20

0
301

OPUWO – Oshigwana sholudhi lwa tseyika Otjikaoko moshitopolwa shaKunene osha li sha dhimbulukwa omimvo omilongo mbali dhaawiliki yawo yopahedhi.

Aantu omathele oya li ya gongala pOkarundukozombanganu okuza Etine lyayi okudhimbulukwa aawiliki yawo yatano mboka ya fumvikwa kondungu yondundu  pehala ndyoka lyaa li naanaa kokule nOpuwo.

Aawiliki yopamuthigululwakalo mboka ya fumvikwa mpoka omwa kwatelwa Mbumbiazo ngoka oye gotango okufumvikwa pondundu ndjoka,  Wazengo Nderura, Jazemi Muharuka, Kaumanuka Japuhua oshowo omuwiliki  Hiazomangua Muharuka.

Pahapu dha Kavari Muharuka, omwanamati gwa nakusa Mbumbiazo Muharuka ngoka wo a fumvikwa mpoka pomawendo gopOkarundukozombanganu, aawiliki naakwatelikomeho mbaka otaya dhimbulukiwa omoluupenda  wawo niilonga yawo mbyoka ya longo opo Namibia li mone emanguluko. Aawiliki mbaka oya li ya tsondumbo  nepangelo lyuukoloni okuza tuu omumvo 1904.

Yalwe mboka ya li ya holoka poshiithanene shika oya kwatelamo omugandjimayele gowina gwaNgoloneya ya Kunene Omusamane, Katutire Kaura ngoka a lombwele Kundana kutya aawiliki mbaka oya li ya kondjo pamwe naawiliki yalwe yaaHerero mwa kwatelwa Hosea Kutako, Clemens Kapuuo osho wo nee omuwiliki Kuaima Riruako.

“Mbaka otaya kwatelwa mokati kaantu mboka ya kondjitha omathaneko nomilandu dha Odendaal. Pamilandu ndhoka Namibia olya li lya tendwa momavigumbo moka aavelelwamo noo yene yevi ndika ya thiminikilwa oku kala, omanga omahala omanene gevi ewanawa ga pewa po aana naatekulu yaa kolonyeki.Omuwiliki Munimuroro Kapika okwa yile ko Aminus okutsakaneka ,Hosea Kutako nokwa li a etelele oshitetela shelapi ongo endhindhiliko lyelongelokumwe  mokukondjitha uukoloni,” Kaura a ti.

Kaura okwa ti pethimbo lyiituthi yomadhimbuluko ngaashi shika  oshigwana ohashi gongala noku kundathana iinima mbyoka ye shi guma nenge mbyoka ta yi shi gumu pethimbo ndyoka .

“Aantu oha ya popi kombinga yonakuziwa oshowo yonakuyiwa, shi ikwatelela konkalo moka yi iyadha ngaashi ndi tye onkalo yoluteni nondjala,” osho a ti.

Pahapu dha Kaura, oholomende okwa li ha yi gandja omakwatho gokweenditha iimuna kaanafaalama  uuna ndoka mbaka taya ka landithapo iimuna yawo.Ihe molwashoka ngashingeyi okuna omukithi gwekondo nelaka, uuwanawa mbuka owa kuthwapo.

Iinyangadhalwa ya kwatelamo omaudhano gopamuthigululwakalo oya li wo yi ipyakidhilwa na yo poshituthi shoka, sha thikile pehulilo Osoondaha ya piti.

 

LEAVE A REPLY

Please enter your comment!
Please enter your name here