Ovahongifikola momomeva mapyu molwedengo lounona

0
445

 

ONGWEDIVA – Ovalongifikola veli 11 pofikola Okankolo otashi dulika veke lihange monghuo ina onghambe sha landula omakonaakono opolifi oo a holola kutya ova hepeka nokuehameka kolutu, ounona veli omugoyi pofikola yavo.

Ouyelele oo wa yandjwa kuKakukutu kOmatanga Opolifi mOshikoto Anna-Marie Nainda oo ta ti ovalongi ava vati ohava fininike ounona opo va kale eombe, edimo ina li kuma pedu (vafa tava ningi omadeo opush-up) voo veli kwetelele nee koodopi nomimwe, va tonya eenyala.

Ngee okaana oka tameke okukakama molwa eloloko nouehame tau etwa kodopi oyo i kukutu, otaka dengwa.

“Oveta oya yela kutya hamuhongi vali a pe okaana ehandukilo lokudenga ile okunyenyepeka olutu, ashike ovalongi vOkokankolo mwa kwatelwa omukulunhufikola vati ovo tava hepeke ounona,” Nainda ta ti.

Nainda okwa ti, opolifi konima yomakonaakono, oya tula oshibofa momake omweetipo woihokolola wepangelo, opo ku talike kutya ovahongifikola ovo ota va ningwa ngahelipi.

Nonande onghalo ei i nyanyalifa oye uyile pouyelele eshi okaana kamwe kokofikola oyo ka hangwa noipute noka hokololela oikundaneki kutya oka hepekwa kovahongi pofikola, omakonaakono opolifi konima okwa ka holola kutya omuvalu wounona ovo va hepekwa kovahongi pofikola opo mboli omuhapu. Mongudu yovahongi veli 11 ovo tava fekelwa nova kwatelwa mo moikulumuna ei, omwa kwatelwa omukulunhufikola.

Ngeenge Omuetipo woihokolola wepangelo okwa tokola kutya ovahongi ovo nava pangulwe otashi dulika oomestela nooyefulou ava veke li hange konima yekumba.

Komishina Nainda ta hokolola kutya ovanambelewa vadja koshitai shopolifi shilile po oukashike kookanhu, ova dimbulula nghene ounona ovo vena oipute noivadi ya etifwa koludi lii lehandukilo vati hali ningilwa ounona. Oipute imwe oya ningwa keedopi, imwe vati oya ningwa kokudengwa noipambu yominino.

Otaku hokololwa va kala nokudenga ounona vofikola, nokuvapa omahandukilo taa nyenyepeke olutu. Vati eshi ova kala have shi ningile ounona voumati pofikola opo tuu opo. Ina shi shivika kutya omolwashike ounona voukadona iha va hepekwa ngaho.

Eshi ovapolifi va pulaapula, ounona voukadona vati oveva hokololela nghene va kala hava tale eshi ovanafikola vakwao tava hepekwa kovahongi.

Omahokololo amwe otaa hokolola kutya ofikola oina po okangulu konhumba, have ka longifa onga odolongo omo hava patele ounona oule wefimbo lonhumba.

 

LEAVE A REPLY

Please enter your comment!
Please enter your name here