Aachiina ta ya manitha ondjila yaKasamane

0
322

 

Omuvelo waKasamane- Ehangano lyaaChina lyedhina China Longjian Investment Group olya pewa iilonga okumanitha ondjila yopadistrika yonomola DR3668 ndjoka yili pokati kEpako nOmuvelo waKasamane moshitopolwa Omusati.

Ehangano ndika olya pewa iilonga mbika oku yi manitha sha landula sho omahangano ngoka ga li ga pewa ookondalaka yiilonga mbika giikuthamo muyo  taga ti kagena oonzo dha gwana we oku yi tsikila.

Ondjila yoshinano shookilometa heyali oya ethiwa inaa yi manithwa sho mboka ya li ya pewa iilonga mbika, okutya omahangano galongelakumwe gatatu, Namibian Investment Contact cc, Dolly Investment cc na Tix Investment cc yi ikuthamo yoyene miilonga mbika . Iilonga mbika oya adhika ashike ya longwa oshikako shithike pooperesenda 20 dhoshinano shoka.

Pahokololo lyomupopiliko gwehangano  ewiliki lyoondjila nenge Roads Authority, Rosalinde Nakale, okwaa manithwa kwopate ndjika okwa etele aakalimo yomomudhingoloko ngoka uupyakadhi unene tuu sho yali itaaya ende we nawa pokati kEpako nOmuvelo waKasamane. Omolwa eshongo ndika lyondjila inaa yi vula okumanithwa kwaamboka ya pelwe otendela ndjika tango, iilonga mbika oya tseyithululwa ishewe miifo opo ku monike omahangano omape ngoka taga vulu oku yi manitha. Iilonga okumanitha ondjila ndjika otayi ka kuthapo oodola oomilliona N$35 moshiketha shiifendela.

Nakale okwa galikana ehangano ndyoka lya pewa iilonga mbika opo li tale ngele otali longitha aaniilonga mboka ya li ya kutwa komahangano ngoka giikutha muyo molwoonzo inaadhi gwana. Okwe li dhimbulutha wo li tale ngele otali gandja iilonga oyindji yaambika kaaniilonga aakiintu.

“Otwa hala wo opo ne mu tale ngele otamu gandja iinakugwanithwa yimwe  komahangano omashona gaaNamibia ngoka haga longo iilonga yokutunga, opo mbaka ya monepo ontseyo mokutunga oondjila”osho a thaneke.

Omuwiliki gwopamuthigululwakalo gwAambadja, Omusamane Matias Walaula okwa kumike nokuguna aakwashigwana momudhingoloko ngoka mweenda ondjila ndjika yaa yonagule iilongitho oshowo ya gandje elongelokumwe lyawo  nehangano ndyoka epe . Oshikwawo Walaula okwa indile wo mbaka ya longele kumwe uuna ta ya indilwa ya gandje po iipambu yomapya gawo opo pu ende ondjila ndjika.Okwa londodha kutya eyonagulo nuufuthi wiilongitho yondjila ndjika itau ka idhidhimikilwa nando.

Omahangano ngoka ga pelwe iilonga mbika tango, ogi ikuthamo muyo omumvo 2013 no inaaga longa po oshindji, ga ti oga li ga dhigupalelwa oshoka kaga li gena oonzo dha gwana okulanda omateriala gondjila oshowo okufuta aaniilonga. Oga ti wo oga li ga gandja omwaalu gwotendela gu li pevi okuyeleka naathigatahanipo yalwe molwashike sho gali ga pumbwa iilonga.

Onkalo yiilonga yepangelo inaa yi manithwa mOmusati kashishi oshinima oshipe, naashika osha li sha thiminike Gavena nale gwoshitopolwa  shoka Sophia Shaningwa a nyenyetele mboka ya li ya pewa ootendela dhiilonga sho ya ndopa okumanitha iilonga mbyoka. Omupopyo gwe ogwa li gwa endululwa kuGavena gwa Musati pethimbo ndika omusamane Erginus Endjala sho kuyele nuumvo a li a gandja uusama kaaniilonga mboka ya li ya pewa iilonga yokunenepeka nokuopaleka oshipangelo sha Kahao.

LEAVE A REPLY

Please enter your comment!
Please enter your name here