Ezimo lyomulumentu a kana lya hala omayamukulo

0
566

 

ONGWEDIVA – Aakwawo yomulumentu omugundjuka ngoka a kana okuza kohambo yOminista nale Yomauyelele nOmakwatathano gopashinanena, oya hala oku uva kutya oshike shaningwapo nomuna gwawo omumati

Omunamimvo 25 Fillepus Nande Jurius okwa kana esiku etiyali okuza tuu sho a tameke iilonga ongo omusitangombe pohambo yomusamane Joel Kaapanda pOnamatanga.

Omasiku omashona ga pitipo okwa li kwi itsuwa iipongolo yomuntu momudhingoloko gwa Namatanga naanezimo lyomumati ngoka kee wetike oyena uumbanda kutya pamwe ngaka omasipa gomwana.

Ihe Kaapanda okwa ti ye oshinima shika okwe shi lopota kopolisi oshowo kutya ye okwa kambadhala okulongela kumwe nezimo lyaJurius okuza petameko.

“Sho a kana otwa tumu omutumwa a ka lombwele ezimo kutya omumati ke wetike. Otwa kambadhala ashihe ta tu vulu okuninga, onkene kandi uviteko kutya omolwashike ngashingeyi ye ya kiikundaneki,” Kaapanda a pula.

Opolisi oya kutha uupambu kiipongolo mbyoka oshowo ombinzi kuyina ya Jurius ye kei konaakone, yo ya tale ngele mbaka oya pambathana.

Jurius anuwa okwa thikile mohambo ya Kaapanda momasiku 15 gAuguste nuumvo ongomusitangombe. Kongulohi yomasiku 16 ga Auguste, anuwa okwa dhengele Kaapanda ongodhi, emu lombwele kutya opena aantu pohambo ye ta ye mu tilitha kutya ota ye mu dhipaga. Manga anuwa ta popi ngaaka, Kaapanda anuwa oku uvu ekudhilo mongodhi nokonima ongodhi oya mwena. Okwa li a kambadhala okudhengela Jurius, ndele kali we ta vulu oku popya na ye.

Shoka osho oshikando sha hugunina omuntu a li a vulu okupopya na Jurius.

Kaapanda ina vula okukoleka uuyelele mbuka, ndele okwa  lombwele Kundana kutya yinakulu ya Jurius ngoka a kala na Jurius muAmuteya moshikandjohogololo Onyaanya  okwa tile  omumati ngoka ke li nawa momutse na ka li oopala oku ka kala omusita gwiimuna kohambo.

Kaapanda okwa ti ye ka li ena ontseyo ndjoka kutya Jurius okuna uupyakadhi nomadhiladhilo, molwashoka ye kali e mu tsakaneka sigo oompoka omanga nguka inaa kana.

“Okwa li ashike a kuthwa puundingosho komukwanezimo, shaningwa okupitila moonkundathana dhopangodhi, ye noku falwa kohambo. Tse otwa tuna oku ke mu tsakaneka, omupya omunene, oongoka kutya okwa kana omanga inaa tu monathana,” Kaapanda a ti.

Pahapu dha Elizabeth Petrus yina ya Jurius, omukalo aguhe okumona uuyelele moshinima shika okuza ku Kaapanda itagu nyanyudha .

“Peha lyoku tseyithila ezimo, Kaapanda okwa tumu etumwalaka moradio okupitila moNBC, ta pula ekwatho moshigwana  okukonga omulumentu ngoka ha ithanwa nedhina Nepwanga ngoka anuwa eli omuyambidhidwa a za koAmuteya. Ihe omumwandje (Jurius a tseyika woo nedhina Nepwanga) keshi omuyambidhidwa nande nande. Eeno okwa li omuntu a fa aantu ooya kwawo. Eeno okwa li ha numo momalovu ihe ye omuntu ashike eli nawa ngaashi aantu yakwao.

“Konima yokuuva ekano lye ngame onda dhengele tate Joel Kaapanda  noku mu lombwela kutya ezimo olya hala oku ka tala hoka kwa kanene omunona nguka, ndele ye okwa tindi. Okwa lombwele ndje kutya aakiintu inaya pitikwa oku ya koohambo. Tse inatu mu pa uusama washo moshinima muka, ihe otwali owala twa hala ashike oku ka ninga omakonakono getu yene noku konga omuna gwetu. Sho a ka zimina konima yomasiku gontumba, okwa ka tya ota pitika ashike kehala hoka ku yiwe kaakwanezimo yatatu. Ezimo lyandje nongame nda kwatelwamo otwa tindi. Okonima ashike yiiwike itatu etu lombwele kutya  efamili alihe otali vulu okuyako,”osho Petrus a fatulula.

Petrus omukalimo gomOmaalala okwa ti omwanamati okwa putukila puyinakulu ngu a vala he puAmuteya hoka oko a kuthwa sho  a falwa kohambo ya Kaapanda.

Okwa ti anuwa omushiinda ngoka eli ishewe omukwezimo a tseika ashike  nedhina Shondili ngoka wo eli omuniilonga gwa Kaapanda oye a kongele Jurius iilonga kohambo ya Kaapanda.

Kaapanda anuwa okwa li a pumbwa omusita omutiyali a kale pohambo pOnamatanga molwashoka okwa li ta lundululile Shondili kofaalama ye ndjoka opo a landa momudhingoloko gwaShomeya.

“Shondili kali a hokololele nando ogumwe gomofamili kutya ota kongele Fillep iilonga. Nopethimbo anuwa a kala noku heka ngoka opo a taambe iilonga mbika okwa kala anuwa he ya megumbo moka mokati kuusiku,” osho Petrus a ti.

Ezimo olya kundana ashike kutya Jurius okwa monenwa iilonga esiku ndyoka a ya kiilonga hoka.

Shalandulako oya ka uva owala etumwalaka moradio ta ku kongwa Jurius kewetike.

Omupopiliko gwopolisi mOmusati Lineekela Shikongo okwa koleke ekano lyomumati nguka. Shikongo okwa koleke woo kutya omakonaakono gopaunongononi oku tala ngele Jarius, yina Elizabeth Petrus nokamwayina kokakadhona oya pambathana oga kameka nale.

“Aakwapata mbano nayiidhidhimike owala kashona manga omayamukulu giizemo yopaunongononi tage ya,” ta ti ngaaka.

SAM_1613

 

LEAVE A REPLY

Please enter your comment!
Please enter your name here