Omahangano naa kufe ombinga mekeelelo loiponga

0
387

ONGWEDIVA – Ekelelo loiponga yomeendjila pomafimbo oivilo yomatango manene oshinakuwanifwa sha keshe umwe. Okwa teelelwa yoo omahangano opaumwene noikondo yepangelo ikufe ombinga mekelelo loiponga yomatuwa moitauwa moshilongo.

Ekunghililo eli ola yandjwa komunambelewa woshikefa shokukwafela ovo va mona oiponga meendjila ile Motor Vehicle Accident Fund  (MVA Fund) meembelewa domOngwediva, Lineekela Shipindo meenghundafana noshifo Kundana.

Ombelewa yoMVA Fund mOngwediva natango oya ongela vali ovakomesho moikandjolonga ya yooloka va kufe ombinga mekandeko loiponga okuya poivilo yomatango manene oshoyo pefimbo lefudo.

Elalakano keshe omukufimbinga okwa teelelwa a shiive omilandu meyakulo lovamoni voiponga naavo va xulifila moiponga yomatuwa nghee hali ende, ve li longikidile oiponga mefimbo twa taalela. Shikwao, ovakufimbinga va yooloka ova teelelwa va kufe ombinga shelixwa po meyakulo  nova shiive omayakulo haa yandjwa moipangelo moitukulwa ya yooloka molwa oipangelo imwe ihe na omashina ngaashi eeX-ray oko kwa teelelwa omunhu keshe a dja moshiponga a minikilwe.

Oitukulwa imwe ihe na eeambulansa, nova yelifilwe omahangano eeambulansa ngaashi oE-MED, Ondangwa Ambulans, Private Ambulans,SOS, Oshikoto Ambulans mwa kwatelwa edhagadhaga li li moshitukulwa shaShikoto.

Oshivike sha dja ko, ombelewa yo MVA oya ninga omapukululo moshitukulwa shaMusati modoolopa yOutapi okwoongela ovanambelewa va yooloka va shiive  etameko leyakulo lomunhu a dja moshiponga shetuwa. Molwa oiponga yomatuwa meendjila ya hapupala  unene,  ombelewa yoMVA Fund ootai tu unene omufindo kepukulo lovakufimbinga noikondo mepangelo nghee aveshe ve na oku kwafela mekelelo loiponga. Shipindo ta yelifa kutya, opo omunhu a mona oshiponga a yakulwe kombelewa yoMVAFund, oku na tete oku shangelwa onomola yoshibofa komunambelewa wopolifi oo e na oku fika ponhele  yoshiponga. Oiponga aishe yomatuwa nai lopotwe kopolifi tete opo nee kombelewa yaMVA Fund.

Ovanaudu va dja moiponga yomatuwa ove na oufemba wokwiifanenwa eeambulansa va fike koipangelo diva, neendokotola odi na oufemba woku va tuma koipangelo keshe. Molwaashi ombelewa oya dididlika vahapu va mona oiponga inai ningilwa oibofa kopolifi oyo peemhito dimwe inai fika peenhele doiponga, osha kateka omauwa mahapu ovamoni voiponga. Onghee MVA Fund okwa twikila noyoongalelepukululo .

 

LEAVE A REPLY

Please enter your comment!
Please enter your name here