Omaudaneko taa ningwa molwomahoolol naa wanifwe

0
308

Oshaninga vali efimbo olo ovanapolitika moshilongo hava kala veli pyakidila nokuxwaxwameka opo va hoolelwe vashiive vaye koipundi youkansela wopaikandjo nomalelo opaitukulwa.

Oshiwana osha koneke naana kutya ovanapolitika veengudu adishe ngeenge tava ningi oikonga ei, ohava ningi omaudaneko mahapu, elili nakulili.

Ovo veli koipundi ohava ningi omaudaneko she likolelela keshiivo lavo nokwaasho va shakaneka, ile va longa efimbo veli kopundi. Ovo va hala oku kufa vakwao oipundi ohava ningi omaxwaxwameko oo va tala kokudopa kwavakwao ovo va li mombelewa.

Kapena nande epuko limwe li nasha noikonga ei, ashike epuko ota li kala po ashike ngeenge ovaxwaxwameki ava ova kala ashike tava popi, tava nyakula ovatali nokunyuwifa omatwi.

Luhapu oto hange ovanapolitika tava popi eendaka da ukila ko, nota va ningi omaudaneko ma hongolola, taa endifa omutima ashike ngeenge ashike ova i mo mombelewa, oto ti ngeno kamwali omunhu ngeno pamwe xwepo.

Ponhele yokuninga omupiya woshiwana oo kansela vamwe ohava kaninga ovo ovahona voshiwana. Vamwe nghee ngoo va hoolelolwe moshikandjohoololo shonhumba oveshi ashike omikunda odo dili popepi nomaumbo ile neembelewa davo, hano iha va i koshiwana. Oto hange nokuli ovakwashiwana vamwe vehe shi kutya kansela wavo olyelye. Vamwe ove mu shi edina ashike nghee ngaho va dalelwe vemu mone. Oshinima osho sha puka neenghono.

Hano oshiwana nasho osha pumbwa okushiiva oufemba washo nokukala hashi pulaapula ko keembelewa dookansela.

Oufemba woshiwana ooku ya ku kansela shike mu pule nande omeva. Ovanhu vamwe ove li momhumbwe yomeva ndele oto hange ashike tava nyenyetele koukololo ponhele yokufika pu kansela oo mwa holoola a kale omukaleli po ile omukati koshiwana nepangelo.

Oto hange koitukulwa imwe tai mono omakwafo ngaashi oundjuwo, oikulya yaavo iha va tema, eepate oda tungwa, ashike oto hange oikandjohoololo imwe eputuko li he shivike ko nande nande, yee kansela iha i ngoo nee nande okoshiwana ekeshi lombwele ngaho kutya onghalo oya fa peni. Tashi ti oshiwana shili ashike momilaulu.

Oukansela ita shi ti ngeenge epangelo lopokati ina li liya mondjato li ete kosha koshikandjohoololwa shoye naave kala wa mwena.

Kansela ota dulu oku kwafa mokuunganeka nande eepoloyeka doikunino mokulwifa ondjala, noku eta po oilonga moshiwana. Kansela ota dulu oku xwaxwameka oshiwana opo shi pondole nande okufa eendungu nomatale, nopehena eyambidido lepangelo lopokati.

Ovafimanekwa ta mu shuna koipundi, oupangelona nava tungwe, eefikola nadi paindululwe, oshiwana nashi tuwe omukumo opo shi lihonge okulilongela shoovene opo ashike hatu dulu oku lwifa ondjala noluhepo. Kaleni shili ovapokati koshiwana nepangelo. Fimanekeni omaudaneko hamu ningi pefimbo loikonga ngaashi ei.

Ookansela vamwe ove li koikandjo hoololo nokuli vehe na ovakondjifi. Ita shi ti ngee nge kuna omukondjifi dimbwa kutya oshiwana osho she ku kwafa opo u ende mokandjila kehe na nande ekiya osha nyengwa oku twika mo omakiya.

Hano longeni mouwa woshiwana.

Koshiwana osho tashi ka hoolola, tale ni ngaho nawa. Ina mu hoolola ashike omunhu shaashi eshi kupopya, yee umwe oko ali nale ndele ina longa posha. Nongeenge ota mu muholola, kaleni tamu popi  naye oku mu dimbulikifa kutya omwe mu hoolelola shike.

Ashike ita shi ti nee kansela na kale omutondi woshiwana, aye ota shi ti ashike napa kale elongelo kumwe liwa pokati ka kansela noshiwana, voo ookansela nava kale shili ova piya voshiwana, hano ovapokati kepangelo lopokati noshiwana.

 

LEAVE A REPLY

Please enter your comment!
Please enter your name here