Ondjodhi yoKunene okutunga etuliloskepa natango oyinomwenyo

0
405

Oshitopolwa shaKunene oshishiwikile omutalelo gwasho omwaanawa gwiikulundundu noondundu dha taandela. Ndele kaakalimo yamo oshitopolwa shika kashishi ashike ehala ewanawa lyokutalelwapo kaatalelipo.Kuyo shika oshitopolwa shoka tashi ka kala egumbo lyetuliloskepa etitatu lya Namibia, ngele ndika lya thanekwa okutungwa po Angra Fria olya pu.

Yo ondjodhi yokutunga etuliloskepa lya Angra Fria natango oyi na omwenyo sho ndjika ya tumbulwa nokushangwa momutengenekwa mwaalu gwembo lyiimaliwa yomapendulepo, moka iimaliwa yoodola oomilliona N$10,1 yi itulilwa omolwetungo lyetuliloskepa ndyoka.

Angra Fria, ehala lili komunkulo gwefuta lyAtilanta konyala ookilometa omathele gaali nomilongo ntano muuninginino wOpuwo. Ndika otali vulu oku adhika ngele owa longitha ondjila yongalama yuudha omamanya ndjoka ya hulila pomukunda Orupembe, omanga ino ya monkulofuta gwIipongolo konima yiikulundundu.

Opo oshikondo Shomatalelopo shikaleke aatalelipo taya talelepo oshitopolwa sha Kunene, osha thaneka okulongitha oodola oomilliona N$15,7 okutula molugumbo oshitopolwa sha gamenwa ,oshowo okutulapo omahala gokunwina iiyamakuti, nokutunga omagumbo gaaniilonga yoshikondo shoka.

Ishewe omutengenekwa mwaalu gwiimaliwa yehumokomeho ogundji ogwa pewa oshitopolwa sha Kunene, mokati kaangoka muna oodola oomilliona N$100,9 dhuuthilwa okulanda evi kOshikondo shetalululo lyevi.Iimaliwa ayihe mbyoka yuuthilwa oshitopolwa shika okushi humitha komeho oyo oodola oomilliona omathele N$463,906.

Oshikondo shEhomukomeho kOmikunda oshowo Iilando  osho shimwe shaambyoka ta yi ka longitha omwaalu omunene  miimaliwa mbika yomwaalu goodola oomilliona N$86,5 okutulapo omayakulo gopamuni muudoolopa mikunda mwa kwatelwa Otuzemba mOpuwo, Okangwati, noSesfontein.Omanga okutulapo omayakulo tuu ngaashi ngaka oga thanekelwa wo omidhingoloko Outjo, Khorixas na Fransfontein. Yimwe yomiimaliwa mbika ota yi ka longithwa wo okutunga  oombelewa dhomalelo gopamuthigululwakalo gwaaGobanin, Gaiodaman, Hai/om oshowo elelo lyaaKokurukouje . Oombelelwa dhomikunda otadhi ka tungwa po Sesfontein, Okangwati noFransfontein.

Etungo lyoondjila olya kwatelamo ndjoka yookilometa 412 pokati ko Swakopmund naKamanjab okupitila moHenties Bay. Otapa kala wo etungo lyontompa pokati kOpuwo nEtanga oshowo etulo lyoteya koondjila pokati kOpuwo na Sesfontein oshowo Opuwo nEpupa.

Oshikondo shUunamapya oshi itulila oodola oomilliona konyala N$44 molwiinyangadhalwa yasho ngaashi mbyoka yoku kwathela iimeno ishitilwamo yaamuka, oshowo okutunga uupangelo wiimuna  moshitopolwa shika.

Aanamina aashona na yo ota ya ka mona uuwanawa okuza miimaliwa yoodola omilliona mbali netata ndhoka dha nuninwa mbaka okuza koshikongo shIikwankondo okunkondopeka aanamina aashona.Iilonga yoku fala omalusheno momikunda na yo ina yi dhimbiwako sho ya pewa oodola oomilliona N$5.4.

Oshikondo Shuundjolowele otashi ka longitha oodola oomilliona N$31,2 oku opaleka oshipangelo sha Outjo oshipangelo shaPuwo oshowo okutungapo omandiki guundjolowele wopetameko moshitopolwa.

Omanongelo gopondondo yo prima moshitopolwa otaga ka silwa oshimpwiyu unene tuu enongelo lya Mureti mOpuwo oshowo etungo lyoskola ompe pOtuzemba.Omolwiilonga mbika uuministeli wElongo owa thaneka okulongihta oodola oomilliona N$25,32 okugwanitha mbika.

Opolisi oyi itulila oomillliona dhoodola konyala dha adha N$31 okuopaleka oosasiona dhopolisi  oshowo okutunga dhimwe oompe, ngaashi ndjoka yopOkangwati, noombelewa dhopolisi moshitopolwa.

LEAVE A REPLY

Please enter your comment!
Please enter your name here