TUYENI KOLUPALE LA TUYENI: Ina yokaana mboli oye ashike eshi he yako

0
467

 

Ounyuni wonale owe tu shingila fiyo okwau wonena, naai ya kala hai ningwa mefimbo lonale fiyo omefimbo lopaife imwe ohatu i shakeneke tai ningwa.

Ame mwene ondadalwa ngo nale ashike kandifike poshiveli shetu, ashike ame ondakula molwaashi aame ndamona etango tete konghelo yetu. Ame va li omunelao eshi ndamona ohango yomupresindede woshilongo shetu apa ya ningilwa. Omupya ohango yameme ou a dalange inandiimona apa yaningilwa naashi ngo shali po, oiyolifa shili ili mumwe nomashendjo.

Oungoo walya shakakodi vati tala ne pombada kaimbi otakongo ne eedingu daye. Ndishi opeena ngo natango ovashamane vamwe mu hole okutembula vati natango ounona veeni. Omukala ngo ounona hamu va tembula ngeenge oomeme vavo vehemo meumbo vapitamo hano vakatala nande omeva. Ove vati opo ne to shikashika ko kokamwoye nawa manga ulipo oove auke ove toka shemununa ne nawa apa kekufa, molwaashi vati ngeenge meme wako opo eli hakala tekuulike mekofi nomulungu. Ashike inamu tila kashina oupyakadi molwaashi otaku tiwa eshi oshikulukulu ha shiningwa molwaashi vati nghee kwakala ovatendi veengongo havo ovatongoni, voo ovali vomaxuku havo ovayengi. Eshi oshoshili nomefimbo lopaife, oha shi monika.

Manga inaa tu ya mokati komushangwa ondahala upwilikine omushamane meedula do1944 tatekulu Nghede yaKoko, eya okuhombola omukulukadi ena nale oufimba uhe fi waye. Ndele moku haashiivasha konima yokaana eshi kadalwa, okwatameka ta tembula okaana manga vali mokatala komudile vo Nambwaduli ina yokaana. Ta ti, haave ndihole onyoko ndihole! Haave ndihole onyoko ndihole! Openi kaholwa ndi kanwe po omeva! Openi kaholwa ndikanwepo omeva! Ye ota i mo vali tati, taa! Ouweteko Nambwaduli, tate ou etu dala a nyonena nge ne okaana keemhadi. Tate okuna oshifeka shidjuu nai wa. Oiyolifa shili ili mumwe nokuhashiivasha oixuna mboli oko ngo yakala.

Ota ku hokololwa yo kutya monalenale okaana kokaadona ngeenge okaningi edimo, opakala yo hapa danwa onghadangala yomonanguwi oyo haikala ashike ishivike no ku kwatelwa komesho komundali nakunyamifa oye ayeeke. Omushamane xe yakakadona hakala eli mekutu nonande eshi ngo kutya okamwaye okaninga oufimba. Okakadona ohakakala takapulwa nokufininikwa kuina apa kakufa edimo. Ngeenge okwa popi po umwe womovamati nde keumbo lavo oku adalwa okwafa ngo ihakutema nawa haku nangelwa ondjala hano, ina ohafininike vali nekuni opo kapopye vali ovamati vamwe kwali hakakala navo. Opo yee ahoolole mwene kutya edimo naliye koShuukifeni nonande hako la dalwa shili, omolwa ouyamba waako. Oshili ohatu mono oixuna mboli she ohatuli ashike ovayamba vo tava dala.

Hano oinima yatya ngaha nomefimbo lonena otaimonika. Heeno oshili kapena ou ahala okaana kaye ilo okatekulu kaye kadalwe kooTumbekutu. Ashike ngee oto tale nawa eshi osho hashi ka eta okaana kadalwa kooNdemulungila ndele okafa vali kooNdemwiimba. Eshi otashi ulike kutya mboli oupeko onghe ngo vakala nokudanwa okudja nale. Oiyolifa shili ili mumwe noumbudi wonale.

Otaku hokololwa modula twa dja nokutumbula pombada, omushamane wedina Nghede yaKoko ali omuyamba. Okwali pomikunda dili pokati kaUkwanyama naUkwambi hanga lokeengamba da Angola na Namibia. Omedi ei otaku tiwa okwali ina eengombe dihapu dafa edu ndele na yemwene keedishi vali. Lwopokati opo otaku hokololwa omukulukadi waye ou kwali a hombola wedina meekulu Ndafelela okwaka xulifa eshi a likila mondjibololo keyoka manga kwali ta hongo oiyuma yaye.

Meenghali domukulukadi watatekulu Nghede omwa liwa eengombe 35, osho inashimonikamo nale pomikunda opo. Ndele neembwa dopomikunda dopoushiinda okwali datembuka deya keenghali domukulukandi waNghede. Osheshi oNghede yaKoko okwali ina eengombe, ndele novanhu vopoitelefo opo okoNghede kwali hava ka tambula omashini. Nau ngo mepya laye inakufamo nawa, naye kooNghede kwali hai. Ndele namwene womukunda okotatekulu Nghede kwali haka nyanga.

Ngeenge owa kala omukwanaluhepo oshanyika oshiponga, osheshi kashidjuu ulandifepo nomwenyo woye molwaashi oto nyengwa konghalo. Oshitivali omukwanaluhepo nande oukale to dala, oshili kashilidule molwaashi ounona ito va mono ovena ngo okuuka komaumbo ovayamba nonande vekufa moshipala, tashi ulike kutya ovoye. Oshili ou wahepa hepelela ndele noludalo otali pungululwa ko keumbo leni molwa oufyona weni.

Omushamane ou konima eshi eenghali domukulukadi waye da dja po okwa ifana ovanhu vomomukuda wavo aveshe nde ta ti, vakwetu ame paife onda hala ne okukonga omukulukadi. “Ashike omo ngo handi kufa momukunda wetu omu. Ita ndi ka konga nande kokule”. Ta! Tala ne ovakulukadi aveshe vopomukunda opo eshi tave linyotele apa. Molwaashi keshe umwe okwali a hala okaana kaye oko ka kahombolwa ko Nghede yaKoko omolwa oupuna.

Tatekulu Shimweefeni shaKapaya, mwene womukunda nakudala ekadona Mbwaduli, okwe liteteka okufikama nde taulike ta ti: “Haiti wani meumbo lange mwinya namo omuna ngo omakadona. Muna ngo Mbwaduli haye ngo tokufa mo, ile pamwe ondapuka?” Ovanhu aveshe okwali tava hakele omake molwaashi edi, okwali tadi popiwa kumwene womukunda, nonande, moshili okwali ta landifa po okamwaye molwoluhepo laye.

Paife pwikina ne nawa oixuna Mbwaduli ou tapopiwa manga ye eli keumbo, okwatya ye okuna edimo omanga vo kave shishi. Navali Mbwaduli okwali okakadona nale kaNdemwoongela omumati woshiveli shatatekulu nghede oku takutiwa oko taka hombolwa. Meme waMbwaduli eshi aya keumbo okwafikila ta ifana Mbwaduli ta ti; “Ila shiveli shange. Haiti wani, owa kongwa koshipuna shopomukunda apa. Mbwaduli ta pula meme wa ti ndakongwa kulye?”

Ina ya Mbwaduli okwa tameka oku lombwela omona; “Kaanave, oto ka hombolwa keumbo loshipuna shopomukunda apa eshi shina ouyamba ihaupupo. Ndahala okutya hano kooNghede yaKoko nghede ou tapopiwa, omutekulu waKatili Kahangula ye xekulu ou adala xe oShilimetiti ya Namutaalukumwa omushamane kwali ena eengobe handimaneko oshana osho ngaho mounyuni mwi. Ouyamba oto keu kala nawa”. Ye ta yolomo okangadja heeheeee! Noluhepo pushe paife otali ka kala lafa omashendjo.

Mbwaduli okwalombwela ina ta ti, meme tala ame itai ka hombowa kootatekulu Nghede yaKoko nande, shotete okwa tya ngo ondina edimo lina eemwedi natu. Oshitivali ame itai ka hombolwa kutatekulu Nghede molwaashi okwakulupa, noshikwao ame noxo okwa li ndomumati winya woshiveli shaye Ndemwoongela,”. Mbwaduli ta imo ta pula: “Hano oshike ita mutwalako nande oNdilokelwa ou eli omu womukulu wange ye oye akula. Ile osheshi ne ena eisho limwe?” Mbwaduli tapula ngaho a handuka ye ta kwena.

Ina ya Mbwaduli okweyamo tapopi nokaheka tati, tala oku shiveli shange ila utale tupopye oinima yoshilikadi ei hainingwa kovakulukadi. Manga naxo ineyamo meumbo omu, ngeenge ouna edimo mboli oshili nawa ne edimo olo inolipopya vali nande okomunhu ndele naxo inapumbwa okuliuda nande. Osheshi ovashamanene kaveshi okukala noiholekwa meemwenyo. Inda ashike u ka hombolwe nedimo loye ove ngeenge owamono papita omafiku to lombwele omushamane Nghede yaKoko toti, tatekulu mbela kondjila owaendako ne oku, vakwetu.” Tatekulu Nghede moku katalako omufuko waye, okwa yandja eengobe 60 odo epata lavo lili tukulile odo nokuli hambala daeta omapiyaano mepata lavo. Molwaashi meme waMbwaduli ka kwali ahala padje nande oimwe. Ta ula yo ovamwaina vamwe te va pula a fufeeka a handuka tati, mwahala ngo eengobe dokaana kange. Pwilikina ne vali oupofi, tatekulu Nghede okwaudanekela ovakwanedimo laMbwaduli ta ti, kakadona ou shima ashike a tameke okufiya omate, ondina okumuufana koshivilo shefiyo lomate. Ohaitomo vali eengobe 28 eshi ta kamona okaana ondina okumwiifana. Ndele handi tomo vali dili 48 opo ngo andi ke mwiifana koshivilo shokulikoka ondina okutoma 78. Oshili eshi ngo okaana takaka tova ondiina okumuufana koshivilo shetovifo ohaitomo 88 oixuna shili oupofi uli mumwe nouyamba.

Omushamane ou okwali ne ta valula eengobe edi ta ka tomena. Mbwaduli nge amono okaana omanga nedimo eli lili molutu laMbwaduli kalishi laye, hano osho ngaho shiwana ouna okupya toxwikwa keenyala nde nomouluvi.

Pexulilo, nye ne ovashamane, ndishi opena ngoo vamwe muhole okuyasha oudila venya vootena. Kotokeni onamukalile ngo mumwe noohanda ngeenge eenghuti tadiya okunyanga. Nye ne oomeme, ndishi opena ngo oomeme vamwe muhole okuya apa pwadjenga ndimbulukweni omatiti omu hamukala eendjove ohaatatuka ndele tamu ke lihaluka tamu velele pedu.

 

Omadilaadilo aa oomunyoli yee mwene ndele kaeshi aKundana

 

JOHN YA TUYENI

CELL 0812988549

MRTUYENI76@GMAILA

LEAVE A REPLY

Please enter your comment!
Please enter your name here