Ya kenyanana onkalo yokapale kUukwangula

0
231

 

UUKWANGULA-Nando omangungo ogendji oha ga mbombolokokele kokapale kokUukwangula hoka haku dhanenwa uudhano woNamibia Premier League, oyendji oya kenyanana onkalo yomutenya ngoka guli pokapale hoka.

Aatali ota ya ti okapale haka oka tungwa kaantu kaa ye na ohenda oshoka kapuna nando omunzile gwasha naatali oha ya etelele oondunda dhawo.

“Osigo uunake yakwetu ta tu kala ashike ta tu pi omutenya omanga ta tu tala omaudhano pokapale haka,molwashoka tse otu hole omaudhano ashike onkalo yokapale haka ota yi sitha uunye oshoka ihatu vulu we oku etelela aanona yetu komaudhano oshoka onkalo yomutenya oya ge ya  unene,”gumwe gomaatali ta ti.

Oyendji yomaatali mboka yali yayi moonkundathana na Kundana oya holola euvo lyawo lyonayi , no ta ya indile elelo lyokapale haka opo li talulule omutengenekofaneko gokapale haka yo ya tuleko etala.

Ota ya holola wo kutya iipundi yokapale haka oya tulwa kombinga yapuka oshoka aatali ohaya kala ya taalela etango molwashoka omaudhano ogendji ohaga dhanwa komatango netango ohali kala miipala yawo ethimbo kehe.

Pethimbo lyongashiingeyi okapale haka oko akeke haka vulu okudhanenwa omaudhano gopamuthika, konima sho okapale ko Independence kali ka kuthwa melongitho oshoka okeli monkalo ya nyayika.

Okapale haka okapumbwa oku talululwa noonkondo adhihe oshoka ota ka monitha aayambidhidhi mboka pethimbo ndika yo ha ya yi momiyalu ominene oku tala oosipana oonene moshilongo sho tadhi inika komakombo,naashika ota shi teya aatali oyendji omukumo.

Oonkambadhala okumona Uuministeli mboka hawu wilike okapale haka odhali dha adha okwena kwa hula pethimbo Kundana ali ayi koshinyanyangidho.

LEAVE A REPLY

Please enter your comment!
Please enter your name here