Ekoto looKalyamupombo pamwe noulai

0
386

 

ONGWEDIVA – Onghendabala yomunyeka kwa homatiwa kwaavo tava fekelelwa kutya eembudi dokakopi kofingo, oye va tula ashike moupyakadi eshi va tula umwe womuvo moipandeko voo vene, nokuninga oilonga yopolifi ipu.

Ongudu yovalumenhu vahamano vati oya manga umwe womuvo komaoko, nelalakano ngeno ku lipulwe kutya okuli umwe womoihakanwa yomunyeka kwa homatiwa. Ashike mupya munene, opolifi oye shi dimbulula diva nomulumenhu ou okwa kwatwa omanga ashike a li meemhango omo a tulwa kuvakwao.

Sisande Abner Kaume Itumba oo eli Omupopiliko wOpolifi mOshitukulwa shaHangwena okwa koleka oshiningwanima eshi. Ta hokolola kutya oshivike shadja ko umwe womovalumenhu va hamano okwa ya positaasi yomahooli ipe ili pOmukunda Oshaango eekilometa ashike donhumba okudja mEenhana. Omulumenhu ou vati okwa ya po sevesa opo ta shingi okatuwa, ye te li ningifa a fa ngeno omulandi.

Omulumenhu ou vati okwa landa obiila ndele tai konima yositaasi.

Konima yefimbo okwa ka djako a mangelwa omaoko konima, a umbwakomesho kovalumenhu vatano, vamwe va homata eendjebo.

Ovo va li po posevesa opo, okwali tave li pula kutya omulumenhu ou a mangwa komaoko naye okuli oshihakanwa shomunyeka.

Ovalunga ovo vatano ova fininika ovanailonga opo veva pe oimaliwa komulungu wondjebo. Elao linene, ova dula ashike okumona oshimaliwa shifike poN$3000 nasha.

Ovalunga ava ova faduka po noimaliwa, tava fiye po mukwao ve mu manga, te li humbata a fa ehefi umwe womooKalyongo ava.

Ovanailonga ova ufana opolifi oyo ye uya meendelelo.

Omanga nee opolifi yeli pyakidila nomakonaakono yoo tai pulaapula ovanailonga, ooKalyamupombo vati ova tameka tava tumu eeSMS kongodi ya kaume kavo, tave mu lombwele kutya ove li komamwandi, naye ekeva pitule po.

Omupya munene wavo, opolifi oya mona oSMS oyo, nokukwata po omulumenhu oo.

Vakwao vane navo yoo ova ka kwatwa, osho sha eta omwaalu wovafekelwa ava vaya moipandeko pu vatano. Omutihamano natango okuliwe mokashoko kopolifi.

“Kena apa tai edina laye otuli kwete,” Itumba ta ti.

Ye ta weda po vali kutya opolifi moshitukulwa shaye oyeli longekida okulwifa oimbululuma pefimbo lomatango manene opo pa ukiwa.

“Otuna okukindjika eepatolola nee roadblock. Ookalyamupombo paife ove li ve wete tava longo noudiinini shaashi molwa omatango manene, ashike eshi vena oku dimbuluka osheshi kutya ngeenge oowa kwatwa paife, ota shi dulika ashike uka pangulwe mo2016 shaashi ovanailonga vokomhangulilo ota va tameke nale oku ya momafudo,” Itumba ta ti.

Ta kumaida yoo ovanyasha opo veli keelele koulunga voo va kale tave li longele voo vene.

 

LEAVE A REPLY

Please enter your comment!
Please enter your name here