Oluteni lwa geya noonkondo moKunene

0
350

 

OMUNGUNDA-Aakalimo yomOmungunda moshikandjohogololo Opuwo moshitopolwa shaKunene oye na uumbanda kombinga yoluteni ndoka talu dhipaga iimuna yawo kehe esiku. Mbaka oya ti shika oshe ye etele omadhiladhilo goku idhipaga uuna ta ya tala iimuna yawo ta yi si ngaaka.

Jakurupa Mbunguha omunamimvo (36) omukalimo gomOmungunda kuuninginino wOpuwo okwa hokolola oshiwike shika kutya okuza omumvogu okwa kanitha oongombe 100 molwoluteni ndoka lwa tamekele omimvo mbali dha piti.

“Uuna oongombe tadhi si omuntu oho kala wa fa wa hala oku idhipaga. Osha fa omuntu wa kanitha omuntu omukweni, molwashoka tse otwi ikwatelela miimuna yetu,” Mbunguha a ti.

Okwa ti okwa longitha iimaliwa oyindji  okulanda iikulya yiimuna oshowo omiti dhiimuna ndele sigo oompaka ina mona mo oshindji miimuna ye .

Mbunguha okwa ti okwa tamekele okumuna iimuna ongo onzo yuuhupilo we  okuza tuu mepipi eshona ihe ngashingeyi uuhupilo we mbuka  owa ehamekwa nayi konkalo yuukukutu okuza tuu omumvo 2010.

Okuza omumvo 2010 oshitopolwa sha Kunene osha kala tashi lokwa nuunkundi naashika osha  fala meteyo enkundi oshowo mompumbwe yomeya gaantu nogiinamwenyo yawo.

Aanamukunda mboka ya popi na Kundana oya ti iimuna otayi si ihe yo iha ya vulu we okulya onyama yayo molwashoka ndjika ka yi nomulyo nando ogumwe.

“Iimuna yiisila ota yi monika apehe moshitopolwa. Kutya ngaaka noombwa dhodhene odhiikondako kokulya onyama yomakumba ngoka, ga ninga ogendji ngashingeyi,”osho mwene gomukunda Josef Mbunguha a ti.

Mbunguha okwa ti yo oya tembuka okuza kaandjawo kEtanga ye ya kOmungunda ta ya kongo uulithilo , ihe nando ongaaka iimuna yawo ota yi tsikile okusa momwaalu omunene.

“Ngashingeyi katuna we mpoka tatu uka oshoka opena omaipumomumwe shaampoka.Kapena omuntu a hala omuntu omukwawo a lithe mehala lye. Opena iiningwanima  moka aantu ya yahathana konima sho mbaka ya fala oongombe dhawo dhi ka nape ko Sesfontein okuza kEtanga,” osho mwene gomukunda a hokolola.

Okwa ti moshito uuna omuloka gu li nawa iimuna yawo ohayi napa  momalundu, ihe ngashingeyi oya tameka okunapa moondundu moka wo mwa kukuta.

“Oongombe otadhi si odhindji noonkondo ihe iikombo otayi hupu ngaa oshoka yo ohayi vulu okuiiyutha  konkalo yoshikukuta noluteni,” osho a ti.

Mwene gwomukunda okwa indile wo oholomende opo yi endeleleke etopolo lyiikulya yoluteni  oshoka pethimbo ndika mbika ota yi gandjwa ta yi ende kashona.

Okwa  ti oha ya pewa iikulya yoshikukuta  konima yoomwedhi mbali kehe , naashika kashi li nawa oshoka mboka ya pumbwa okupewa oondya ndhika oyo aanona naakulupe.

“Dhiladhila , kutya ohatu pewa iikulya yaanona naakokele, ndele mbika oya thikama ashike mepungu nomagadhi gokutelekitha pwaana omweelelo.”

Omwanakadho gwamwene gwomukunda , Mariru Mbunguha okwa hokolola kutya ye okuna ashike oongombe dhi li ne . Ihe ye okwa kala ha hupu  mokulonga epya, ndele sho omvula ihaa yi loko we nawa, eteyo lyepya lye nalyo olya nkundipala.

“Tse aakiintu ihatu kala niimuna nenge oongombe, onkene uuhupilo wetu owo ashike okulonga iilya nenge epungu, ndele nee sho omvula ya ningi omasiku yi loke nawa omimvo ndhika  otatu mwenya nuudhigu shili unene okupalutha omagumbo getu,”osho Mariru a ulike.

Mariru okwa ti omolwa ompumbwe yiikulya ye, ngashingeyi oha teleke ashike lumwe mesiku nuusila mboka ha mono okuza kombelewa yoku gandja iikulya kohi yOmbelewa yOminista Onkuluntu. Shika ohe shi ningi opo uusila mboka wu ya thikithe kehulilo lyomwedhi hoka yo taya ka pewa ishewe okashako kamwe kuusila. Okwa galikana epangelo opo li dhiladhile okuindjipaleka uushako kegumbo kehe wu ninge nando ouli une momuntu oshoka ngashingeyi ohaya pewa ashike okashoko kamwe momuntu kehe.

Omukulukadhi gwaanona yahamano  naatekulu yane okwa ti andola epangelo nali ya pe olusheno lwetango okupomba omeya momboola oshoka okulanda odiesela yopomba yomeya osheya ningila ondilo.

Okwa indile wo epangelo opo li etepo opoloyeka dhiikunino opo aagundjuka ya kale taya ilongele yoyene iikulya, pehala lyokukala ya tala ashike maakuluntu.

Pahokololo ndyoka lya gandjwa koshikondo shUunamapya kombinga yeteyo lyo nuumvo olya ti eteyo lyonuumvo olya li limwe lyaangoka omawinayi tali tsakanenkwa moshilongo konima yomimvo dhili hetatu ngashingeyi.

Ehokololo ndika kombinga yeteyo momapya ngoka ha ga ikwatelele komvula olya ulike lya nkundipala noonkondo miitopolwa yihe mbyoka hayi longo omapya haga kunwa ngele omvula ya loko.

LEAVE A REPLY

Please enter your comment!
Please enter your name here