Omahogololo ogeli popepi

0
266

Okuna ashike omasiku omilongo 21 opo aaNamibia ya ye kuuketha womahogololo gomalelo giikandjo oshowo iilando. Ombepo yomahogololo otu yi uvite tayi pepe tashi ulikwa koongundu dhopolitika ndhoka dha manitha okuhogolola ookandidate dhadho ndhoka odho tadhi ka kuthombinga methigathano lyuuwiliki wiikandjohogololo oshowo iilando noondoolopa momasiku 27 gaNovemba omvula ndjika.

Kundana ota kumike kehe gumwe wa adha no wu na uuthemba woku hogolola wu ye wu ka hogolole kakele ngele moshikandjohogololo sheni omuna ashike omuulikwa gwongundu yimwe ngaashi sha holoka mu yimwepo.Otatu mu kumike mu ka hogolole unene, tuu aagundjuka opo ya kuthombinga mwaashika.Atuhe otuna ewi oku longitha uuthemba wetu wopaudemokoli opo kaatu ka kale ta tu nyenyeta sho inaatu panda aawiliki mboka yetu kwatela komeho. Epangelo lyaantu ohali hogololwa kaantu ndele haakaantu aashona nenge oohandimwe.Onkene aagundjuka otaya vulu owala okukala oshitopolwa shomukalo guudemokoli mbuka ngele yo oya yi komahogololo nokuhogolola.

Oshikwawo ongaagundjuka otuna okukala tu uvite uuntsa molwombili nengungumano moshilongo ndyoka ta tu tyapula noku tsikila tu li uvite. Osho oshinakugwanithwa shetu  ongo aagundjuka okutsikila uuthiga mbuka okupitila mondjila yuudemokoli, mboka oshitopolwa shimwe shawo osho omahogololo.Omanga yamwe yomaaNamibia yiimpwiyika nonkalo yomahupilo goshilongo , shoka shi li wo mondjila, oya fa haya dhimbwa nenge ihaa yi itulamo unene moshinima shasimana , shoka shengungumano lyopapolitika, ndyoka lya thikamapo ashike molwashoka aaNamibia ayehe oya simaneka  uudemokoli, uuthemba womuntu oshowo ekotampango lyoshilongo.

Kundana okwe shi popile nale note shi popi ishewe , kutya ekotampango otali tegelele kehe gumwe gwetu opo a kuthombinga  mokuhogolola epangelo oshowo oohandimwe mboka ta ye tu kalelepo, ongo oshilongo ashihe, mepangelo ndyoka pondondo yuuperesidende, yoparliamende, yomalelo giitopolwa naandjoka yomapangelo giilando oshowo ngoka gopaikandjohogololo. Itashi kala oshiwanawa oku dhina oshinima shokuhogolola opo konima omuntu to kala to nyenyeta nenge to gandja uusama kwaamboka yeli mewiliko lyoshikandjohogololo sheni nenge oshilando sheni omanga wali wa pewa uuthemba okuhogolola mboka wu wete taya ka longa muuwanawa woshigwana. Shika otashi yelekwa nomuntu ngoka to kambadhala okugwithako onkalo yombili nengungumano kolutenda oshoka ooyakweni oya ka hogololele omanga ngoye wa tindi okuhogolola.

Ihe nando ongawo haa Namibia oyendji yena ohokwe yoku ka hogolola esiku ndyoka ngele lya thiki okuyeleka nando onohokwe ndjoka yena oku katala uudhano wetanga lyokoompadhi pokati koospana petameko lyoliha yopombanda, nenge uudhano woatletika nenge mboka wOlympika.

Ngele ino nyanyukilwa kansela gwaandjeni moshilando nenge moshikandjohogoloolo, inda wu ka hogolole gulwe.

Kundana ota endulula ishewe euvaneko lye kutya okuza oshiwike tu uka okuya komeho sigo esiku lyehogololo otatu ke ku etela iiningwanima yoongundu dhopolitika ndhoka tadhi kuthombinga mehogololo.Otatu ka pula oongundu ndhoka opo dhi hokolole kutya otadhi ka longa shike miikandjohogololo oshowo miilando uuna dha pewa ompito okuwilika, opo ne ongaa hoogololi mu kale mu shi kutya olye tamu ka hogolola .Otu shishi kutya ookandidate  hadhindji tadhi ka kala dha hala okuhokolola shoka tadhi ka longa ndele tse otatu ka longa twaana ezimbuko oku ku etela uuyelele owundji ngaashi tashi vulika. Otwi ilongekidha okushininga oshoka mbika oyo iilonga noshinakugwanithwa shetu oku ku etela uuyelele naashika ota tu shiningi pwaana eshunomonima.

 

LEAVE A REPLY

Please enter your comment!
Please enter your name here