Omufita Shakaalela a findikilwa kengafifi linene

0
559

 

ONANGOLO – Engafifi linene olali la findikila omufita mukulu tatekulu Gideon Shakaalela Olomakaya yadjako okudiilila meongalo lambulavo mOnangolo moshikandjohoololo shaPembe moshitukulwa shaHangwena.

Tatekulu Shakaalela, okwa xulifa mefiku 22 Kotoba 2015 moshipangelo shaShakati. Okwali ena eedula 76.

Pandjokonona yaye, Rev Gideon Shakaalela okwali a yapulilwa oshilonga shouEvangeliste mu November 1972. Okwali a yapulwa pamwe novaEvangeliste vakwao ngaashi Salom Namunyekwa, Fredrick Kondjila, Elisa   Ndume, Fillipus Nakanwe, Dana Hamunyela naJohannes Mvula.

Omumati waKalunga ou okwa tameka oshilongayakulo tete meongalo laEenhana 1973 omo ali a kalamo ashike omwedi umwe na okwali a tuminwa a kakwafele keongalo laNangolo oko a longa omido 15.

Momudo 1988 okwali a tumwa opo aka yakule keongalo laSwakopmund oko ali a kwafela metungo longeleka ipe. Mo1991 okwali a tokola opo aye kofikola youfita kEngela oko ali a nongekwa, nokwa a yapulilwa oshilonga shoufita mo 1992.

Ovo a yapulwa pamwe navo ongaashi   Rev Aino Kapewongolo, Rev Magdalena  Shalongo, Rev. Elisa Ndume, na Rev. Aune Shilongo – Hamunyela. Ovali va yapulilwa oshilonga eshi kOmubisofi Dr Kleopas Ndumeni.

Opo nee a nangekwa megongalo laKaribib, na konima momudo 1994 okwali a tuminwa kegongalo laSwakopmund oko a kala oule weedula 14. Meongalo laSwakopmund eshi aka shuna mo, okwa lela oilyo yeongalo mumwe neengudu dovanailonga nokwa kongelela eemwenyo davahapu. Shakaalela okwa shiivika nokovafita vakwao molwa ondjungu yaye, he litula moilonga, iha dimbuka omanga oshilonga ine shi mana.

Mo 2003 okwali atuminwa kegongalo Eheke oko akala fiyo omo 2009 eshi a ya moshipundi she tulumuko.

Omufita Shakaalela ina kala naanaa omunghundi, okwa tameka oku liyava pexulilo lo2014. Moshipangelo shaShakati okwa ya mo petameko laKotoba a li aka konaakonwa, ngolongo a ta tambulilwa meembete  oule womafiku manini nokwa xulifa Kotoba 22, 2015.

Ovafita vahapu va li peefya, ova tanga oupendafule waye, ondjungu nohokwe yoshilongatumo, ombili neitulemo moshilongatumo.

Okwa fiya ko omufiyekadi Justina Johannes-Shakaalela, ovana vahamano, ovatekulu vahamano novamwaina omuwoi.

Burial-1

LEAVE A REPLY

Please enter your comment!
Please enter your name here