Ospana yo Brave Warriors oya hwama muudhano

0
394

 

Windhoek-Uudhano mbuka nando owo pa mbili ashike tau dhanwa kiilongo yili ine, enyakwa lyaCOSAFA, Namibia, otali kala lya tegelela okuninga oshindji unene tuu sho lyo tali dhana mbuka pondje yoshilongo shalyo.

Ospana yopashigwana yaNamibia oya ya koAngola oku ka kuthombinga muudhano wokudhimbulukwa omimvo omilongo 40  dhemanguluko lyoshilongo shoka ndyoka hali dhimbulukiwa aluhe mesiku 11 lyomwedhi nguka.Uudhano mbuka owa lukwa Angola At 40 Years Independence International football bonanza.

Natango taya ishapa sha landula esindano lyawo muudhano waakuluntu wo COSAFA Senior Challenge,ospana yoBrave Warriors oyu udha omukumo konima sho ya manitha omadhewo gawo okwiilongekidhila uudhano mbuka tau ka ningilwa moAngola ehuliloshiwike ndika.Ospana yopashigwana oya li ya ningi omadhewo ga yo ga hugunina pokapale ka Sam Nujoma moVenduka Etiyali oshiwike shika.

Omudheuli gwospana ndjika Bucksy Mannetti nomupeha gwe Ronnie Kanalelo oyo ya dheula aadhani oku ya endithapo  kohi yepupyu lyaanohenda metiyali oshiwike shika.Mannetti pethimbo lyomaidheulo okwa fatulula kutya aadhani mbaka oya ningi omadhewo gawo metiyali amuke ndele ina ya tameka Omaandaha ngaashi sha li sha dhiladhilwa.

“Oyendji yomaadhani oya li ya dhana momaudhano goliha lwaali ehuliloshiwike lyaziko . Naandika olyo etompelo kutya omolwashike inaatu ya tamekitha omadhewo Omaandaha, kokutya otwe ya pe esiku ndyoka opo ya vululukwepo kashona oshoka oya li yena omvulwe.Onkene otwa tamekele nee neitulemo enene oku idheula metiyali oshiwike shika.Tse otwa pumbwa ashike aadhani yeli omilongo 20 oku ka dhana koAngola  ndele otwa li twa ithana ye li 26 oshoka shika otashi tu pe ompito okukala nehogololo lili nawa,” Mannetti osho a ti.

Iilongo mbyoka yi ithanwa oku ka kuthombinga muudhano mbuka oyo Namibia, Democratic Republic of Congo (DRC) na Zambia oshowo nee omweedhilili guudhano Angola. Uudhano otau dhanwa uule womAsiku gaali pokapale ka 11 de November stadium, okutameka nena mEtitano.

Ospana ya Namibia konima yuudhano mbuka otayi ka kala nethigathano lyopaigwana omasiku ashike omashona taga pitipo sho tayi ka taamba aayenda okuza ko Guinea Conakry methigathano lyolela lyokupita oku kadhana muudhano wekopi lyuuyuni woFIFA womumvo 2018. Uudhano mbuka owo edhingoloko lyotango pokati kiilongo mbika iyali. Edhingoloko etiyali Namibia ota ka ya aka dhane nospana ya Guinea Conakry moMorocco, molwashoka mo Guinea ita  mu dhanenwa manga omolwomukithi gwo Ebola ngoka gwali gwa geya moshilongo shoka , onkene oshilongo shika osha li sha tokola opo omaudhano gasho gopaigwana ga kale taga dhanenwa moMorocco.

Omukwati gwospana yoAfrican Stars Lloyd Kazapua oye ta ka kala mokoola pethimbo lyuudhano mbuka wokoAngola, omanga omudhani gopokati ngoka a ningi omasiku eethiwa oku ithanwa kiilonga yopashigwana , Emilio Martin, okwa ithwana kiilonga molweetho nduka.

Aadhani omilongo 26 mboka taya yi koAngola ongaashi ta ya landula mpaka: Lloyd Kazapua, Joslin Kamatuka, Dennis ‘Law’ Ngueza-Tjetjinda (African Stars), Ferdinand Karongee, Absalom Iimbondi, Benjamin Nenkavu, Mapenzi Muwanei, David Peterson, Image Isaak (Tigers), Dynamo Fredericks, Emilio Martin, Junior Gebhardt, Denzil Haoseb, Immanuel Heita, Muna Katupose (Black Africa), Miguel Manaza (United Stars), Johannes Nambuli, Gabriel Malakia (Blue Waters), Edmund Kambanda, Heini Isaacks (UNAM), Jonas Sakaria (Eleven Arrows), Manfred Kazondume (Tura Magic), Alfons Xoagub (Julinho Sporting), Edmund Amugongo (Young Chiefs), Uaundjorure Nakambare (Mighty Gunners) and Terdius Uiseb (Orlando Pirates).

LEAVE A REPLY

Please enter your comment!
Please enter your name here