Indji a tumbaleke Ombuga ya Munyoko

0
399

Ombuga ya Munyoko – Omukuluntu gwaanangeshefa konooli okwali a tumbalekwa sho a li a gandya omagano kaakulupe okupitila mehangano lyoKoneka Social Club mOsoondaha ya piti pegumbo lya yina mOmbuga ya Munyoko.

Tomas Koneka Indji oye omutoti po gwehangano lyo Koneka Social Club.

Aakulupe yeli 80 oya li ya ningi aanelago sho yamwe ya li ya pewa oongodhi, oradio, omatalashe, uusila womahangu, uulunda oshowo uupalwa nuulindeli.

Ompito yo magano oyali ya tetekelwa kelongelo Kalunga.

Indji okwa ti omagano olupandu komapukululo, omagalikano oshowo uuteku wa kola.

Indji okwali wo a indile aakulupe ya tsikile noku ya galikanena yo ya pe aagundjuka omayele opo ya yande oompito dhono tadhi vulu okuyakwatitha oshowo okutaandelitha ombuto yo HIV/AIDS.

“Natango otatu indile mu tu gune, mu tu pukulule opo wo natse tu teke oohedhi nomithigulwakalo dhetu,” Indji a indile.

Omuperesidente omutiyali Hifikepunye Pohamba okwali iindile aagundjuka ya sile aakuluntu yawo oshimpwiyu.

Pohamba okwa ti aanyasha yanakanena oyiininga owala haya monika ngele taye etele aakuluntu uunona nonaa ka monike ishewe okweya a thige po okakwawo.

Frederika Imalwa, omunamukunda okwa li a tumbaleke Indji molwa uuwanawa mboka ehangano lye lyali lya ningile aakulupe.

“Kayuhenwa hadhela nyoko, nyoko onale eku hadhele,” olyo limwe lyomomatumbulo ga meme Imalwa mehambelelo lyomagano.

Indji okwali wo a tumbalekwa sho a li a mono onkatu yopombada yo Master’s degree miikwangeshefa nuumvo koshiputudhilo sho Regent Business School.

“Koneka omukoneki, omwiilongi kamana, omudhiginini oshowo omupenda,” Imalwa ta tangumuna Indji.

Indji okwa hokolola kutya moshiithanene shepapa lye omwali wo mwatotwa oshiketha sho Helena Itamalo-Indji bursaries shono tashi yambidhidha aailongi aaNamibia.

Indji okwali iindile aailongi aaNamibia opo ya longithe ompito ya humithe eilongo lyawo komeho.

Oshiketha oshali sha lukilwa yina.

Oshiithanene shomagano nomwiha gwaakulupe oshali shali shi ithanenwa Omuperisidente omutiyali Hifikepunye Pohamba, Ngoloneya gwaShana Clemens Kashuupulwa, Omukwaniilwa guuKwambi Herman Ndilimani Iipumbu oshowo Omukwaniilwa gwa Ngandjera Johannes Mupiya .

Aanangeshefa oyali woo ya gandja omagano N$14 000 ya yambidhidhe aakulupe  ya manithe okutunga oshinaagoga shawo.

LEAVE A REPLY

Please enter your comment!
Please enter your name here