Omiyalu ndhoka dha pewa iitopolwa ayihe 14 membo lyiimaliwa 2015/16 oyo mbika

0
313

Etitano kehe Kundana ote ku etele ehokololo kombinga yelongitho lyiimaliwa

yehumokomeho moshilongo, pambo lyiimaliwa yomumvo gwiimaliwa

2015/2016. Ehokololo ndika otali ulike nkene iimaliwa mbika yeyo komeho

ta yi longithwa miitopolwa kiikondo ayihe yepangelo.

 

  1. Khomas ooN$2,734 oobilliona
  2. Erongo ooN$1,02 obilliona
  3. //Karas ooN$969,325 oomilliona
  4. Otjozodjupa ooN$857,345 oomilliona
  5. Oshana ooN$680,206 oomilliona
  6. Oshikoto ooN$604,085 oomilliona
  7. Omusati ooN$601,242 oomilliona
  8. Omaheke ooN$597,360 oomilliona
  9. Zambezi ooN$580,318 oomilliona
  10. Ohangwena ooN$579,570 oomilliona
  11. Hardap ooN$509,231 oomilliona
  12. Kunene ooN$463,906 oomilliona
  13. Kavango East ooN$375,894 oomilliona
  14. Kavango West ooN$326,723 oomilliona

 

Natu tale nawa nkene iimaliwa yeyokomeho tayi longithwa mOmaheke

 

Windhoek –Omwaalu omunene gwiimaliwa yeyokomeho moshitopolwa shiimuna ano tu tye Omaheke otashi longithwa okulongekidha evi opo pu tungwe omatungo moondoolopa ngaashi Gobabis, omikunda  Witvlei, Leonardville, Buitepos, Epukiro nOtjinene.

Ondoolopa ya Gobabis oyo tayi pewa oshimaliwa oshinene okuopaleka omahala opo pu tungwe omatungo sho tayi ka pewa oodola oomilliona N$22,2 nuumvo  ndjika otayi landulwa kokandoolopa ka Witvlei hoka ka pewa oodola oomilliona N$12.Omanga Buitepos nEpukiro kehe yimwe otayi ka pewa oodola oomilliona N$5,l yo ndjoka ya Leonardville tayi taamba oodola oomilliona N$4,5 sho Otjinene otashi ka longitha oodola oomilliona N$2  okulongekidha omahala opo pugo pu vule okutungwa. Oshikondo shEhumokomeho komimukunda nIilando oshi itulila wo oodola oomilliona N$20 okutunga oombelewa oonene dhewiliko lyoshitopolwa Omaheke. Nuumvo oshikondo shika otashi longitha konyala oodola oomilliona dhi vule po N$75,7 moshitopolwa shika.

Aanambelewa yopolisi mboka yo piiyelo yopoongamba  ina ya dhimbiwa sho Oshikondo shawo  sha tulapo oshimaliwa shoodola oomiliona N$13,333 okutungila mbaka omahala goku kala pomiyelo dhopoongamba oshowo komahala galwe kokule hoka kuna iilonga yaapolisi.Osha tulapo wo omwaalu gwa gwedhwapo  gwoodola oomilliona N$4,94 okutunga omagumbo gokukala aapolisi  posasiona nomandiki gopolisi moshitopolwa shika.

Oodola oomilliona n$6,5 odhi itulilwa okutunga endiki lyokudheulila aapolisi lya P.J Kaundu.Opena wo omwaalu omukwawo gwokutungitha oosasiona dhopolisi po Aminus no pEpako. Ayihe kumwe mbyoka tayi longithwa koshikondo shEgameno nEpopilo lyoshilongo mOmaheke oyo oodola oomilliona N$37,64 nuumvo.

Oshikondo shEgameno oshi itulila oshimaliwa shomwaalu gwontumba okutunga okamba yetanga lyaakwiita poGobabis, omanga oshikondo shIimaliwa  sha tulapo oodola oomilliona N$12,5 okutungila aaniilonga yasho yopoongamba dha Trans-Kalahari Border omahala gokulala.

Oshikondo shoka tashi longitha oshimaliwa oshinene mOmaheke ooshoka shIilonga nIiyenditho  sha tulapo oodola oomilliona N$242 okuopaleka oondjila nomapola moshitopolwa shika. Iimaliwa mbika oya topolelwa oondjila pokati kOtjinene noGobabis,mbyoka ya tulilwapo oodola oomilliona N$115 nuumvo , omolwiilonga yokutula oteya kondjila yookilometa 245 okuza koGobabis  okuya koAminus nokuza ko Aminus okuya ko Aranos. Etungo lyondjila ndjika nuumvo otali kuthapo oodola oomilliona N$100.

Omanga ondjila yookilometa  47 okuza pofaalama Du Plessis okuya kEpukiro Post 3 oya tulilwapo wo oshimaliwa shoodola oomilliona N$10 okuyi tula oteya. Iimaliwa yilwe otayi longithwa okutunga oondjila ooshona ndhoka tadhi kwatakanitha uupangelo noosikola noondjila ndhoka oonene moshitopolwa oshowo okuyeluthapo omapola gevi ga tulwe pomuthika goondjila dhongalama, iilonga mbika ayihe oyuuthilwa yi longithe oodola oomilliona N$7,6 , yimwe yaambika otayi longithwa okuopaleka oondjila ndhoka dhilipo nale.

Oshikondo shetalululo lyevi otashi longitha oodola oomilliona N$101 okulanda evi omanga oshikondo shomaudhano otashi tungu endiki eshona lyomaudhano poAminus koodola oomilliona N$5. Opena woo oodola omilliona N$1,621 okutunga endiki lyomadheulo gopaungomba moGobabis koshikondo shelongo lyopombanda.

Uunamapya nuuNiimuna owa tulapo oodola oomilliona dhi vule N$59,9 okutunga uupangelo wiimuna, oodama oshowo omahala gopamuthigululwakalo gokunwina iimuna oshowo oombelewa dhokufala omayakulo ngaka koshigwana.

Oshikondo shElongo lyopetameko nuunkulungu otashi ka longitha oodola oomilliona N$12okuopaleka omanongelo, okuyambulapo omihandjo oshowo okutungila aalongi omagumbo.

Uundjolowele otawu ka longitha oodola oomilliona N$20,4 oku opaleka uupangelo oshowo iipangelo.Sho shoka shOomina nOonkondo otashi longitha oodola oomilliona N$4,8 okufala olusheno komikunda oshowo okuninga omathaneko gomutungilo gwevi okuza mondhila.Oshikondo shoohi osha tulapo oodola omilliona N$1,3 okutunga ofaalama yoohi ya Leonardville.

LEAVE A REPLY

Please enter your comment!
Please enter your name here