Peter ondume yomomufitu: Omasiku ga heyali gokuhepekwa okudhigu

0
427
Peter Jungle Fighter

 

 

Omasiku gaheyali konima yokukwatwa kwandje komutondi ogali oheli yokombanda yevi. Aalongithwa yomutondi oya pititha ndje momulilo gwomahepeko omadhigu sho ya dhenge ndje, ya fike ndje nolusheno oshowo ya kalekendje inaandi kotha opo ya thine ndje andola ndi holole uuyelele niiholekwa kombinga yiinakugwanithwa yandje oshowo mbyoka yaakwiita yalwe yoPLAN meni lyoshilongo.

Konima sho nda godhipukwa onda falwa mehala lyali hali longithwa okuhepekela oonkwatwa moka mweya ishewe Michael pamwe nomukengeleli mukwawo gumwe, hi ithanwa Kapere Imdodi, a za pomukunda gwetu Omusheshe. Nguka okweya opo a hokolole nkene eshi ndje.

Mbaka oye ende pamwe na Kapitiya Neel oshowo Du Plessis. Mbaka yaali oye ya mongulu ndjoka ya landula iilongithwa yawo mbyoka iyali iiluudhe. Manga mbaka yaali aaluudhe ya hokolola nkene ye shindje, aakwiita mboka yaali aatiligane  oya kala ashike ya pulakena nawa, ongo ya fa ya li mpoka oku kundana nenge okumona oshinyengandunge.

Kapere kombinga ye okwa lombwele Du Plessis nakuume ke Neel kutya oku shindje nawa okuza tuu kevalo lye. Okwa lombwele aahona ye kutya otwa hita osikola pamwe pOmusheshe Combined School nosho wo kutya egumbo lyatate okuli shi oshowo aamwameme aakadhona naamati. Okwa li wo iilongekidha okuya a ka tale tate kegumbo ngele osha li sha pumbiwa. Ndhika okwa li edhi popi mOshiwambo manga ta kambadhala  oku heka ndje opo ndi longele kumwe naahona ye.

Okwa lombwele Du Plessis na Neel uuna nda joina Swapo muundjendi nokonima ongame ngoka yo ya li taya kongo pOshinyandhila esiku limwe.

Ngame onda tsikile oku lombwela iilumbu shoka ndeyi lombwelele kuyele  kutya ngame aantu mbaka kandiyashi  nando ogumwe gwawo, naashika osha endeleleke omutiligane gumwe a lombwele omukwathi gwe opo a mangele ndje koshipundi shoshitenda. Oshipundi shika omagulu gasho ogali ga kolongelwa mokaungulita kosamende, ngiika opo shaa inyenge uuna mbaka taya hepe onkwatwa yawo. Konima yoku mangelwa koshipundi omukwiita omutokele okwa pula ndje ishewe ngele shoka Kapere a hokolola osho shili. Onda komona komutse inaandi hala naanaa no inaandi tya sha.

Okomanda yaambaka oye ya lombwele opo ya kambadhale oku indila ndje ndi longele kumwe naye. Manga aakengeleli mboka yaali ya kambadhala oku ziminitha ndje ndi longele kumwe okupopya oshili, omutokele okwa li ta nu ekaya ombali lwaali pwaana oluthuwo ye ta katuka uuka huyaka ye ta galukile kombinga yimwe yongulu moka twa li.

Michael okwa lombwele ndje kutya na ye okwa hepekelwe naanaa ngaashi tandi shi ningilwa pethimbo ye a li a kwatwa, onkene ondina ashike okulongela kumwe opo ndi yande okudhipagwa molweendo lwokupulapulwa. Kombinga onkwawo Kapere okwa li ta heke ndje kutya nandi popye ashihe ndishi, ndi hokolole kutya oolye yomoshigwana ya kwathele ndje nkene nda thikile moNamibia oshowo nandi gandje iikondjitho yandje.

Okwa li wo a hokolola kombinga yaakwiita yalwe yo PLAN mboka ya li ya si  konima yomadhengo gaanohenda, molwashoka yo oya tindi okulongela kumwe naamboka yali ta ye ya pulapula. Ngiika okwa li tapopi kombinga yoshiningwanima moka Corporal Smith a dhipagele omukwiita gwoPLAN hailwa Shikongo Mbwalala konima yomadhengo gaanoluthuwo. Hailwa Mbwalala kombinga yaashoka nda  kundana ye okwa li onginia ndjoka ya li noshinakugwanithwa shoku teyagulapo omahala gomutondi  ngaashi oondjila moka ha ya ende.

Omanga ya li taya kambadhala oku itaalitha ndje ndi longele kumwe opwali wo aakwiita yaali aaluudhe mboka ya li taya longo ongo aatoloki mOshiwambo no haya kwathele Du Plessis okushanga omahokololo. Aakwiita mbaka yaali oyo Thomas Atjimbanga na Nestor Sheehama[Dice]Konima onda ka uva kutya mboka yaali nayo oya li aakwiita nale yoPLAN ya kwatelwe manga ya li miilonga meni lya Namibia nenge yi igandja yoyene kaatondi. Inandi vula okushilipaleka omahokololo ngoka sigo oompaka.

Kakele kutya aakwiita mbaka ya ninga iilongithwa yaatiligane oshowo yomutondi oya kala aluhe haya holoka uuna Du Plessis na Neel taya pula ndje, nonando yo inaya kuthombinga mokudhenga ndje oshowo mokuhepeka ndje. Ngele Atjimbanga na Sheehama oya li yaapo opwa li ishewe aakwiita yaali haya kala na Du Plessis na Neel. Mbaka oyo Paulus Uugwanga na Petrus Paulus a tseyitka wo nedhina Camarada nenge Jacky. Camarada naye okwa li nale omukwiita goPLAN  ngoka a kwatelelwe molugodhi lwali  pOkongo mo 1977.

Atjimbanga na Paulusu oya li ya tseyika nawa mokuhepeka  oonkwatwa ndhoka dhili aakwiita yoPLAN. Shoka onda kundana kutya mbaka oya li haya kuthombinga mokupula nokumbandameka  noku ehameka aakwiita yoPLAN  oshowo aakwashigwana mboka haya fekelwa kutya  oya li haya longele kumwe naakwiita yoPLAN.

Oshikwawo aakwiita mbaka ya ninga iilongithwa yomatanga gomutondi oya li wo haya kuthombinga miiponokela yokukondjitha oondume dhomukuti ongo ya fa ooguerrilla.Onkene onda koneke kutya ehololo lya Michael na Kapere kutya oye shindje olya tula ndje mokakololo moka sha li oshidhigu oku ikuthamo noondunge. Onda tameke okudhiladhila mbala kutya ondina okulundulula ehokololo lyandje kombinga yekwatathano lyandje noSwapo noku zimina pandunge kutya ondina ekwatathano noSwapo.

Omadhengo otaga ka mwena ngele onda zimine kutya ngame oshilyo shoSwapo/PLAN nenge pamwe otaga ka geyeka onkalo? Ota pu ka ningwa shike  kombinga yehokololo ndyoka nda kala tandi longitha okuza tuu kesiku nda kwatwa? Ngaka omapulo ge ende momadhiladhilo gandje ta ga kongo omayamukulo.Oshikwawo oshike ndali ndina okuholola naashoka ndaana okuhololela aakwati yandje, ngaka ogo omaipulo nda kala ndina muule wandje, nonando kapwali ngoka tandi vulu okupula opo a pendje omayele, molwashoka ngame onda li handi longo ongame awike onkene onda li ashike nethimbo efupi oku tokolapo sha.

Ehokololo ndyoka ndali nda longekidha okuhokolola ngele esiku limwe onandi kiiyadhe monkalo ngaashi ndjika  okuza tuu nkene ndi ile moNamibia, opo ndi holeke iilonga yandje yomonaguwi  olya li. Ngele onda kwatwa muumbangalantu wa Namibia otandi hokolele aakwati yandje kutya  onda adhika ashike opo nda thiki moshilongo omasiku gaali omanga inaandi kwatwa.

LEAVE A REPLY

Please enter your comment!
Please enter your name here