Tonata ota kwathele oongunduyambidhidhi

0
381

 

ONAYENA –  Tonata ehangano lyongongahangano yoongunduyambidhidhi dhaamboka ya kwatwa nenge ya gumwa kombuto yo HIV/AIDS.

Gumwe  gwomewilikongundu mehangano lya Tonata nokwa kalelapo Oshitopolwa shaShikoto Aili Nambala okwa yelitha kutya  ehangano ndika olina oongunduyambidhidhi dhili 421 niilyo ayihe kumwe yili 14 900 miitopolwa Oshikoto, Ohangwena, Omusati nOshana.

Nambala ta ti ehangano lyaTonata olya totelwapo owina opo li nkondopeke oongundu yambidhidhi. Opo ndhika dhi kale dhi ithikamena dho dhene. Dhi kale dhina ewi li na shoka ta li ti,dho dhi kale dha kalelwapo momitungilo adhihe  hadhi ungaunga niinima ya pamba HIV/AIDS, dho dhi kale woo tadhi dhana onkandangala mekondjitho nomeshunitho pevi lyombuto ,oshowo oku uvithako aakwashigwana kombinga yiinima mbyoka ya pamba oHIV/AIDS.

“Oongunduyambidhidhi odha simana unene oshoka odho dha humbata oshapi yoshigwana, otse omeho goshigwana, otse aahungimwenyo, oondohotola, aapangi ,aalongi naasita woo, odhindji odhili komapenda unene mOshikoto moka handi longele, mongunduyambidhidhi ongundu yaantu ye vulithe pu gumwe nenge yaali, yena elalakano limwe noyuuvitathane no taya yambidhidhathana mokukandulapo oompumbwe dhawo nomaupyakadhi momidhingoloko,” Nambala ta ti ngaaka.

Nambala ndhino okwali edhi popi pethimbo ta popitha mboka taya lumbu nombuto yoHIV/AIDS naamboka ya gumwa pontanda ndjoka yali ya ningilwa iilyo yoongundu yambidhidhi mOshikoto. Oshiithanene shika osha li sha ningilwa moshikandjohogololo Onayena. Moshitopolwa shika ota mu adhika oongundu ndhika dhili 105 niilyo yili 2 982 miikandjohogololo ayihe

Ta gwedhapo kutya mokugongala mongundu yambidhidhi omuna uuwanawa owundji. “Mokugongala pamwe na yakweni oto kala wuna ombili yokomwenyo, ngoye to hungwa pamwenyo nopambepo, owu na ompito yoku mona omadhewo, owu na uuthemba noonkondo dho ku pula shoka wa pumbwa naaluhe omwenyo goye otagu kala guna ombili yokomwenyo, otandi indile kehe ngoka a kwatwa nenge inaa kwatwa kombuto yoHIV a kale a ninga oshilyo ye a gongale naantu ooyakwawo ya ndungikathane muukumwe,” Nambala ta tsikileko ngaaka.

Nambala okwa yelitha woo kutya oongundu yambidhidhi ka dhishi owala dhaamboka taya lumbu nombuto yoHIV, ashike odhaakwashigwana ayehe mboka ya gumwa. Ta indile mboka yeli kepango ya dhiginine omiti dhawo oshoka omuna ealudho. Tati moku enda omahala nomahala okwa mono kutya aakwashigwana oyendji ngaashingeyi oyu uviteko noya taambako ashihe, ta tsikileko kutya HIV/AIDS omukithi owala ngaashi omikithi adhihe nogwa kwata kehe gumwe, ta ti ngoye mwene ngele ino kwatwa mumwanyoko, nyoko, ho nenge omumoye a kwatwa. Iilyo oyali ya nyanyukwa moku gongala pamwe oshowo okutungathana.

LEAVE A REPLY

Please enter your comment!
Please enter your name here