Tuyeni kolupale la Tuyeni: Oukilisite woye naukale oilonga yoye ei holongo

0
447

 

Omanga ovatilyane vovaSoomi inaava mbombolokela ko Africa taku tengenekwa pomido 1870, eshi osheluulika nale nosheya pouyelele kutya mboli ova Africa aveshe okwali ashike ovapaani.

Otaku hokololwa Ovawambo va kala vena oinima yavo naimwe ei otaku tiwa oya kala hai pewa oikulya ilo ouvalelo ngeenge ovanhu aveshe meumbo vaka nangala.
Kepulo ne kutya eima ekwashike nolina omakasha ilo omakondo ilo pamwe olina eemadi, aayee eshi okwali ashike hashishivika kumwene weumbo ou heya okulipa nye shapo okamepo ashike hamuudu takapepe katalala nomaxwilili komitwe deni oko, oixuna shili yondjongo yomounyuni wonale.

Momaumbo Ovawambo ava vakala vafimaneka oimengha noidila, otakutiwa momaumbo avo kakwali hamukokololwa oinima pedu oufiku mo navali ihamufiilwa natango omate pedu oufiku. Efimbo limwe vati nokuli nongeenge owa hala okukolola oufiku otolombwele mwene weumbo toti, tatekulu pitikenge ndikolole oufiku. Noshinima shimwe vali ihamuka sitamwa pondje oufuku oove auke, vati kukala ngo ino uda ondaka ta iti, tostamenenge ame wa, hano kuweteko nawa.

Hano okokutya ovatilyane ovakala ne tava longo noudjuu okududamo nokuxulifapo oinima ei vahanga tainingwa kovawambo nokuli imwe otakutiwa omo kwali vaitavela ngaashi naana omunhu aitavela oukiliste woshili, ovakendambala okuhonga ombibeli moshiwana yo ikale yashivika nawa kwaava vakala valambalala oumulile kumwe noimengha.

Oupyakadi wakula owakala ne apa molwaashi omunhu opo umu longe ombibeli ye ashiive aka longe vakwao, shotete okuna okukala eshi okulesha, hano oshayela ne kutya ovatilyane ava okwali vaetelela neefikola tava tula ovanhu meeshikola nokonima otava tameke ne tave vape ehongo lOmbibeli, ashike otakutiwa ovawambo ava pokumona kwavo tete eendada dashangwa vati okwali havati, ovatilyane otavetulongo noiti yeelindakana vo tave tu lombwele Kalunga mbela vati eshamane ngo lili oko vadja oko.

Kaanave poima opali oilonga, shaashi okwatya ngo kombinga imwe ovanhu okwali va hala okulongwa ombibeli molwaashi okwali oshinima shipe kuvo, kombinga imwe vali ovanhu ava kakwali vahala okweefapo oinima yavo oifalakanena oyo vakala vaidilila momaumbo hano molwaashi omo vakala vaitavela, ashike ovatilyane vati ove va lombwela ngo nawa kutya oinima yeni oyo ne, itaitu nande kumwe nOmbibeli ei twa etelela shapo oshiwa muixulifepo.

Paife ngaha ondahala ne uka pwilikine koinyenga ndunge, kehokololo lomushamane tatekulu Shilimetindi ya Ndimulunde a kala pEngela pomukunda uli popepi nOshikango pomido 1923. Tatekulu Shilimetindi okwali omupaani yeemwene molwaashi otaku tiwa okwali omulile. Omushamane ou otakutiwa okwali ne adala ovamati vaye veli vatatu, Haiduwa na Shoonyeka na Shiponeni aveshe kwali hava kapanga kohambo.

Oshikando shimwe Shiponeni eshi adja kohambo eya peumbo, okwa shakenekapo ovatilyane tava hongo ovanhu ombibeli kutya otaiti ngahelipi. Shiponeni mokumona ovatilyane ava okwali atokola nokwa lombwela xe Shilimetindi kutya, ye kohambo itaishunako vali ota ka  longwa ombibeli, oixuna shili yomulile taai koshikola yombibeli.

Poima opali oilonga, molwaashi tatekulu shilimetindi okwa lombwela omona ta ti, ngeenge oto kala toi keetudi dombibeli hameeumbo lange todi nongeenge oto kala hoi kongeleka ouna okukala toli ombibeli yeni kongeleka oko kandina oikulya yange tailiwa kovakiliste nande nande .
Shiponeni ina pwilikina nande da xe okwa hovela okuya oku haku ongala ovatilyane tavaningi ongeleka, ashike ovatilyane mokumona Shiponeni oikando itatu kongeleka, vati ovamona kutya ohapwilikine nawa na mutu ota dulu nokutumwa kofikola youfita aka shikole ye euye aninge omufita woshiwana. Mboli omushamane ou eshi omulile, nounona vaye ngeenge opo tava dalwa ohavapulikwa. Nashiponeni ou mboli okamulile nande ye ke shishi, tatekulu Shilimetindi mokuuda Shiponeni ta tumwa kovatilyane koufita, okwe mu kalela omutumba nde temu lombwele ta ti, Shiponeni tala ngeenge otoi keefikola doye doufita, kotoka ne molwaashi she ovatekulu vaKaimbi Kananghali meekulu ou adala tate, oufiku okwali eulya olusha ye omo kwali a ningila oshipuna.

Paife pwilikina nee eshi okamulile kashona katumwa kofikola yovafita mokuhashiiva kwovatilyane, aayee shiponeni osho ai kofikola youfita ndele taningiko eedula 8 konima eshi amana oshikola yaye okwaalukila kEngela kovatilyane ava vemutumine kofikola.

Tatekulu shilimetindi eshi amona shiponeni adja kofikola youfita okwemulombwela kutya, meumbo lange itamukala omufita wovanhu omanga ino hala okuninga omufita weengobe dange, kakalele ashike ovakiliste vakweni pongeleka opo tamuli eembibeli deni meumbo lange itamu nangala omufita wovanhu eengobe dange opo ndishiive ndifyepo, temu ula ngaho. Okwa nokuli a hala okumutwa nomukonda.

Oumulile mboli oshiponga, Shiponeni ya Shilimetindi osho a yapulilwa oufita kovatilyane ndele tatumwa metumo kushilo woKongo komikunda odo da kala dili koushayi opo aka ninge omufita waako, Shiponeni mokuya pomukunda ou kwali hakutiwa Oifidi ya Ndevadele, ovanahambo aveshe vaapo okwali vahafa mokumona omufita eya okuva ningila ongeleka oyo kwali veeshi na inave imona nande onale, ovakala ngo ne hava mbombolokele oko.

Omufita ou eshi a ninga eemwedi mbali pomukunda wavo opo, opa holoka oshinima ta shi li outana koinyongo ndele ovanahambo tavalulilwa ne vali, vamwe taveya yo nokuhokololela omufita ou evapa vati omukumo tati, tutaleni mOmwene wetu ou eli pombada oye eshi oinima aishe, kaanave mboli tashili ekunde hashili ashike mekunde. Tatekulu Hedimbi la Haufiku umwe womwaava kwali tava likila outana okwali ena omwiyo winya haukwata omambungu neenghoshi, andile ngo nao kombishi koushimba winya womeni laAngola.

Oufiku wOlomakaya limwe okupendukila Oshoondaxa, tatekulu Hedimbi la Haufiku okwa tokola okutela omwiyo koshinyongo shaye ye amone kutya oshike naanaa ta shili outana vaye hano, ta! mboli shiponeni yashili metindi ou eya kofuka netumo lovatilyane haye ashike tali outana vovanhu koinyongo ye ongula tashuna ngo keumbo longeleka molwa oumulile wokeumbo lambulavo, omulumenhu otaku tiwa okwali haudifa nawa ye okwali halesha Ombibeli ndele fiyo todi omaxwilili komutwe woye.

Tatekulu Hedimbi mokupita ngo ongula aye koshinyongo ye a ka tale omwiyo waye ngeenge owa kwata, aayee oshili enima eli lili momwiyo ngheengo adalelwe lo kalishi nokutalwa, takatala ovashiinda vakwao veuye vemutalife, ovashamane vamwe kwali tavatale nawa ovamona kutya eima eli lili momwiyo kombinga imwe onghoshi lo kombinga imwe omunhu mboli.

Omushamane umwe kwali ta shemunhuna nawa okwa pula vakwao ta ti, vakwetu eima olo omuliwete ngo nawa komutwe walo oko kutya olafa omufita wetu ou eya poshilongo apa? paife ne noxo omukweno ou taukwenwa keima aiyee mbela otalikwena ne oshinghoshi shili mumwe noshinhu, omingungumo apeshe ngo no opo ovashamane aveshe ava valipo ovadimbulula nawa kutya omunhu mboli oShiponeni ou opo euya pomukunda netumo.

Hano efyo lashiponeni omuleshi osho laenda ngaho, hano fiyo onena opo ne padja ovanhu vokoushilo woKongo ngeenge tovalombwele ongeleka ouna naana okuveenda nawa molwaashi ngheengo ve itondifilwe kushiponeni omido donale nale nonande ongeleka hayo elalakano layo olo.

Shiwana mefimbo letu lonena namo omuna ngo vamwe hava kala vekwetele eengelaka detu komesho hava monika ngo vafa ovakiliste voshili, ashike oilonga yavo ei hava ka longa konima nge vadi keengeleka ita itu nande kumwe nomishangwa detu edi dili mOmbibeli yetu, tu longeni oilonga oyo tai tuulike kutya sheni ovakiliste moshili.
Inatu hala kweefapo nande oikalunga yetu oyo ili komaumbo etu omo, ohatukipa nokuli noumeya vatalala konima ngeenge twadi komalongelo Kalunga, kotokeni ne mouhamba wakalunga itatu ka yamo ava twapapata eenyala adishe, oshili otuna okuhanga omivelo dapata ndele omikweno apeshe opo.

*John ya Tuyeni otamonika ko mrtuyeni76@gmail.com  ile kongodi 0812988549. Omadilaadilo aa oomunyoli yee mwene ndele kaeshi aKundana.

 

LEAVE A REPLY

Please enter your comment!
Please enter your name here